Read zande Yakoba 5 Bible Online

Yakoba 5 - zande bible

Yakoba 5

¹Oni rú nga, airakumuko, oni kpári ni aume ki nikpari ku ari mbiko agu agberãngbi nikaye fuo roni.

²Gaoni ũkumuko zirĩ, ayawe riti gaoni aroko.

³Gbegbe zi gaoni dahabu na gaoni feda; gaha gbegbe nikadu ni dezire kuti roni, ki niri pasioroni wa we. Oni adungura ũkumuko rogo yangara arame.

⁴Oni bí, gu mosoro nga ga amangisunge nga agu yo nake gaoni aati, si nakpara, nga gu oni aka na ni be yo ni wia. Gu kpe nga ga agu yo nake he, si da tu Gbia yo, nga Iraarimbasa.

⁵Oni ara na kina ũkumuko rogo kpotosende, ki nipeke kina gu he bororoni akpi nyemu he; oni arigi ngbaduroni sa rago kpio.

⁶Oni agbarasi ngbanga fu ruru boro, ki imi ruru boro; ka ko aka nga fu roni ya.

⁷Were, oni hí pai, awirina, daho Gbia ka yega ni. Oni ngére, babandaati nasunguda wene zuzu kpotosende, ki nihi pai pati he gbe, daho bambata mai ka nada ha ni na yangara ha a.

⁸Oni hi pai a tigaoni; oni nyákasi ngbaduroni, bambiko rago yega Gbia nambeda.

⁹Awirina, ka oni kpákana nga he dagba roni ya, i ka sapa ngbanga roni. Oni ngére, basapungbanga naru ngbadimo.

¹⁰Awirinami, oni dí agu anebi nagumba pai ni rimo Gbia, ni gaoni kpia hipai na zadapai.

¹¹Oni bí, ya ani ti agu yo naru nyanyaki dati digida pai ya betedi aboro du. Oni agi pa gu zadapase nga ga Eyobo, oni ki bi waĩ Gbia amangi fu ko ti digidaha, wa du ko na bakere nunga ti ko, na bakere inapai.

¹²Ono ti apai dunduko, awirinami, ka oni zúnga nga he ya, kuti ngbangbaturũ yo ya, kuti kpotosende a ya, na kuti kura zunga he a ya. Ono gaoni ii, si dú ni kina ii, na gaoni oó, si dú ni kina oó; oni ka ti ku rogo sapangbanga.

¹³Gu ni du dagba roni yo nahi pai? Ni kpári kpe. Gu ni du na wasa? Ni bí bia tambuahe.

¹⁴Gu ni du dagba roni yo na kaza? Ni yámbu ga kanisa abaakumba i ki kpari auru ni, niuka nzeme ku auru ni ni rimo Gbia.

¹⁵Gu kpe nga ga idapase abátasa gu ni nakaza, Gbia atúmba ni ku ari; si ngia ni amangi ingaapai, i avú ni avu ti ni.

¹⁶Were gu ni kúsi gani ingaapai fu gu ni, gu ni fu gu ni, oni kpári tipa akuaroni, ya i husi roni. Gu nyanyaki kpe nga ga ruru boro du na bakere tandu.

¹⁷Eriya adu ni boro nihi dungu apai wa kina rani, ko akpari nyanyak: ya ka mai na nga ya; garã biata na diwi sita ka mai azia nga sende ya.

¹⁸Ko ki kpari berewe; ngbangbaturũ Ki fu mai, sende ki batika gaha zuzuhe.

¹⁹Awirinami, ka gu ni ingi dagba roni yo ti rengo, gu ni ki karaga ni,

²⁰ni ini he ya, gu ni ka karaga ingiingi boro ngba gani iraira gene ni ki batasi gu boro be kpio, i ki vu gu boro ti badungu ingaapai mbiko ni.