Read zande Yosua 9 Bible Online

Yosua 9 - zande bible

Yosua 9

¹Ono ho agu abakindo naadu mbiti Yaradene yo agi he ni, naadu rogo ringara abaagangara, na rogo ringara kpasakpasa rago nga gu ndu ku Rebanona yo, pangba Bakere Baime, nga aEto, na aAmoro, na aKanano, na aPereso, na aIvo, na aYebuso;

²i ki dungura tiyo wa boro sa, ka so vura kuti aYosua na aYisaraere.

³Ono ho aboro Gibona agi pa agu apai ni Yosua amangi Yereo na ni, na Ai,

⁴i ki mangi pai ni biriki, ki ndu ki mangi pai wa i nidu wa kedikedi aboro, ki rogo kuru amangu ku auru gayo adongi, na amangu imekakue, ni kina kpata ha, ni sipisipi he, ni rungurungu he;

⁵na kuru kpata rakata nduyo yo, ni rungurungu he, na kpatakpata aroko ti kpotoyo. Gayo riahe dunduko ki du ni kina ugu he ni nvutanvuta ha.

⁶I ki ndu ku bataya yo koyo du Yosua ni ku Girigara yo, ki ya fu ko, na fu aboro aYisaraere, “Ani ye gii ngbi yo tuturũ; mo zúnga he fu rani tie.”

⁷Aboro aYisaraere ki ya fu aIvo, “Si ngia oni nga agu yo naraka dagba rani; ka ani zunga he fu roni waĩ?”

⁸I ki ya fu Yosua, “Ani nga gamo amoyambu.” Yosua ki ya fu yo, “Ada nga oni? Oni naye wari?”

⁹I ki ya fu ko, “Gamo amoyambu naye tuturũ gii ngbi yo mbiko rimo Yekova ga Mbori. Bambiko ani gi pande ko, na gu pai ko amangi Ezipeta yo,

¹⁰na gu pai ko amangi agu abakindo ue na ni, nga ga aAmoro yo, naadu mbiti Yaradene yo.

¹¹Gaani abaakumba na agu aboro naraka rogo gaani ringara ki gumba pai fu rani ki ya, ‘Oni rógo riahe ku beroni tipa nduge, ki ndu ka ngbisa yo, ki ya fu yo, “Ani nga gaoni amoyambu; awere oni zúnga he fu rani tie.”’

¹²Gi gaani kpokuta re ani arogo ho ni fafoi he rogo gaani abambu ho ani aguari ni ka ye kono du oni ni; ono awere, mo ngére, si ugu dũ, ki du ni kina nvutanvuta ha.

¹³Agi amangu imekakue re adu ni kina vovo ho ho ani ahihisi he ni, mo ngére si sipi dũ; gi gaani aroko re na rakata si kpataka be bagbanga nduge.”

¹⁴Aboro ki di bete gayo riahe, ka i asana nga Yekova tipa pa yo mbata ya.

¹⁵Yosua ki mbakadi pa zereda na yo, ki zunga he fu yo, ka batasa yo ni ungayo. Abazogo rimbasa aboro ki zunga he fu yo a.

¹⁶Si ki ta du wa gere, ho rame anyasi ni biata fuo zunga yo he fu yo, i ki gi he ya mbembedi aboro nga yo, nanaraka kina dagba yo.

¹⁷Awiri aYisaraere ki guari ka ndu, ki da ti gayo abaakporo ti biata uru. Ono gayo abaakporo angia Gibona, na Kefira, na Birota, na Kiriyata-yarima.

¹⁸Ono awiri aYisaraere aimo nga yo te, bambiko abazogo rimbasa aboro azunga he fu yo ti rimo Yekova, nga ga aYisaraere Mbori. Rimbasa aboro dunduko ki nigumba rimo abazogo.

¹⁹Ono abazogo dunduko ki ya fu rimbasa aboro dunduko, “Ani azunga he fu yo ti rimo Yekova, nga ga aYisaraere Mbori, si du ka ani arengba nga na manga yo ti ni ya.

²⁰Gi pai re ka ani mangi he fu yo, ki he yo ni ungayo; zinga ka du ku ri rani, tipa gu zungahe ani azunga ha fuyo.”

²¹Abazogo ki ya fu yo, “Oni hé yo ni ungayo.” Si du i asa yo ti ni ni abakua nyake, na abatudi ime fu rimbasa aboro dunduko, a wa abazogo agumba ha fu yo.

²²Yosua ki yambu yo, ki ya fu yo, “Tipagine oni anangi rani ti ni, ki ya, ‘Ani tuturũ na oni’ ho oni naraka ni kina dagba rani?

²³Awere tie oni nga aboromotiwa, agu roni adú ni akanga, ni abakua nyake, na ni abatudi ime kindi, tipa gu bambu nga ga gi Mbori.”

²⁴I ki karaga pai fu Yosua, ki ya, “Bambiko i agumba ha fu gamo amoyambu ni rengo, ya Yekova gaoni Mbori arugu gako moyambu nga Mose ko fú ringara fu roni dunduko ki ba tunga araki rogo gu ringara re kpakaya barangba roni; si du ani agunde ti ni tipa ungarani be roni, ki mangi gi pai re.

²⁵Mo ngére ani awere kina ku be ro. Gu pai ngba bangiro ni rurupai ka manga ha fu rani, mo mángi kina ha.”

²⁶Ko ki mangi he wo fu yo, ki batasi yo be awiri aYisaraere ka i aimo nga yo ya.

²⁷Ono Yosua ki moi yo ti kina gu uru re ni abakua nyake, na ni abatudi ime tipa rimbasa aboro, na tipa ga Yekova bamotumo, rogo gu ba ko aidi ka sia ha, ki da ku awere.