Read zande Tito 1 Bible Online

Tito 1 - zande bible

Tito 1

¹Pauro, ga Mbori moyambu, nga ga Yesu Kristo mokedi, ku sangba gu idapase yo nga ga ga Mbori siasia aboro, na gu ina pa rengo du ku sangba sinombori yo,

²nimoi bangirise tipa nyenye unga, nga gu Mbori, arengba nga na re zire ya, akido pa ha mbata rago nikaenga;

³ono ko akusi gako pai ni kina gu rago angba ti ko rogo tungusapai yo, nga gu i afu ku be re ku sangba gu rugute yo nga ga Mbori Batasirani;

⁴Fu Tito, nga ndikidi wire ngbafuo gani idapase du sa: Undahe na zereda be Mbori na Kristo Yesu Batasirani.

⁵Mbiko gi pai re mi ahe ro Kurete yo, ya mo mbákadi agu apai nakpa, ki moi abaakumba rogo akanisa rogo abaakporo yo dũ, a wa mi aasia pa ha foro.

⁶Si rengbe bakumba zanga pai ti rimoni, nga kumba ku bangisa de, du na awirini ni aidipase, naamanga nga gbarakagbaraka pai na ruguzuruguzu he a ya.

⁷Bambiko babipai ka zanga pai ti rimoni wa du ni ni ga Mbori babandarago; ka ni du nga na nyakari ya, aipo nga ka zinga ya, akpika nga pai mbiko buda ya, adu nga ni bataboro ya, aura nga tipa marã ya.

⁸Ono ni du ni weneringi ni, nikpi nyemu agu aboro ngba angba, ni irarugatise, ni ruru ni, ziazia, ni iraruga gu nyemuhe du kpoto yo;

⁹nika kuti gu irarengo pai dũ ku sangba gu i ayugu ho yo, ya ni rengbe ka zúngadi boro ni ruru yugopai ki niyugu gopai fu agu yo nati kangu.

¹⁰Bambiko dungu airabau du ho, nga agumba kungba pai na airanangahe, dagba agu aYudo naidi pase a gbe,

¹¹ngbayo ka du ni kisikisi he; nga agu aboro nagbarasa akporo na baha, niyugu agu apai aru nga fu yo ya, mbiko nyemu marã.

¹²Gu ni dagba yo, kina gayo nebi, aya, AKureto nga airazire dedede, gbegberẽ anya, nyomoronyomoro airaangbu.

¹³Gi dezire re rengo nga ha. Mbiko gere mo rugu yo nyanyaki, i du nzunzu rogo idapase yo,

¹⁴ka i agia nga ga aYudo sangbaturẽ, na gu rugute nga ga agu aboro nanyaga tiyo ti rengo ya.

¹⁵Agu yo du ziazia, apai du ni ziazia ha dunduko fu yo, ono agu yo du ni birikobiriko yo ki zanga idapase, a nga he sa ni ziazia ha fu yo te; ono gayo berã gbia kuti sangba kpotoyo yo si du ni birikobiriko ho.

¹⁶Ya yo auru ngbayo i ini Mbori; ono i naora rimoko ti gayo mangaapai, wa du yo ni airawasiro, keretu akeretu, ki ti ku sa yo ti ruru manga apai dunduko.