Read zande Yakoba 2 Bible Online

Yakoba 2 - zande bible

Yakoba 2

¹Awirinami, ka oni dú nga na gu idapase nga ga gaani Gbia Yesu Kristo, nga Gbia taarimo, nikpara aboro kuti pa kindigayo ya.

²Bambiko ka boro ye ku rogo gaoni bambutiria yo du na tongo dahabu, na wene roko ti ni, fuo gure rungorungo boro ki ye a na gbegberẽ roko;

³oni ki berẽ pa gu ni naukadi beedi roko, ki ya, “Mo yé ku erẽ ku rogo gi wene ba re;” oni ki ya fu rungorungo boro, “Mo rú koyo, watadu, mo súngu pati ndure.”

⁴Oni akpara rogo gaoni aberã yo, ki du ni agu abasapungbanga du na gbegberẽ aberã ti yo, te?

⁵Oni gí he, abadiangbare; a nga Mbori nasia agu aboro du ni rungorungo yo rogo pa zegino i du ni kumukokumuko yo rogo idapase yo, i rogo gu ngbi ni gayo a, ko akido pa ha fu agu yo nakpi nyemu ko, te?

⁶Ono oni awasi rungorungo boro. A nga kumukokumuko aboro namanga roni te? Nga kina yo nagbefa roni ku barangba ambata sapangbanga te?

⁷A nga i nagberã ngbayo yo kuti gu wene rimo i nayamba roni na ni te?

⁸Ono ka oni digisi ga bakindo rugute, wa du he ti Ziazia Kekeapai ya, “Mo kp í nyemu kuaro a wa mo akpi nyemu tiro,” oni mangi he wenengaĩ.

⁹Ono ka oni kpara aboro kuti pa kindigayo oni mangi gbigbitapai, rugute ki sapu he ya oni ingi ti rugute.

¹⁰Bambiko gu ni naka kuti rugute dunduko, ki koto ti gu sa, i gbarasi ngbanga fu ni ti ni dunduko.

¹¹Bambiko gu ko naya, “Ka mo mángi nga bari ya,” kina ko naya a, “Ka mo ími nga boro ya.” Si du ka mo amanga nga bari ya, ono mo imi boro, mo ki du ni gu boro ingi ti rugute.

¹²Oni gúmba pai, ki mangi he, wa kina agu yo i asapa ngbanga yo kuti gu rugute nga ga raniri.

¹³Bambiko gu ni ayugo nga inapai ya sapangbanga adu nga na inapai fu ni te; inapai nadia be sapangbanga.

¹⁴Gini mosoro du ti ni, awirinami, si ngia gu ni niya ni du na idapase, ono ka ni adu nga na mangaapai ti ni ya? ka idapase batasi ni?

¹⁵Were, ka wirina du ni kundirini, na zingo riahe na uru, watadu kumba na de,

¹⁶gu ni sa dagba roni yo ki ya fu yo, “Oni ndú zezeredi, ka oni dú nga na zere ya, oni mbíki,” ono ka oni afu nga gu he fu yo boro ara mbiko ho ya; gini undahe du ti ni?

¹⁷Kina wo idapase, ka si adu nga na maneaapai ti ni ya, si ni kpikpi he ni sa ha.

¹⁸Were, gu boro ya, “Mo du na idapase, mi du na mangaapai.” Mo yúgu he fere waĩ rengbe mo ka du na idapase nihe mangaapai koyo, mi ki yugu gi idapase foro rogo gi mangaapai yo.

¹⁹Mo idi ya Mbori du sa; mo mangi wenengaĩ; adaimona idi pa ha a, ki nikio.

²⁰Ono mumungo boro, mo nakpi nyemu ka ina ha ya, idapase he mangaapai koyo si gbua?

²¹Ati i asapu ngbanga fu Abarayama nga barani mbiko mangaapai, ho ko atumo ni ni Yisaka, nga wiriko, ri bamotumo?

²²Mo bi he ya idapase amangi he na gako mangaapai, idapase ki du ni ziazia ha be mangaapai.

²³Ziazia Kekeapai ki da ti rengo nga gu naya, “Abarayama aidi pa Mbori, Mbori aya ti ko ruru boro nga ko”; i ki ya ti ko badiangba Mbori.

²⁴Oni bi he ya i nasapa ngbanga fu boro mbiko mangaapai, mbiko idapase sa te.

²⁵Ati kina wo a i asapu ngbanga fu Raba nangia degbua mbiko mangaapai bambiko ri adi asunge ku gume, ki kedi yo ku zegi yo ngba kura gene akia?

²⁶Si du ka kpotose zanga toro si du ni kpikpi he, kina wo ka idapase zanga mangaapai si ki du ni kpikpi he a.