Read zande Yakoba 4 Bible Online

Yakoba 4 - zande bible

Yakoba 4

¹Agu avura du dagba roni na akpata, si naye wari? Si naye yo du gu nyemuahe ni naso vura rogo aparoni yo te?

²Oni nakpi nyemu ahe gbe, ka si adu nga be roni ya; oni naimo boro, ki nikpi nyemu ahe gbe, ka oni arengba nga na dia ha ya: oni nata kpata ki niso vura; ka he adu nga be roni ya, bambiko oni asana nga he te.

³Oni nasana he tigu, ka si adu nga be roni ya, bambiko oni nasana gbegberẽ sana he, ya oni bagi he kina rogo gu pai bororoni akpi nyemu he.

⁴Ako adebari, oni aruga nga tironi na ni ya ngbanya na zegino si nga sogote fu Mbori, te? Si du gu ni ka kpi nyemu du ni badia zegino ni sa tini ni vura Mbori.

⁵Ya oni Ziazia Kekeapai nagumba pai gbua? “Mbori naberã pa tororani ni nyemuse ko amoi rogo rani yo”.

⁶Ono ko nafu kura undahe. Si du Ziazia Kekeapai agumba ha ti ni ya, “Mbori naka fu aboro rekangose, ki nifu undahe fu agu yo naumbasi tiyo.”

⁷Were oni fú tironi fu Mbori; ono oni ká fu bakitingbanga, ko ki oro be roni.

⁸Oni mbédi na Mbori, ko ki mbedi na oni. Oni gírisi beroni, oni nga aboro ingapai; oni mbákadi kpotoroni yo, oni nga aboro berãpai ue.

⁹Oni mbúsi tironi, oni rúngo, oni kpári. Oni ídi he i sa gaoni mongo ni rungo, na gaoni ngbarago ni mbugo.

¹⁰Oni úmbasi tironi barangba Gbia, ko akíisa roni.

¹¹Ka oni gúmba nga gbigbitapai kuti akuaroniya, awirina. Gu ni nagumba gbigbitapai kuti wirina, watadu sapa ngbanga wirinani, ni nagumba gbigbitapai kuti rugute, ki nisapu ngbanga rugute. Ono ka mo sapu ngbanga rugute, mangirugute nga mo te, ono mo nga basapungbanga.

¹²Bafurugute na basapungbanga du kina sa, nga gu ko rengbe tanduko na batasa he na gbarasa ha. Ono da nga mo nasapa ngbanga kuaro?

¹³Oni rú nga, agu roni naya, “Ani andú ku rogo gu bakporo watadu areme na gba, ki nye yo ti garã sa, ki nibagi ahe, ki nidungura ũkumuko.”

¹⁴Ono oni aina nga gu pai nikamanga gba te. Gine nga ungaroni? bambiko oni nga ndurõ, i nibi he ngbutuko, si ki gbandaka.

¹⁵Bambiko gi ka oni gumba re, “Ka Gbia idi he, ani ata du ni ungarani, ki nimangi gere na gure.”

¹⁶Ono awere oni natambua tironi rogo gaoni ruka. Ngbatunga gu tambuati re du ni gbegberẽ he dunduko.

¹⁷Gu ni ini ka manga wenepai, ka ni amanga nga ha ya, si nga gbegberẽpai fu ni.