Read zande AEbere 12 Bible Online

AEbere 12 - zande bible

AEbere 12

¹Si du ani tigaani a, wa bi ani he ya adezire du pati rani kirikiri ni ngenge yo wa ndurõ, ani mói rõrõi he ku sa yo dunduko, na gu ingapai ninaye dedede ka manga rani, ani ki oro gu oto du fu rani ku mbata yo kindi,

²ningere koyo du Yesu ni, nga gu ko du ni baenge gaani idapase, du ni badigisi he a, nga gu ko nahi pa wagiwagi ngua mbiko gu ngbarago nadu fu ko ku mbata yo, ki basa pa gaha zee, ki ima sunga pati kumbabe gu mbata nga ga Mbori.

³Were oni mákia pako wenengaĩ nga gu ko nahi pa gu gumbarimo nga ga aboro ingapai kuti ko, oni ka du na mbugo tigaoni, ki nirungbura rogo gaoni aberã.

⁴Oni ata ka nga fu ingapai, nita kpata na ni dati kure te.

⁵Bangironi go a ti gu rugapai, i asaki he na oni wa fu awiri?― “Wire, ka mo bérẽ nga pa gu rugapai nga ga Gbia ni toni he ya, ka he máki nga ro ho ko naruga ro ni a ya.

⁶Bambiko Gbia naruga gu boro ko akpi nyemu ni, ki nitaki agu awiriko ko arogo yo ku gume dunduko.”

⁷Oni nahi apai mbiko rugapai; Mbori namanga pai na oni wa awiriko; bambiko gini wiri ka du ho ka bani aruga nga ni ya?

⁸Ono ka oni adu nga na rugapai, nga gu pai i akparaka ha fu aboro dũ ya, oni nga awiri tii nvuo, nga ndikidi awiri kporo nga oni te.

⁹Kura pai nga, ani adu na abarani rogo pa borose yo ka ruga rani, ani ki niirisi yo, ka ani du nga ni zogozogo rani fu gu Barani nga ga tororani susi gure, ki du ni ungarani, te?

¹⁰Bambiko i arugu rani ni rengo tipa bete rago wa si angba ti yo; ono ko wa ngba ha tipa rani, ya ani du ni adi gako ziazia pai.

¹¹Rugapai dunduko ni gu rago i aruga ha, si awira nga ngbarago te, ono kina rungo, ono ku mbata yo si afu zuzu zereda fu agu yo nanyakasi tiyo na ni, nga gu zuzuhe nga ga rurupai.

¹²Wa du he were tie oni túmba agu abe ku ari naazorã ku sende, na agu arukusue anyaka nga ya;

¹³ki nimbakadi ruru agene tipa nduroni, ya agu yo nagbarã ka i aria nga yo ti gene ya, ono husa yo ngba.

¹⁴Oni péke fuo zereda na aboro dunduko, na fuo gu ziazia pai, ka boro zanga ha ni bi nga Gbia wa sa te.

¹⁵Oni ningére wenengaĩ boro ka ti bungudu ti gu undahe nga ga Mbori; tarã nirãnirã pai ka kura ki fudi roni, si ki gbarasi dungu aboro;

¹⁶boro ka du ni irabari, watadu ni irabasapai, wa Esau, nga gu ko nabagi gako ũkumbo tipa riahe rengbe na ri he bara sa.

¹⁷Bambiko oni ini he ya ho ko akpi nyemu ka dia gako maku ni giza, i ki gindiga ko bambiko ko abi nga ba saberã te, wa ko avura gbata ha ni aume kakaka vurũ.

¹⁸Bambiko oni aye nga koyo du gu bagangara ni ka boro zadi he, nga gu nagbi be we, na koyo du birarago ni, na bitimo, na gugugu yuge,

¹⁹na woro mbanya, na woro fugo, te; nga gu woro fugo agu yo agi he i ki kpari ya ka i gumba nga pai fu yo berewe ya.

²⁰Bambiko i arengba nga nahi gu pai i arũ ndika ha te, wa, “Ka kina nya zadi bagangara, i sopo ru asopa na ambia.”

²¹Gu pai i abi si airiwo bakere, wa kina Mose aya, “Mi du na gunde susi ki nikio.”

²²Ono oni ye koyo du gu bagangara ni nga Siona, na koyo du gu bakporo ni nga ga gu Mbori du ni ungako, koyo du gu Yerusarema ni nga ga ngbangbaturũ,

²³na koyo du agu arimbasa amaraika ni ka boro ageda nga yo ya, na koyo du gu dungurati ni nga ga bambata avungu dunduko, du rimoyo ni keke he ngbangbaturũ yo, na koyo du gu Mbori ni nga Basapungbanga aboro dunduko, na koyo du atoro agu aboro ni i aziasi yo,

²⁴na koyo du Yesu ni nga azarõ tipa vovo ndika, na koyo du gu kure ni i namigida ha, nga gu nagumba pai ni wene he susi gu kure nga ga Ebere.

²⁵Oni ngére ya ka oni basa nga sangba gu ko nagumba pai ya. Bambiko ho i abasa sangba gu ko ni naruga yo auru kpoto sende, i abata nga te, gaani susi gure, ka ani kpara ti gu ko naruga rani ngbangbaturũ yo, ani abáta nga a te.

²⁶Fugoko awo ti kpotosende, ono awere ko akido he, niya, “Bara sa berewe mi amanga nga kina kpotosende sa si zigizo te, ono ngbangbaturũ a.”

²⁷Na gi pai re nga, “bara sa berewe,” si nayugo dia agu ahe ku sa yo i ka zigizo ho, wa du mangimangi ahe, ya agu ahe i azigizo nga ha ya si ki nye.

²⁸Wa du he were, wa ani nadia gu ngbi ku gume i arengba nga na wo ti ni ya, ani dú na undahe, mbiko ho ani ki rengbe na tumo na mangapase nga gu ngba gbe fu Mbori, ni umbasiti na gunde:

²⁹bambiko gaani Mbori nga we nanyasa rago.