Read zande Yosua 6 Bible Online

Yosua 6 - zande bible

Yosua 6

¹Si du i akisi Yereo ti ni nyanyaki vuru he yo na zegi yo a be awiri aYisaraere, a nga boro sa nakuru ku zegi yo te, a nga boro sa narimi ku vuru he yo a te.

²Yekova ki ya fu Yosua, “Mo bí, mi fu Yereo ku be ro, na gaha bakindo, na gaha nyanyaki aboro nga ngangarã yo.

³Oni nga abasovura dunduko, oni aké pati bakporo kirikiri bara sa. Wo oni ka manga ha tipa uru sita.

⁴Aboromotumo wa aboro saba azáda anambongo saba nga gbanga abaakandoro ku mbata yo fu sanduki. Ti saba uru oni aké pati bakporo kirikiri bara saba, aboromotumo ki vudi anambongo.

⁵Si nikadu wa gere, ho i ka vuda anambongo ni nga gbanga abaakandoro ni gbanga ha, na ho oni ka gia woro anambongo ni, aboro ki ta ngbayo ni bakere wawa gbe; ngapa bakporo atíwa ku sande kpaserekpasere, aboro ki nindu dunduko kina barangba yo diiri.”

⁶Yosua nga wiri Nuna ki yambu aboromotumo, ki ya fu yo, “Oni tíndi sanduki mokido, aboromotumo saba ki zadi anambongo saba nga gbanga abaakandoro ku mbata yo fu ga Yekova sanduki.”

⁷I ki ya fu aboro, “Oni súsi ku mbata yo; ki ke pati bakporo kirikiri, aborosovura ki ndu ku mbata yo fu ga Yekova sanduki.”

⁸Si ki du wo, ho Yosua agumba pai ni fu aboro, agu aboromotumo saba nazadi anambongo nga gbanga abaakandoro ku bangiri Yekova, i ki susi, ki nivudi anambongo, ga Yekova sanduki mokido ki nipe fuo yo.

⁹Aborosovura ki ngbe ku mbata yo fu agu aboromotumo navuda anambongo, agu yo du sa yo ki nipeke fuo sanduki, i ki ta ndu nivudi anambongo kindi.

¹⁰Yosua ki rugu aboro, ki ya, “Ka oni tá nga ngbaroni ya, ka i gí nga fugoroni a ya, ka pai kúru nga ngbaroni yo wa sa ya, dati kina gu uru mi ka ya ti ni fu roni, oni ta ngbaroni; oni ki tá ngbaroni.”

¹¹Were ko arugu pa ga Yekova sanduki si ke pati bakporo kirikiri, si ndu bara sa; i ki yega ku bataya yo, ki niraki bataya yo.

¹²Yosua ki guari kina boro ngbatutu wiso, aboromotumo ki tumba ga Yekova sanduki.

¹³Agu aboromotumo saba nazadi anambongo saba nga gbanga abaakandoro ku mbata yo fu ga Yekova sanduki, i ki ta ndu ku mbata yo nivudi anambongo kindi. Aborosovura ki ngbe ku mbata yo fu yo; agu yo du ku sa yo ki nipeke fuo ga Yekova sanduki. Aboromotumo ki ta nau nivuai anambongo kindi.

¹⁴Ti ue uru i ki ke pati bakporo kirikiri bara sa, ki yega ku batava yo. I ki mangi he wo tipa rame sita.

¹⁵Si ki ta du wa gere ti saba rame, i ki guari boro ngbatutu wiso bara ho rago nagira ni, ki ndu a wo ki ke pati bakporo kirikiri bara saba: ono ni kina gu uru re i ake pati bakporo bara saba.

¹⁶Si ki ta da ti saba ha, ho aboromotumo avudi anambongo ni, Yosua ki ya fu aboro, “Oni tá wawa; bambiko Yekova fu gi bakporo re fu roni.

¹⁷Bakporo adú ni dikadika ha fu Yekova tipa gbarasa ha, si na agu ahe dunduko du rogo ho. Kina Raba sa nga natakuari nikabata ni ungari, ri na agu yo dunduko du rogo gari bambu yo, bambiko ri naoko agu asunge ani akedi yo.

¹⁸Oni tigaoni, oni bánda tironi gbe ti agu ane i adika ha tipa gbarasa ha, si ngia fuo dika oni he, oni adĩ bete dikadika he; oni ka gbarasa aYisaraere bataya yo, ki fu rungo fu yo.

¹⁹Ono feda dunduko, na dahabu, na gu aũsunge nga ga sirigi na marã, si du ni kparakpara ha fu Yekova; si nikaye ku rogo ga Yekova baigaahe yo.”

²⁰Si du aboro ki ta wawa, aboromotumo ki vudi anambongo. Ho aboro agi woro anambongo ni, i ki nita ngbayo ni bakere wawa gbe, ngapa bakporo ki tiwi atiwa ku sande kpaserekpasere. Si du aboro arimi ti ni ku bakporo yo, aboro dunduko ki nindu kina barangba yo diiri. I ki di gu bakporo re.

²¹I ki ba tunga agu yo nadu rogo bakporo dunduko ni basape, nga akumba na ade a, aparanga na gbinza aboro, na abaabagara, na akandoro, na adongi a.

²²Yosua ki ya fu agu akumba ue namoi gu ringara re, “Oni ndú ku rogo ga natakuari bambu yo, ki kusi gu de re, na agu ahe dunduko du be ri, a wa oni azunga he fu ri.”

²³Agu aparanga namoi rago ki rimi, ki kusi Raba ku zegi yo, na bari, na nari, na akawiri, na agu ahe dunduko nadu be ri. I ki ye na gari aborokporo dunduko ki moi yo zegi yo ku gii ga aYisaraere bataya yo.

²⁴I ki zokodi bakporo ni we, na agu ahe dunduko nadu rogo ho, kina feda, na dahabu na agu aũsunge nga ga sirigi na marã, i amoi he ku rogo gu baigaahe yo nga ga ga Yekova bambu.

²⁵Ono Yosua abatasi kina Raba sa nangia natakuari ni ungari, na ga bari aborokporo dunduko, na agu ahe dunduko nadu be ri. Ri ki nye kindi ku dagba aYisaraere yo, ki da ti gi rago re; bambiko ri aoko asunge nga agu yo Yosua akedi yo i moi rago Yereo yo.

²⁶Yosua ki zunga he fu yo ni gu rago re, ki ya, “Boro motiwa ku bangiri Yekova nikangia gu ni nikaguari ka dua gi bakporo re nga Yereo berewe. Ni amáa mburuhe ni kpio bambata wirini, ni ki dua ngbadimoho ni kpio kiaro wirini.”

²⁷Were Yekova adu na Yosua; rimoko ki wo awo rogo ringara dunduko.