Read zande AEbere 6 Bible Online

AEbere 6 - zande bible

AEbere 6

¹Ani mbú gumba pai tie tipa bambata tonatona apai nga ga Kristo, ani súsi ku mbata yo dati du ani Ziazia; ka ani mói nga mburuhe nga saberã ti gu mangimangi he du ni kpikpi he, na idapase fu Mbori,

²na yugo pa abapatiza, na maabe ri, na zingabekpio, na nyenye sapangbanga berewe ya.

³Gere ani ka manga, ka Mbori idi he.

⁴Bambiko tipa agu yo i aima hasa rago fu yo i ki hia gu gamahe nga ga ngbangbaturũ, ki du ni adi Ziazia Toro,

⁵i ki hia gu wenepai nga ga Mbori, na agu atandu nga ga gu rago nikaye fuo ho, i ki ti ku sa yo,

⁶i arengba nga na sa yo ni vovo yo berewe sa saberã te; wa du he ya i tigayo nawagi Wiri Mbori berewe, ki kusi ko sa zee.

⁷Bambiko gu sende nambiri gu mai nana ku auru he ti dungu arago, ki kusi riahe rengbe tipa agu yo i asopo ho a tipa yo, si naroga maku be Mbori.

⁸Ono ka si akusi akiwe na angbangbaki, i ki mbu paha si ki mbedi ka du ni tiwatiwa ha; digida gaha pai ki ngia zokoda ha.

⁹Ono, amanguse, ani naberã wene pai tipa roni susi gere, nga agu apai nandu na bata, ka ani avura gumba pai wa gere vurũ.

¹⁰Bambiko Mbori ni iraira ko te. Bangiriko ago nga ti gaoni sunge te, na ti gu nyemuse oni ayugu ti rimoko, na ti gu pai oni amangi fu gako aboro, a wa oni namanga pa yo awere kindi.

¹¹Ani ki nikpi nyemu oni yugu ngbatunga gu ngarã re ni ba sa sa dati hika oni be maabangirise, dati kina digida rame,

¹²ya ka oni du nga na nyomoro ya, ono oni du ni awiriki agu yo du ni adikumbo akidohe mbiko idapase na hipai.

¹³Bambiko ho Mbori akido he ni fu Abarayama, wa ko arengba nga na zunga gu ko kii ti ko ya, ko ki zunga kina tiko,

¹⁴niya, “Mi afú maku foro ni rengo rogo maku, mi ki ngeesi ro angeesa rogo ngeesa ro.”

¹⁵Were fuo ima ko na hipai, ko ki zi kidohe.

¹⁶Bambiko aboro nazunga gu he kii susi, zungahe ki ngia yangara pai rogo gayo angbanga tipa nyakasa pai.

¹⁷Si du Mbori amoi zungahe ti ni ku ri he, wa ko aberẽ pa yugo gu pai fu adikumbo kidohe bakere susi, nga ka i sa nga sangbako te;

¹⁸ya ani nga agu yo naora sa bata ka zia gu maabangirise i amoi he barangba rani, ani du na nyanyaki úngarã mbiko ahe ue adu nga na satise ti ni ya, nga gu Mbori arengba nga na gumba zire rogo ho ya;

¹⁹gi du be rani re wa úzada mbisimo, nga maabangirise du ni nyanyaki he nganganga, si ki rimi ku rogo gu he du gii remu yo Yekaru yo;

²⁰yo Yesu arimi ku ho ni ni bandumbatayo fu rani, ki ima du ni gbiamotumo nye anye kindi dagba gu rika nga ga Marekisedeke.