Read zande 2 Timoteo 1 Bible Online

2 Timoteo 1 - zande bible

2 Timoteo 1

¹Pauro nga ga Kristo Yesu mokedi mbiko gu pai Mbori akpi nyemu he, ku sangba gu kidohe yo nga ga gu unga du rogo Kristo Yesu yo,

²Fu Timoteo nga wire du nyemuko ti re gbe: Undahe dú foro, na inapai, na zereda, be Mbori nga Ba na Kristo Yesu gaani Gbia.

³Mi natambua Mbori, nga gu ko mangi mi pa ko wa atitare ni ziazia sangba kpotore yo, ki tingidi pa ro kindi rogo gi kpe yo yuru na uru.

⁴Wa mi natingida pa gamo aume, mi ki nikpi nyemu ka bi ro gbe, mi hiki na ngbarago.

⁵I atingidi pa gu ndikidi idapase fere du rogo ro yo, nadu rogo titaro mbata nga Roi, na namo a nga Eunike; mi ini he si du rogo ro yo a.

⁶Mbiko gu pai re mi natingida pai foro mo utudi gu ga Mbori gamunihe nadu rogo ro yo mbiko maa mi bere ti ro.

⁷Bambiko Mbori afu nga toro gunde fu rani te; ono gu nga ga ome na nyemuse na rugatinapai.

⁸Were ka zee mángi nga ro mbiko dezire gaani Gbia ya, na mbiko re nga gako kisikisi boro a ya. Ono mo hí pai ahi gbe rogo wene pangbanga yo ku sangba ga Mbori ome yo.

⁹Ko nabatasi rani, ki yambu rani ni ziazia yambahe, ku sangba gaani mangapai yo te, ono ku sangba gu he yo ko akpi nyemu he tigako na undahe, nga gu i afu fu rani rogo Kristo Yesu yo mbata rago nikaenga.

¹⁰Ono i ayugu he awere rogo ye Batasirani Yesu Kristo, nga gu ko nagbarasi Kpio, ki niye na unga ku imarago yo na zanga zirã rogo wene pangbanga yo,

¹¹nga gu i aasia paha fere mi du ni batungusi paha, ni mokedi, ni bayugupai a.

¹²Mbiko gu pai re mi nahi agi apai re a, ono zee amanga nga re te; bambiko mi ini gu ko idi mi pa ko, mi ini he aina ni rengo ya ko rengbe na banda gu he mi afu fu ko kuti gu rago re.

¹³Mo ká kuti kpia gu wene apai, mo agi ngbare, ni idapase na nyemuse du rogo Kristo Yesu yo.

¹⁴Gu wene he i afu foro mo bánda ha rogo Ziazia Toro yo nanye rogo rani yo.

¹⁵Mo ini gere, ya agu yo du Asia yo i aguari pati re du; dagba yo yo du Fugero ni na Erumonege.

¹⁶Gbia ini pai fu ga Onesiforo aborokporo; bambiko ko aungasi re dedede, zee amanga nga ko mbiko gimi azogbo te.

¹⁷Ono, ho ko adu ni Roma yo, ko agbata re sirisiri, ki bi re.

¹⁸Gbia idi he fu ko ko bi ga Gbia inapai rogo gu rago re. Mo ini he wenengaĩ gbe wa Onesiforo amangi pa re Efesa yo, ni dungu ahe.