Read zande Yakoba 1 Bible Online

Yakoba 1 - zande bible

Yakoba 1

¹Yakoba nga ga Mbori moyambu, na ga Gbia Yesu Kristo moyambu a, nasanango gu rika aboro du bawe na ue du ni gbandakagbandaka yo.

²Awirinami, ho dungu ngbatunga asada ka ye ni fuo roni, oni ki sa ha ni kina ngbarago dũ;

³niini ya asada gaoni idapase namanga zadapase.

⁴Ono oni ídi fu zadapase si mangi gaha ziazia sunge, ya oni du ziazia na baroni, ka zingo he amanga nga roni ya.

⁵Ono ka zingo tatamana amanga gu ni dagba roni yo, ni sána Mbori, ninafu he gbe fu aboro dunduko, azinga nga fu boro ya; ko ki fu he afu fu ni.

⁶Ono ni sána he ni idapase, ka ni sáki nga pa ko ya; bambiko gu ni nasaka pai ni wiri gu ngiri baime, yuge nita danda ha nituka ha ku sa yo.

⁷Si du ka gu borore berẽ nga ha ya ni adia he be Gbia ya.

⁸Boro berãpai ue du, ni rungburarungbura ni rogo gani apai dunduko.

⁹Gu wirina du ni rungorungo ni ni ngí angi kpotoni yo mbiko ni aye ka du ni irisiirisi ni,

¹⁰na gu kumukokumuko ni ni ngí angi mbiko ni aye ka du ni umbasiumbasi ni. Mbiko wa mbumbuda nvuo nanyasa, kina wo ni ka nyasa.

¹¹Mbiko uru nadakpa nifoi rururu, ki niugusi nvuo; mbumbudaha ki nigboroka, gu wene he nangba bangirise si ki paya, kina wo kumukokumuko boro ka paya a rogo gani apai dũ.

¹²Maku du fu gu boro naru nyanyaki rogo asada, bambiko ho i ka bi gani pai ni si rengbe, i afú gu kpakpari unga fu ni, Gbia akido he tipa ha fu agu yo nakpi nyemu ko.

¹³Ka boro du ni asadiasadi ni, ka ni yá nga, “Mbori naasadare,” ya; bambiko ka i asadi nga Mbori na gbegberẽpai te, ko aasada nga boro tigako wa sa te.

¹⁴Ono boro du ni asadiasadi ni, ho gu nyemuhe ata gbe ni ni nga ga borose ku sa yo, ki ninangi ni.

¹⁵Gu nyemuhe nga ga borose, fuo du he na mobara, si ki vungu ingapai, ingapai ho da ha ni ti sosonoho, si ki kusi kpio.

¹⁶Abadiangbare, ka i nángi nga roni ya.

¹⁷Wene gamahe dunduko, na ziazia ũ gamahe dunduko i nagama ha, si naye ari yo du Ba ni, nga Bafu aimarago, adu nga na satise ti ko ya, na kirima satise a ya.

¹⁸Mbiko kina gako pai ko akusi rani ni gu pai nga rengo, ya ani du ni makawa dagba asabeko yo.

¹⁹Oni tingidi pa gere, abadiangbare. Ono aboro dunduko i ipisi tiyo ka gia pai, ki rõasi tiyo tipa gumba pai, ki rõasi tiyo tipa zinga a,

²⁰mbiko gu zinga nga ga boro si amanga nga gu rurupai nga ga Mbori te.

²¹Were oni mói agu ahe dunduko ku sa yo nabirikosi boro, na gu nga gbegberẽ he a. Oni ki di gu pai ku gume zezeredi nga gu Mbori naru ngbaduroni yo, rengbe na batasa mbisimoroni.

²²Ono oni dú ni amangipai, ka oni dú nga ni agipai gbua, ni nanga tironi ya.

²³Bambiko ka boro du ni gipai, ka ni adu nga ni mangipai ya, ni wiri kina gu kumba nangana kpakpuni rogo bitiroabi,

²⁴bambiko ni ngana tini, ki nindu, bangirini ki go ni ba sa ti gu ngbatunga boro nangia ni.

²⁵Ono gu ni nangana gu ziazia rugute nga ga raniri, ki nye rogo ho, ka ni adu nga ni gipai nahe tingida pai ya, ono ni du ni mangipai namanga ha, gi boro re i afu maku afu fu ni rogo gani manga sunge.

²⁶Ka boro yá dagba roni tigani wẽ, boro idapambori nga ni, ono ni aruga nga mirãni te ni ki ingisi ngbaduni, ga gi boro idapambori re, si ki du gbua.

²⁷Ziazia idapambori barangba gaani Mbori, Barani, nga gu agberã nga ya nga gere, nga ka ndu ka bi awirinyaure na adekurugbo rogo gayo rungo, ki nibanda tini be zegino, ka birikoho adu nga ti ni ya.