Read zande AEbere 13 Bible Online

AEbere 13 - zande bible

AEbere 13

¹Nyemu awirina nye dagba roni.

²Ka bangironi gó nga tipa yugo nyemuse fu agu aboro naye koyo du oni ni ya; bambiko be gi pai re agu yo arogo amaraika ku gume, ka i aina nga ha ya.

³Oni tíngidi pa agi yo du ni vodivodi yo, ki du wa ka oni du ni vodivodi roni na yo; na agu yo i namanga yo gbegberẽ, wa du oni tigaoni rogo gi zegino re wa kina yo.

⁴Rogatise du ni irisiirisi pai dagba roni dunduko, na barame ka si du nga na birikobiriko pai ti ni ya, bambiko airameteka na airabari Mbori asapa ngbanga yo asapa.

⁵Ka oni dú nga ni akanga fu nyemu mara ya; agu ahe du be roni si ki rengbe bangironi, bambiko ko aya tigako, “Mi ahe nga unda ro wa sa te, mi ambú nga ro a wa sa te.”

⁶Si du ani aerã ti ni wenengaĩ ki ya, “Gbia nga gimi mounda; mi agúnde nga wa sa te; gini pai boro ka manga re na ni?”

⁷Oni tíngidi pa agu yo adu ni abazogoroni, nagumba pa Mbori fu roni; oni mákia pa zuzu gayo sunge, ki wiriki pa gayo idapase.

⁸Yesu Kristo nadu gba a wa du ko areme, ii, kina wo ko ka du ku mbata yo nye anye kindi.

⁹Ka i rogo nga roni ku sa yo ni ngbatunga yugopai akia na gu nga ga kura aringara a ya; bambiko nyakasa ngbaduse na kina undahe ngba, na ariahe te, nga gu agu yo nata rogo ho ka si aunda nga yo ya.

¹⁰Ani na bamotumo be rani, arengba nga fu agu yo namanga pa bamburoko dungurati i ri he ti ni ya.

¹¹Bambiko kangba agu anya, gbiamotumo naye na kurera re ku rogo ziazia ba ni motumo tipa ingapai, i nazo ho ku sa yo ti bataya.

¹²Kina wo Yesu ahi pai tigako ku zegi yo ti ngbadimo bakporo, ya ko ziasi aboro ni kina kureko.

¹³Sidu tie ani kúru ku sa yo ti bataya fuo ko, niaka gu gbarasarimo nga gako.

¹⁴Bambiko nyenye bakporo be rani etere, ono ani nangera tipa gu bakporo nikaye.

¹⁵Si du tie ani tumo ni motumo tambuahe fu Mbori rogo ko yo dedede, gu zuzuhe nga ga ngbarani nakusa pa rimoko.

¹⁶Ka bangironi gó nga ti manga wene pai na fuka ahe ya; bambiko ngbatunga gi rúhe re, si ngba ti Mbori.

¹⁷Oni gí sangba gaoni abaakumba ki nira fu yo; bambiko i nangera tipa pa mbisimoroni, wa ka ringbisa pai tipa roni; ya i ka manga gere ni ngbarago, ni rungo te: bambiko ka gi ngba nga fu roni te re.

¹⁸Oni kpári tipa rani, bambiko ya ani tigaani ani na wene sangba kpoto yo, nikpi nyemu ka sunga na rurupai rogo apai dunduko.

¹⁹Mi ki rugu roni susi tipa manga gere, ya i karaga re koyo du oni ni mbembedi awere.

²⁰Awere Mbori zereda, nga gu ko nakusi gu bakere babanda akandoro rogo kpio yo ni gu kure nga ga nyenye ndika, nga kina gaani Gbia Yesu,

²¹ko sa roni ziazia tipa manga sangbako rogo wene apai yo dunduko, nimangi agu apai rogo roni yo ngba angba bangiriko, rogo Yesu Kristo yo; taarimo dú fu ko nye anye kindi. Amina.

²²Ono mi naruga roni, awirina, oni hi pa agu apai i naruga roni kuti ni, bambiko mi ke pai fu roni ni guru he.

²³Oni ini he ya i kusi Timoteo nga wirinarani bambukisa yo; ka ko ye awere, ani ki bi roni na Ko.

²⁴Oni sánango agu yo tipa re dunduko du ni gaoni abaakumba na ga Mbori ziazia aboro dunduko. Agu yo sanango roni du Itaria no.

²⁵Undahe dú fu roni dunduko Amina.