Read zande AEbere 10 Bible Online

AEbere 10 - zande bible

AEbere 10

¹Bambiko rugute wa du he na kirima gu wene apai nikaye, angia nga ndik idi kpiaha ya, ka i arengba nga na sa yo ni ziazia yo ya, nga agu yo nambeda na ni ni agi amotumo re i anatumo na ni na agarã, nga gu i atumo na ni dedede.

²Ka si adu nga wo ya ka i ahe nga tumo na ni te, ka si du wa i aima girisa airisimbori, sangba kpotoyo yo ayugo nga ingaapai fu yo berewe te.

³Ono rogo agu amotumo re i anatingida pa ingaapai ni na garã.

⁴Bambiko kure abaabagara na ameme arengba nga na dia ingaapai ku sa yo te.

⁵Si du Kristo aya ti ni, ho ko aye ni ku zegino, “Motumo na gamunihe mo akpi nga nyemu he te, ono mo ambakadi boroboro tipa re;

⁶rago angba nga ti ro mbiko zozo amotumo du na baha, na amotumo tipa ingaapai te.

⁷Mi ki ya, ‘Ako Mbori, mo ngére, mi ye, ka manga sangbaro’ wa i ake pa re waraga yo.”

⁸Ko agumba ha mbata ki ya, “Amotumo na agamunihe, na zozo amotumo du na baha, na amotumo tipa ingaapai mo akpi nga nyemu he te, rago angba nga ti ro mbiko ho a te,” ka i vura tumo na agi ahe re wa du pa rugute.

⁹Fuo ho ko ki ya, “Mo ngére, mi ye ka manga sangbaro.” Ko nadia bambata ha ku sa yo, ka nyakasa gu ue he.

¹⁰Rogo gu sangba re i aima sa rani ni ziazia rani bambiko fu boro Yesu Kristo ni motumo bara sa kindi.

¹¹Were, aboromotumo dunduko i naru na uru nimangi pai ni rengo ki nitumo ti dungu arago na kina agu amotumo sa re, nga gu arengba nga na dia ingaapai ku sa yo ya.

¹²Ono ko, fuo tumo ko ni motumo tipa ingaapai bara sa kindi, ko ki sungu pati kumbabe Mbori.

¹³Tona ti gu rago re ko nangera daho i ka manga avurako ni ni gbada nduko.

¹⁴Bambiko ko asa yo mbiko motumo sa ni teketeke yo nga agu yo du ni ziazia yo.

¹⁵Kina wo du Ziazia Toro a ni dezire fu rani; bambiko fuo gumba ko,

¹⁶“Gere nga gu ndika mi ka rú he fu yo fuo gu rago re, ya Yekova: Mi amáa gimi arugute ku ngbaduyo yo, mi ki ke he ku rogo gayo aberã,” ko ki ya tie,

¹⁷“Gayo ingaapai na gayo irairaapai mi atingida nga paha berewe te.”

¹⁸Were, ho du vuboro ni ti agi apai re, motumo tipa ingaapai adu nga berewe te.

¹⁹Wa du wo du he awirina, ani du na ngarã tigaani tipa rima ku rogo ziazia ba mbiko kure Yesu,

²⁰mbiko gu gene ko ambakadi he tipa rani, nga vovo gene nga ungaha a, rogo remu dada rago, i nagumba ha tipa boroko.

²¹Na wa du bakere boromotumo be rani ri gu bambu nga ga Mbori;

²²ani mbédi ni ruru kpotorani yo nihiki be idapase, ngbadurani ki du ni migidimigidi he be gbegberẽ sangba kpoto yo, bororani ki du ni zunduzundu he be gigiri ime.

²³Ani ká kuti gu kusapai nga ga gaani maabangirise, ka si wo nga ya; bambiko gu ko nakido he, ko nga irarengo.

²⁴Ani bérẽ pa akuarani ka nyakasa yo kuti nyemuse na wene mangaapai.

²⁵Ka ani hé nga dungura tirani na akuarani, wa du sino agu yo ya, ono ani rúgu akuarani aruga; ki nimangi he susi, wa bi oni he ya gu uru re si nambeda.

²⁶Bambiko ka ani ingi pai ni nyemu he fuo dia ani gu inahe nga ga rengo ku gume, kura motumo du nga ho tipa ingaapai berewe te,

²⁷ono kina gu ngera ku mbata yo tipa sapangbanga du na bakere gunde ti ni, na gu bakere faa we nga gu nikarita avura.

²⁸Gu boro nabasa ga Mose rugute ni akpi ku ngba adezire ue watadu biata, ka nungani amanga nga ya.

²⁹Ya oni tigaoni, gini bakere mbusa susi gure, i ka ya si rengbe fu gu ni nasimbi Wiri Mbori ni nduni, ki niringbisi gu kure nga ga ndika, nga gu ni adu ni ziazia ni be he, wa kina kungba he, ki nirungosi gu Toro nga ga undahe gbegberẽ?

³⁰Bambiko ani ini gu ko naya, “Pa ira bape nga gimi, mi atumo ho.” Na berewe, “Gbia asápa ngbanga gako boro.”

³¹Ti ku be unga Mbori si nga úgunde gbe.

³²Ono oni báki bangironi ka tingida pa gu rago nadu mbata, rogo ho, fuo hasa yo rago fu roni, oni ki hi bakere vura ni aima.

³³Ni gu rago oni adu ni yuguyugu roni gbayaga rogo gbarasarimo na arungosi; ni gu rago oni ki idi ka sunga na agu yo i amangi yo a wo.

³⁴Bambiko nunga agu yo amangi roni nadu ni zizi yo, oni ki du na ngbarago ho i agbu gaoni ahe ni, wa ini oni he ya oni na wene ahe be roni susi gure nga nyenye he.

³⁵Si du ka oni abá nga gaoni ngarã ti ni ku sa yo, nga gu nikaye na bakere mosoro fu roni ya.

³⁶Bambiko si rengbe oni du na hipai, ya, fuo manga oni sangba Mbori, oni ki di gu mosoro i akido roni tipa ha.

³⁷“Bambiko rago koyo ngbutuko, gu ko nikaye ki ye, ko aima nga kindi te;

³⁸ono gimi ruru ko ko ará mbiko idapase, ono ka ko karaga tiko ku sa yo, rago angba nga ti mbisimore fu ko te.”

³⁹Ono a nga ani dagba agu yo yo nakaraga tiyo ku sa yo ku rogo kpio yo te; ono ani dagba agu yo yo du na idapase ti yo tipa batasa mbisimo.