Read zande AEbere 2 Bible Online

AEbere 2 - zande bible

AEbere 2

¹Si du ani ka fu berãpase ti ni kakaka susi tipa agi apai i agi he re, rago ka da ani ki bitikpa pati he.

²Bambiko ka gu pai dũ ni nyanyaki he i agumba ku ngba amaraika, ingapai ki zi mosoro dunduko na basapai ni ruru he rengbe na ni;

³ka ani he bata ni bakere he wa gere, ani awira pa bata wãi? Nga gu i aima gumba paha mbata ku ngba Gbia, si ki du ni nyakasinyakasi he fu rani ngba agu yo nagi he.

⁴Mbori ki du ni dezirehe na yo a, rogo agu apai i aina pai ti ni na iiriwo apai, na rogo dungu ngbatunga atandu, na rogo agu agamahe nga ga Ziazia Toro, wa ko akpi nyemu he tigako.

⁵Bambiko gu zegino nikadu nga gu ani nagumba paha, ko afu nga ha si du ni zogozogo ho fu amaraika te.

⁶Ono boro sa agumba pai rogo gu rago, ki ya, “Gini he nga boro, mo naberã pa ni? Watadu wiri boro, mo nandu ka bi ni?

⁷Mo asa ko ko du ni umba pa ko toni ti amaraika; mo amoi kpakpari irisa na taarimo ku riko yo, ki moi ko ri agu ahe bero amangi he,

⁸ki moi ahe dunduko ni zogozogo ho ku tii nduko yo.” Were wa ko afu ahe dunduko si du ni zogozogo ho fu ko, ko ahe nga he sa si he du ni zogozogo ho fu ko te. Ono awere ani ata bi nga ahe dunduko ni zogozogo ho fu ko te.

⁹Ono ani nabi gu ko i asa ko ni umba ko toni ti amaraika, nga Yesu, na kpakpari irisa riko yo na taarimo bambiko hi kpio, ya ko ka hia kpio tipa aboro dunduko be ga Mbori undahe.

¹⁰Bambiko si arengbe tipa gu ko, i amangi ahe dunduko tipa ko, ahe dunduko ki du mbiko ko, rago ye ko na dungu awiri tipa taarimo, ko sa gu barumbatayo nga ga gayo bata ni ziazia ko be aima.

¹¹Bambiko i ue nga gu ko naziasi yo na agu yo i naziasi yo i dunduko ki du sa. Mbiko gere zee amanga nga ko ti yamba yo ni awirina te,

¹²niya, “Mi atáka pande rimoro fu awirinami, mi abí bia taarimoro dagba rimbasa aboro yo.”

¹³Na berewe, “Mi amáa gi pai ku be ko,” na berewe, “Mo ngére, mi na agu agude Mbori afu yo fere.”

¹⁴Wa du wo du he ya agude mongo du na pasio na kure, ko ki du na ni a tigako wa kina yo; ya ko gbarasi gu ko rogo kpio yo, nadu na tandu kpio, nga bakitingbanga.

¹⁵Ko ki rengbe na batasa agu yo dunduko naara rogo ungayo ni zizi yo mbiko gunde kpio.

¹⁶Ni rengo ko adia nga ngbatunga amaraika ku gume te, ono ko adi ngbatunga Abarayama ku gume.

¹⁷Si du si arengbe ti ni fu ko ko du rogo apai dũ wa kina awirinako, ya ko rengbe na du ni gu gbiamotumo du na inapai na ngarã ti ni tipa agu apai nga ga Mbori, ka gbata ũmotumo tipa gu ingaapai nga ga aboro.

¹⁸Bambiko wa ko adu ni asadiasadi ko tigako ki hi apai be he, ko rengbe na unda agu yo du ni asadiasadi yo.