Read zande AEbere 1 Bible Online

AEbere 1 - zande bible

AEbere 1

¹Mbori nagumba pai bakuru yo fu aba ku ngba anebi ni dungu ngbatunga apai na ngba dungu gene apai,

²ko agumba pai fu rani ti digida agi arame re rogo Wiriko yo, gu ko ko aasia pa ahe dunduko fu ko, nga gu ko ko amangi zegino rogo ko yo;

³ono wa ko adu ni gu imarago nga ga gako taarimo, ki du ni ndikidi kpiako, ki nisongodi ahe dunduko ku ari ni gu pai nga gako tandu, fuo manga ko gu pai nga girisa ingaapai, ko ki sungu ku kumbabe Bahe du ari yo.

⁴Ko ki ngba susi amaraika, mbiko dia ko wene rimo susi gayo.

⁵Bambiko gini maraika i agumba ha fu ni ni gu rago ki ya, “Mo nga Wire, vungu mi ro ni kina gi uru re”? Na berewe, “Mi adú fu ko ni Ba, ko ki du fere ni Wiri”?

⁶Na berewe ho ko akedi bambata wiriko ni ku zegino ko aya, “Agu amaraika nga ga Mbori yo, i írisi ko dunduko.”

⁷Ko ki ya tipa amaraika, “Ko nasa gako amaraika i du ni ayuge, na gako amoyambu i du wa mirã we.”

⁸Ono ko aya tipa Wiriko, “Ako Mbori, ga mbatabakindo si anyé anye kindi, gu ngbondo rurupai si nga gu ngbondo nga ga ga ngbi.

⁹Mo akpi nyemu rurupai, ki nisogo irairapai; si du Mbori nga gamo Mbori ambedi ro ti ni ni gu nzeme nga ga wasa susi akuaro.”

¹⁰Berewe, “Mo du Gbia, namoi mburu kpotosende ho rago aenge ni, angbangbaturũ nga gu mangapai nga ga bero,

¹¹si agó ago dunduko, ono nye mo anye kindi, si akpátaka dunduko wa remu nakpataka,

¹²mo amína ha amina wa gbanga remu, wa kina remu, si ki du akia. Ono mo a wa mo adu mbata, digida garãro ti ni te.”

¹³Ono gini maraika ko aya fu ni ni gu rago, “Mo súngu pati kumbabere, daho mi ka sa avuraro ni ni gbada nduro”?

¹⁴I nga agu atoro du ni amoyambu, du ni kedikedi yo ka manga pa agu yo nikadia ũkumbo bata te?