Read zande 2 Timoteo 3 Bible Online

2 Timoteo 3 - zande bible

2 Timoteo 3

¹Mo ini gere a, ya rogo kusa rago gbegberẽ rago ayé.

²Bambiko aboro akpi kina nyemu tiyo, ki du ni airakpinyemumarã, airaruka, airarekangose, agberẽngba yo, abasasangba avunguyo, atambua nga he ya, airazanga ziaziapai,

³airasakparakpa, aguaurundika, airasoapai, airazanga rugatise, airaerã, akpi nga nyemu wenepai ya,

⁴airabiriki, airanyakari, airaabiatise, i akpi nyemu sangba borose susi nyemu Mbori;

⁵ki nika kuti kpia sinombori, ono i ati kangu tanduhe. Oni kpára tironi ti agi yo re a.

⁶Bambiko i nga agu yo narima ku dimo yo, ki zi gu mumungo ade naba guta ingapai ku ri yo, i dungu gbegberẽ nyemuahe agbefa yo,

⁷i nake na wirikapai, ka i ada nga ti gu inahe nga ga rengo ya.

⁸A wa aYane na Yamabure ati kangu na Mose, kina wo agi yo re nati kangu na rengo a; aboro zirĩberã, nigberẽ tipa idapase.

⁹Ono i andú nga ku mbata yo te; mbiko gayo mungo adu ku bangiri aboro dũ, wa ga Yane na ga Yamabure aima du a.

¹⁰Ono mo apeke gi yugopai, gi mangapai, gu pai mi napeka, idapase, gbanga hipai, nyemuse, zadapai,

¹¹rungosi, egerã; agu apai naye sa re Andiokia yo, na Ikonio yo, a Rusetura yo; wa mi aru nyanyaki rogo ho. Gbia ki batasi re rogo agi apai re dunduko.

¹²Ii, i arungosi agu yo dunduko ka kpi nyemu ka ka kuti sino Mbori wa du yo ni ungayo rogo Kristo Yesu yo a.

¹³Ono gbegberẽ aboro agbérã agberã ki susi na airanangahe a, ki ninangi aboro, aboro ki ninangi yo a.

¹⁴Ono mo nyé rogo agu apai mo awiriki ki ini he ni rengo, niini agu aboro mo awiriki he be yo;

¹⁵ho mo adu ni ni gude, mo atona ina gu Ziazia Kekeapai rengbe na fu tatamana foro sa bata, mbiko gu idapase du rogo Kristo Yesu yo.

¹⁶Ziazia Kekeapai dunduko si aye be ga Mbori Toro si ki rengbe tipa yugopai, tipa zapai, tipa ruga aboro, na tipa raba aboro rogo rurupai;

¹⁷ya ga Mbori boro du ziazia, aũ manga wene apai dunduko ki du be ni.