Read zande 2 Timoteo 4 Bible Online

2 Timoteo 4 - zande bible

2 Timoteo 4

¹Mi naruga ro ku bangiri Mbori, na Kristo Yesu a, nga gu ko nikasapa ngbanga unga aboro na kangba aboro a, na mbiko pa yugo ko tiko na gako ngbi;

²mo nitungusi pai; mo ké na ni, ho du ragoho ni na ho adu nga ragoho ni ya, mo yúgu gopai, ki nirugu yo, nizungadi yo, ni gbanga hipai na yugopai dunduko.

³Bambiko ragoho nikada ho i ka aida nga pa ziazia yugopai ni ya; ono wa du tuyo ni kperengekperenge he i adungura abayugupai tigayo ku sangba gayo nyemuhe yo.

⁴I asá tuyo ti rengo, ki nidege tuyo sa kungba gumbagumba apai.

⁵Ono mo dú na rugatise rogo apai dunduko, ki nihi pai ahi gbe, mo mángi sunge batungusipai, mo dígisi ga mangaapai.

⁶Bambiko i nikatumo na mi awere, rago gi gate da.

⁷Mi so gu vura nga wene he, mi digisi gi sunge, mi ka kuti idapase;

⁸si du moi yo kpakpari rurupai ti ni fere, nga gu Gbia nga ruru basapungbanga ka fu he fere ni gu rago re; fu kina re sa te, ono fu agu yo dunduko nakpi nyemu yugo ko tiko.

⁹Mo ípisi tiro ka ye kono du mi ni mbembedi.

¹⁰Bambiko Dema aguari pati re, nikpi nyemu gi zegino re, ki nindu ku Tesaronika yo, Kuresekene ku Garatia yo, Tito ku Darumatia yo.

¹¹Kina Ruka du na mi. Mo di Marako ki ye na ko, bambiko ko rengbe na unda re na gi sunge.

¹²Ono mi akedi Tukiko ku Efesa yo.

¹³Gu gbanga roko mi ahe he Turoa yo be Karupo mo yé na ni ho mo ka ye ni, na akitabu, na kpewaraga susi.

¹⁴Aresanduro, batamarã atara amangi re ni gbegberẽpai gbe. Gbia afú mosoro fu ko rengbe na gako mangapai.

¹⁵Mo bánda tiro be ko a; bambiko ko azadi pa ti kangu gaani apai gbe.

¹⁶Rago gi bambata sapangbanga a nga boro sa nadu fere te, i aguari pati re dunduko. Ka i gédi nga ha kuti yo ya.

¹⁷Ono Gbia naru pati re ki nyakasi re; ya mi taki pande tungusapai sirisiri, aGendiria gi he dunduko. I abatasi re be ngba bahũ.

¹⁸Gbia akusa re be gbegberẽ mangapai dũ, ki batasi re sa gako ngbi du ngbangbaturũ yo: taarimo dú fu ko nye anye kindi. Amina.

¹⁹Mi sanango Puriseka na Akuira, na ga Onesiforo aborokporo.

²⁰Eraseto anye Korinda yo, ono mi ahe Turofimo Mireto yo na kaza.

²¹Mo ípisi tiro ka ye mbata fu na Rina a Kuraudia, na awirina dunduko, rago zere. Euburo sanango ro, na Pudendo,

²²Gbia dú na tororo. Undahe dú foro.