Read zande 1 Timoteo 1 Bible Online

1 Timoteo 1 - zande bible

1 Timoteo 1

¹Pauro, ga Kristo Yesu mokedi ku sangba ga Mbori rugute yo nga Batasirani, na Kristo Yesu gaani maabangirise,

²Fu Timoteo, nga wire rogo idapase yo ni rengo: Undahe dú foro, na inapai, na zereda, be Mbori nga Ba na Kristo Yesu gaani Gbia.

³Wa mi azungadi ro mo sungu ku Efesa yo, ho mi andu ni ku Makedonia yo, ya mo rugu agu akumba ya ka i yugu nga kura yugopai akia ya.

⁴Ka i dége nga tuyo fu kungba gumbagumba apai, na peka pa ngbatunga aboro ya nga gu nakusa kina sakapai, adu nga na pa Mbori rogo idapase yo ya.

⁵Ono digida pa rugute nga gu nyemuse nakura gigiri ngbaduse yo, na wene sangba kpoto yo, na ndikidi idapase.

⁶Agu yo akpara tiyo ku bani sa kungba apai ti agi apai re;

⁷nikpi nyemu ka du ni abayugupai rogo pa rugute; ono i aina nga gu i nape pa ha na gu i nagumba zukazuka te.

⁸Ono ani ini he ya rugute ngba, nga gu ka boro mangi he nzunzu,

⁹ki ini gere, ya i afu nga rugute tipa ruru boro te, ono fu abasarugute na airamungu, fu azangasinombori, na aboro ingapai; fu airabiriki na airagberãngba yo, fu ataki abayo na ataki anayo, fu aimiaboro,

¹⁰fu airabari, fu agu yo nabirikosi tiyo na akumba, fu abaziaboro, fu airazire, fu airazungahe ni wia, na gu kura ahe ka du ho arengba nga na wene yugopai ya.

¹¹Gere du ku sangba gu wene pangbanga yo nga ga gu taarimo nga ga betedi Mbori, i afu he fere mi banda ha.

¹²Mi natambua gu ko naunda re, nga kina Kristo Yesu gaani Gbia, mbiko ko aberẽ he ya irarengo nga mi, ki asia pa gako sunge fere.

¹³Mi avura du mbata ni iragberãngba yo ni irarungosi boro, ni iragbarasapai, ono mi abi inapai, bambiko mi amangi he ni mungo ni zanga idapase.

¹⁴Gu undahe nga ga gaani Gbia si amoi pai amaa susi ni idapase na gu nyemuse du rogo Kristo Yesu yo.

¹⁵Gi pai re, rengo nga ha, si re aboro dũ na dia ha, ya Kristo Yesu aye ku zegino ka batasa aboro ingapai; mi nga barumbatayo dagba yo.

¹⁶Ono mi abi inapai mbiko gi pai re, ya Yesu Kristo yugu gako gbanga hipai rogo re yo dunduko wa du mi ni barumbatayo, ni kpia pai fu agu yo nikaida pa ko ku mbata yo sa nyenye unga.

¹⁷Awere irisa dú fu nyenye Bakindo, na taarimo, nga gu ko ka azirã nga ya, ka i abi nga ko a ya, nga bangisa Mbori du na tatamana nye anye kindi. Amina.

¹⁸Gi rugute mi nafu he ku be ro re, Timoteo, wire, ku sangba gu gumba pai yo nandu mbata yo foro, ya mo so gu wene vura re mbiko ho;

¹⁹nika kuti idapase, na wene sangba kpoto yo, nga gu agu yo aba ha ku sa yo ti yo, nirindasi idapase.

²⁰Umenaio du dagba yo na Aresanduro; nga agu yo mi afu yo fu Satana, i yugu pai fu yo ka i agberã nga ngbayo yo ya.