Read zande AEbere 7 Bible Online

AEbere 7 - zande bible

AEbere 7

¹Were gi Marekisedeke re, bakindo Sarema, boromotumo nga ga Mbori nga Bahe, nagbia Abarayama ko niyega pati imo abakindo,

²ki fu maku fu ko, Abarayama ki kparaka sa dagba bawe rogo ahe dunduko fu ko. Rogo ringbisa paha Marekisedeke adu mbata ni Bakindo rurupai, fuo ho ko ki du ni Bakindo Sarema a, si wa ka i ya, Bakindo zereda.

³Ko adu nga na ba te, na na a te, na ngbatunga te, adu nga tonatona ragoko ya na digida ungako a ya, ono i amangi ko ko ki wiri Wiri Mbori, ko nanye ni boromotumo kindi.

⁴Were oni makia pa kia gi kumba re wa ko adu! Abarayama nga titarani afu sa dagba bawe dagba agu ahe i azi ti vura fu ko.

⁵Ni rengo agu yo dagba awiri Revi nazia pa du ni aboromotumo i du na rugute nga dia sa dagba bawe be aboro, nga be awirinayo, wa du pa rugute; i avura kura vuru Abarayama yo vurũ.

⁶Ono gu ko i ageda nga ngbatungako dagba yo ya, ko adi sa dagba bawe be Abarayama, ki nifu maku fu gu ko du na akidohe be ko.

⁷Ono ani ati nga kangu gu pai nga tiditidi boro nadia maku be gu ni ngba ti ni te.

⁸Agu yo nazia sa dagba bawe erẽ i nga kpikpi aboro; ono yo du gu ko ni nazi he, i ki du ni dezireko ya ko ni ungako

⁹Si ki du wa ka i ya, rogo Abarayama yo Revi afu sa dagba bawe tigako, nga gu ko ninadia sa dagba bawe;

¹⁰bambiko ho Marekisedeke agbia bako ni, ko adu kina vuru bako yo.

¹¹Were ka si ngia da ti sosonoho adu be gu rika aboromotumo nga ga Revi yo (bambiko tii he yo aboro adi rugute), gine ka zingo gu kura boromotumo adu ti ni naye dagba gu rika yo nga ga Marekisedeke, ka i ageda nga ni dagba gu rika nga ga Arona yo ya?

¹²Bambiko wa i asa rika boromotumo akia, si ki rengbe i sa rugute a.

¹³Bambiko gu ko i agumba agi apai tipa ko re, ko adu ni kura ngbatunga akia nga gu boro andu nga mbata dagba ha ku pati bamotumo, ka fu tini tipa ha ya.

¹⁴Bambiko si gbayaga ya gaani Gbia akuru Yuda yo; ono tipa gi ngbatunga re Mose agumba nga pa du ni aboromotumo te.

¹⁵Gi ani agumba re si ki du bangirise bakere gbe. Kura boromotumo naguari ni kpia Marekisedeke,

¹⁶nga gu ko i amanga nga ko wa du pa gu rugute nga ga borose rugute ya, ono wa du pa gu tandu nga ga gu unga naapayangaya.

¹⁷Bambiko dezireko nga gere. “Mo nga boromotumo nye anye kindi, wa du pa gu ngbatunga nga ga Marekisedeke.”

¹⁸Bambiko i nasa gu rugute ku sa yo nadu mbata mbiko pa gaha rungbura na pa gaha baura

¹⁹(bambiko rugute asa nga he ni ziazia ha te); ki ye na vovo maabangirise ku ba ha, nga gu ani nambeda na Mbori mbiko ho.

²⁰Na si azanga nga zungahe te.

²¹Bambiko i asa agu yo ni aboromotumo ni rengo zanga zungahe, ono ko ni kina zungahe be gu ko naya tipa ko, “Gbia azunga he ka ko asá nga pako ya, ‘Mo nga boromotumo nye anye kindi.’ ”

²²Wa kii gi pai re Yesu ki du ni ngbaanga tipa wene ndika susi gu ndika re.

²³Na agu aboromotumo re ange, bambiko i arengba nga ka nye ri gayo sunge te mbiko kpio.

²⁴Ono ko, wa nye ko anye kindi, ko du gu pa boromotumo be ko apaya nga ya.

²⁵Wa du wo du he ko rengbe a na batasa agu yo nambeda na Mbori mbiko ko, wa du he ya ko ni ungako kindi tipa kpara tipa yo.

²⁶Bambiko ngbatunga gbiamotumo wa ko rengbe tipa rani, du ni ziazia ko, adu nga na biriki ti ko ya, agberã nga a ya, du ni kparakpara ko ti aboro ingapai, ―i ki tumbasi ko ku ari ti angbangbaturũ;

²⁷nga gu ko zingo tumo na ũmotumo na uru tipa gako ingaapai ni bambata ha, fuo ho tipa ga aboro ingaapai, amanga nga ko, wa agi agbiamotumo re ya: bambiko ko amangi gere kina bara sa kindi, ho ko atumo ni ni tiko.

²⁸Bambiko rugute namaa agu aboro ni agbiamotumo, du na rungbura ti yo; ono gu pai nga ga zungahe, naye kusa fuo rugute si amoi Wiri, du ni ziazia ko nye anye kindi.