Read zande Yakoba 3 Bible Online

Yakoba 3 - zande bible

Yakoba 3

¹Awirinami, ka oni idi nga ka du ni abayugupai ni dungu roni ya, wa ini oni ya i asapa ngbanga abayugupai nyanyaki ti agu yo.

²Bambiko ani nakota dunduko rogo dungu apai. Ka boro akota nga rogo fugoni ya, ni du ni ziazia boro, rengbe na ruga kpotoni dunduko a.

³Ani namaa marãrugangba ku ngba afarasi yo, ya ami mangi sangbarani, ani ki nisa kpotora dunduko ku sa yo.

⁴Mo bí, abaakurungba a, wa vura du he ni bakere he susi, ki du ni dandidandi he be gugugu yuge, i nasa ha na gu he i naruga bakurungba na ni, du ni wiri toni he, ho barugu bakurungba nakpi nyemusindukuhoni.

⁵Kina wo a du mirãse ni toni pa boro, ki nigumba bakere apai ni enda. Mo bi, nga gu bakere ngua i naziga ha ni toni we!

⁶Were mirãse nga we. Zegino gbegberẽpai dagba aparani yo nga mirãse, nga gu nabirikosi kpotose dunduko, ki nitigi pa borose dunduko na we, ki du ni tigitigi he be Geyena.

⁷Ngbatunga agu anya dunduko du ni zogozogo ra be aboro na azire, na agu agbiro nagbe tira sande, na agu ra du baime yo, ami adu ni zogozogo ra mbata a.

⁸Ono mirãse, ka boro zogo nga ha te, si nga nvurãnvurã gbegberẽ he, ki nihi be gbegberẽ kere ngua.

⁹Ani natambua Gbia na ni nga Ba; ani ki nitiwa aboro na ni, nga agu yo i afu yo ni kpia Mbori,

¹⁰tambuahe na motiwa si nakura kina ngba yo sa. Awirinami, ru nga pai wo te.

¹¹Guga nafu nzinziri ime na hihii he a ti genehe sa?

¹²Awirinami, ka vurumo zu aeraya, bakakue a, ka si zu rindi vurumo? Kina wo a ka ime tikpo fu nga nzinziri ime te.

¹³Da du ni iratatamana, ni boro inahe dagba roni yo? Ni yúgu gani mangaapai rogo wene sinoni ni gu umbasiti nga ga tatamana.

¹⁴Ono ka ngia oni na kere kpiboro na kpata kpotoroni yo, ka oni támbua nga tironi ya, ka oni gúmba nga zire kuti rengo a ya.

¹⁵Gi tatamana re, si azorã nga ari yo te, si nga ũzegino, nga ũborose, nga ũdaimona.

¹⁶Bambiko ho du kpiboro ni na kpata, yo du gbarakagbaraka pai ni na ngbatunga gbigbitapai dunduko.

¹⁷Ono gu tatamana naye ari yo si du na wene sino mbata, fuo gure si du na zera, ki du yee, ki ipi na gia kpe, ki hi be inapai na wene zuzuhe, adu nga na kparaka aberã, i na biriki a ya.

¹⁸Zuzu rurupai du ni r ũrũ he rogo zereda fu agu yo namanga zereda.