Read zande AEbere 4 Bible Online

AEbere 4 - zande bible

AEbere 4

¹Ani gúnde tie, rago ka da, wa i ahe kidohe tipa rima ku rogo gako ongoda yo, gu ni dagba roni ki wiri ni ti bungudu ti ni.

²Bambiko ani i aima tungusa wene pangbanga fu rani ni rengo, a wa yo, ono gu pai nga gia ha i akumuko nga be he te, bambiko ho i agi he ni i akpamia nga ha na idapase te.

³Bambiko ani nga agu yo naima ida paha ani narima ku rogo gu ongoda yo re; a wa ko agumba ki ya, “Wa mi azunga he ni gi zinga, ya ‘I aríma nga ku rogo gi ongoda yo te,’” i avura nyasa mangimangi ahe vurũ tona ti ho i amoi mburu zegino ni.

⁴Bambiko ko agumba pai rogo gu rago tipa saba uru were, “Mbori ki ongodi ti saba uru be gako asunge dunduko.”

⁵Na ti gi ba re ko aya berewe, “I aríma nga ku rogo gi ongoda yo te.”

⁶Si du wa ani nabi he ya i ahe pai tipa bete aboro i rimi ku rogo, ono agu yo i atungusi wene pangbanga fu yo mbata i arengba nga na rima ku rogo te mbiko basapai,

⁷berewe, ko akparaka uru sa, ki ya ku ngba Dawidi yo, fuo gbanga rago, “Areme,” wa i agumba ha mbata, “Si ngia oni agía fugoko areme, ka oni nyákasi nga kpotoroni yo ya.”

⁸Bambiko ka Yosua aima fu ongoda fu yo, ka Mbori agumba nga pa kura uru fuo ho te.

⁹Si du ongoda nga ga sabiti nasunguda ga Mbori aboro ti ni.

¹⁰Bambiko gu ni narimi ku rogo gani ongoda yo ni aima ongoda a tigani be gani mangaapai, a wa Mbori aongodi be gako.

¹¹Si du ani ka fu tirani ti ni nyanyaki ka rima ku rogo gu ongoda re, ka boro ti nga ku rogo kpia gu basapai re ya.

¹²Bambiko gu pai nga ga Mbori du na unga, ki du na tandu, ki du ni títí he susi abasape dunduko du na rindihe ue, si narú boro dati kparaka mbisimo na toro, na ngbazunga na nzeme meme, si ki ipi ka ina agu aberã nga ga ngbaduse na gaha nyemuhe.

¹³A nga boro sa he du ni kusikusi ni ku bangiriko te, ono apai dunduko du ni kundirihe ni zaza ha bangiri gu ko ani ka mbakada gaani apai fu ko.

¹⁴Wa du wo du he ya bakere gbiamotumo be rani, nga gu ko nasusi ku angbangbaturũ yo, Yesu nga Wiri Mbori, ani zádi gaani kusapase nyanyaki.

¹⁵Bambiko ani adu nga na gu gbiamotumo be rani arengba nga na rungo na ani tipa gaani rungbura ya, te; ono i aima asada ko rogo apai dunduko wa kina rani, ono ko adu nga na ingapai te.

¹⁶Si du tie ani gbisi mbembedi ni erã ku pati gu mbatabakindo nga ga undahe, ya ani di inapai, ki bi undahe si unda rani rogo rago zingo.