Read zande 1 Timoteo 3 Bible Online

1 Timoteo 3 - zande bible

1 Timoteo 3

¹Gi pai re rengo nga ha, Ka kumba gbata sunge babipai ni nakpi nyemu wene sunge.

²Were babipai ka du ni zanga pai ti rimoni, ni kumba ku de sa, nizogo tini na zera, ni bayee ni, nike na ina pai fu boro, rengbe na yugo pai.

³Ka ni akpika nga pai mbiko buda ya, adu nga ni bataboro ya; ono ni wene ringini, ka ni adu nga ni irasakapai, ni iranyemumarã ya;

⁴nga gu ni nazoga kpuni tigani wenengaĩ, nizogo awirini ni zera.

⁵Ka kumba aina nga pa zoga kpuko ya, ko awira pa banda ga Mbori kanisa wãi?

⁶Ko ka du ni paranga te, enda ka kiisa ko ko ti rogo ga bakitingbanga ngbanga.

⁷Dezireko ki du ni wene he bangiri agu yo du zegi yo a; ko ka ti rogo ga bakitingbanga gbarasa rimo na gbina.

⁸Kina wo adiakona ka du a tigayo na zera, ni kparakakparaka fugoyo te, na mbira imekakue gbe te, na kpi nyemu marã te.

⁹I nika kuti gu gasigasi pai nadu ni gbugbu he nga ga idapase rogo gigiri sangba kpotoyo yo.

¹⁰Agi yo re i asadi yo mbata a; fuo ho i ki mangi sunge adiakona; nga gu ka i abi nga pai ti yo ya.

¹¹Kina wo ade ka sunga na zera, ni aboro totoroto te, ni zogatise, ki nimangi apai dunduko nzunzu.

¹²Adiakona ka du ni kumba ku de sa, nizogo awiriyo na gayo kporo wenengaĩ.

¹³Bambiko agu yo namanga sunge adiakona wenengaĩ i kiisi payo bangiri aboro, ki du na bakere nyaka rogo gu idapase du rogo Kristo Yesu yo.

¹⁴Agi apai ke mi paha foro re, nimoi bangire ti ye koyo du mo ni mbembedi.

¹⁵Ono ka mi ima gbe, mo ki ini gu pai aboro ka manga rogo ga Mbori bambu, i nga gu kanisa nga ga unga Mbori, nga songodi rengo na nduhe.

¹⁶Na kii gu gbugbu pai nga sinombori, ka i ti nga kangu he te; Gu ko i ayugu ko rogo borose yo, Ziazia Toro ayugu pa ko ni ruru ko; amaraika abi ko, aboro atungusi pa ko dagba arikaaboro, i ki idi pako zegino, i ki di ko ku ari yo na taarimo.