Read zande Tito 3 Bible Online

Tito 3 - zande bible

Tito 3

¹Mo tíngidi he fu yo ya i raki fu abazogo, fu agu yo asia yo pai fu yo, ki nigi sangba, ki du ni mbakadimbakadi yo tipa gu mangaapai ngba angba dunduko,

²ka i gúmba nga gbegberẽpai tipa boro wa sa ya, ka i dú nga ni akpiki pai ya, i dú yee, niyugu zera dunduko fu aboro du.

³Bambiko ani amungo a tigaani mbata, ki du ni keretukeretu rani ni nanginangi rani, ki nira fu ngbatunga gbegberẽ nyemuahe na agu apai nangba ti rani, nidu na wingba na ringo, ni airasogote, ki nisogo akuarani dagba rani.

⁴Ono ho gu weneringise akuru ni nga ga Mbori Batasirani, na gako nyemuse kono du aboro ni,

⁵a nga mbiko manga ruruapai, nga gu ani amangi tigaani te, ono ko abatasi rani ku sangba gako inapai yo, rogo gu zunda boro nga ga vovo vungu, na gu mbakadati nga ga Ziazia Toro.

⁶Mbori auka Ziazia Toro ku ri rani kpaima, rogo Yesu Kristo yo Batasirani;

⁷ya, wa di yo pai ri rani mbiko gako undane, i sa rani ni adikumbo gu maabangirise nga ga nyenye unga.

⁸Rengo nga gi pai re. Mi nakpi nyemu mo nigumba pa agi apai re zukazuka, ya agu yo idi pa Mbori i nifu tiyo sa manga agu apai ngba angba. Agi apai re si ngba nga gu ka aboro u be he.

⁹Ono mo né mumungo sakaapai, na ringbisa rimo angbatunga aboro, na kpika apai na darã kangu tipa rugute; mbiko si au nga te, si du gbua.

¹⁰Gu boro ka du ni irakparakparapai fuo ruga mo ni bara sa na ue mo ki mbu ni;

¹¹ni ini he ya ni nyaga tini ku sa yo, ki niingi pai, nisari ngbanga tini ni sa ni.

¹²Ho mi ka keda Arutema ni koyo du mo ni, watadu Tukiko, mo ki ke na pa ye fuo re ku Nikoporo yo; bambiko ya mi yo mi nikanye ni ti rago zere.

¹³Mo gási aZena nga bainiparugute na Aporo ti gayo nunguro wenengaĩ, ya ka zingohe mangi nga yo wa sa ya.

¹⁴Gaani aboro wiriki pa ka kuti manga wene asunge tipa agu ahe ka kpa, ya ka i zanga nga fuo sunge ya.

¹⁵Agu yo du na mi i sanango ro dunduko. Mo sánango agu yo du nyemu rani ti yo rogo idapase yo. Undahe dú na oni dunduko.