Read zande 1 Timoteo 5 Bible Online

1 Timoteo 5 - zande bible

1 Timoteo 5

¹Ka mo zá nga sosono boro ya, ono mo zúngadi ni wa bamo. Aparanga ki du bangiro wa awirinamo,

²gbinza ade wa anamo, paranga ade wa adawiro rogo wene sino.

³Mo írisi gu ndikidi adekurugbo.

⁴Ono ka dekurugbo du na awiriri, watadu atitari, i ki wiriki pa yugo inapai fu agumeyo tigayo mbata, na ka unda avunguyo, bambiko gi ngba re bangiri Mbori.

⁵Were gu ri nga ndikidi dekurugbo, nazanga ahe, ri namaa bangiriri ti Mbori, nika kuti zungaditise na akpe yuru na uru.

⁶Ono gu ri napeka kina sangba borose wa vura du ri ni ungari ri ima kpi.

⁷Agi apai re mo rúgu he fu aboro a, i zanga pai ti rimoyo.

⁸Ono gu ni ka aberã nga pa agumeni, na gani aboro kporo a ya, ni basa pa idapase, ki gberẽ susi gu ni aida nga pai ya.

⁹Gu dekurugbo garãri ata du nga wa 60 ya ka i ké nga rimori ya, nga gu ri nadu ni de fu kumba sa,

¹⁰i ataka pande pa ri mbiko gari wene mangapai. Si ngia ri ambu ti agude, ki nidi kura aboro ku gume, nizundu kpendu ga Mbori aboro; niunda agu yo adu ngba pai, ki peke wene mangapai sisiri dunduko.

¹¹Ono mo ká ha fu agu adekurugbo adu nga garãyo wo ya, bambiko ho nyemu gayo apai ka nanga yo ni ti Kristo, i ki nikpi nyemu roga akumba,

¹²ki du na pai ri yo, bambiko i aba gayo oambata idapase ku sa yo.

¹³I nawirika pa nyomoro a, niyara ayara ti dungu abambu, ni kina nyomoro sa te, ono ni aboro menemene a ni adingbitipai, nigumba agu apai ka i agumba nga ha ya.

¹⁴Mi nakpi nyemu paranga ade i rogo akumba, ki batika agude, ki nirugu pa aúkporo, ka bakitingbanga asoa nga pai mbiko yo wa sa ya,

¹⁵mbiko agu yo aima sa tiyo ku bani fu Satana.

¹⁶Ka gu de idipase du na adekurugbo be ri, ri mbú ti yo; ka i fúdi nga kanisa ya; kanisa mbu ti agu yo nga ndikidi adekurugbo.

¹⁷Agu abaakumba nazoga rago wenengaĩ, i re na irisa susi, fu agu yo gbe namanga sunge rogo tungusapai na yugopai.

¹⁸Ya Ziazia Kekeapai wẽ, “Ka mo vó nga ngba babagara ho u nasimba zendehe ni ya,” na, “Bamangisunge re na gani marã sunge.”

¹⁹Ka mo ídi nga pai kuti bakumba ya, kina ku ngba adezire watadu ue na biata.

²⁰Agu yo nainga pai, mo zá yo ku bangiri aboro du, akura yo ki du na gunde.

²¹Mi naruga ro ku bangiri Mbori na Kristo Yesu na siasia amaraika, mo ká kuti agi apai re ni soki te, ka mo mángi nga pai ni kpara aboro wa sa ya.

²²Ka mo moi nga bero ri boro nisia ni tipa sunge ni ipo ya, ka mo kódi nga tiro na ga kura aboro ingapai a ya; mo bánda tiro rogo wene sino.

²³Ka mo dú nga ni mbiriime sa ya, ono mo mbiri bete imekakue mbiko vuro yo wa mo awoka dedede.

²⁴Ga agu aboro ingaapai du gbayaga nandu sa sapangbanga; ga agu aboro akura kusa a.

²⁵Kina wo du gu wene mangaapai a gbayaga; na gu adu nga wo ya, i aoka nga ha kindi te.