Read zande 1 Timoteo 6 Bible Online

1 Timoteo 6 - zande bible

1 Timoteo 6

¹Agu yo dunduko du tii be ni akanga i bérẽ pa abaira yo ya i re na irisa dunduko, ka aboro gbérẽ nga ngbayo yo ti rimo Mbori na gako yugopai ya.

²Agu yo du abairayo ni aidipase, ka i páyasi nga yo mbiko wa du yo ni awirina ya; ono i mángi pa yo susi, bambiko agu yo nadia undahe, i nga aidipase du nyemuyo ti Gbia. Agi apai re mo yúgu he ni zungadi he.

³Si ngia boro yugu kura yugopai akia, aida nga pa ziazia apai, nga kina ga gaani Gbia Yesu Kristo apai, na gu yugopai du ku sangba sinombori yo ya.

⁴Ni naenda, ni aina nga pai wa sa te, ono ni nakaza mbiko asanahe na sakapai, nga gu kpihe nakura be he, na kpata, na gberãngba yo, na gbegberẽ berã,

⁵na gu ti kangu nga ga agu aboro nigberẽ rogo gayo berã ki zanga rengo, niberẽ he tigayo ya sinombori nga gene mosoro.

⁶Ono sinombori gb a kuti zereda nga bakere mosoro.

⁷Bambiko ani arima nga na he ku rogo gi zegino te re ka ani kuru nga na he koyo a te.

⁸Ono wa du ani na riahe na roko si rengbe fu rani.

⁹Ono agu yo nakpi nyemu ka kumuko i atiwa ku rogo asada na gbina na dungu mumungo gbegberẽ nyemuahe nga gu narindasi aboro ku rogo gbarasa yo yo na kpio.

¹⁰Bambiko nyemu marã nga tarã ngbatunga gbegberẽapai du; agu yo nakpi nyemu he wo i aingi ainga ti idapase, ki nirupu tiyo arupa ni dungu arungo.

¹¹Ono mo, ga Mbori boro, mo óro be agi apai re; ki nipeke fuo rurupai, sinombori, idapase, nyemuse, zadapase, zera.

¹²Mo só gu wene vura nga ga idapase, mo zádi nyenye unga, nga gu i ayambu ro sa ni, mo ki kusi wene kusapai ku bangiri dungu adezirehe.

¹³Mi rugu ro ku bangiri Mbori naungasi ahe dú, na ku bangiri Kristo Yesu nga gu ko nakusi gako pai wenengaĩ barangba Pondio Pirato;

¹⁴mo ká kuti rugute ki zanga sirõ, ki zanga gu pai ka i rugu ro kuti ni, dati ye gaani Gbia Yesu Kristo.

¹⁵Ko nga gu ko i ayúgo pa ko ti ragoko, ko du ni beedi ko ni bangisa Bazogo, Bakindo ri abakindo, Gbia ri agbia.

¹⁶Kina ko sa ka akpi nga ya, ninye rogo gu imarago ka boro ambeda nga na ni ya; nga gu ko boro ata bi nga ko ya, ka i abi nga ko a te. Irisa dú fu ko na tandu nye anye kindi. Amina.

¹⁷Mo nirúgu agu aboro aruga nakumuko rogo gi zegino re, ka i énde nga ya, ka i moi nga bangiriyo ti ũkumuko wa si nago ni ipo a ya, ono koyo du Mbori ni nafu ahe fu rani u au ani ngi mbiko ho.

¹⁸I mángi gu pai ngba angba, i kúmuko na wene mangaapai, i só gima fu he, rago ki ngba angba ti yo sa fuka ha.

¹⁹I naiga wene nyanyaki he fu kina yo sa gu rago nikaye yo, i nye anye na gu unga nga ndikidi unga.

²⁰Ako Timoteo, mo bánda gu he i afu foro, ki guari pati gu kungba fura bau na kangu i aya ti ni ni zire, inahe;

²¹si du agu yo ata ida ha niingi ti gene idapase. Undahe dú na oni. Amina.