Read zande 1 Petero 2 Bible Online

1 Petero 2 - zande bible

1 Petero 2

¹Wa du he were oni moi gbegberẽapai dunduko ku sa yo, na biriki dunduko na asawia, na kpiboro, na gbegberẽ fugo dunduko.

²Oni ki du wa fogo agude ki nikpi nyemu gu mai nga ga toro adu nga na biriki ti ni ya, ya oni sono be he dati bata;

³bambiko oni ahia Gbia ki ini he ya ngba ko angba.

⁴Oni yé koyo du ko ni, nga unga mbia, nga gu aboro aba ha aba wa kungba he, ono si bangiri Mbori ni siasia ha, ni kikipa ha.

⁵Oni nga unga ambia a tigaoni, i nadua bambu toro na oni, oni ki du ni ziazia aboromotumo tipa tumo ni agu amotumo nga ga toro, du ni wene he gbe ku bangiri Mbori mbiko Yesu Kristo.

⁶Mbiko si rogo Ziazia Kekeapai yo, ya, “Mo ngere, mi namaa bakumba tukpu mbia Siona yo, ni siasia ha, ni kikipa ha; gu ni ka idi pa ko zee amánga nga ni te.”

⁷Si du agu roni idi pa ko irisa du fu roni; ono fu agu yo nabasa pa ko, “Gu mbia abaduabambu agindiga ha, kina ha du ni mbia tukpu he ku ri bambu,”

⁸na “Si ki du ni mbia kota, nga mbia tigo fu yo a.” Mbiko i nga agu yo nakota ti gako pai, wa du yo ni keretukeretu aboro, nga gu i aringbisi yo tipa ha.

⁹Ono oni nga siasia ngbatunga aboro, nga ga bakindo aboromotumo, nga ziazia rika aboro, nga aboro du ni kina ga Mbori yo, ya oni yugu gu wene sino gbayaga nga ga gu ko nayambu roni bitimo yo ku rogo gako iiriwo imarago yo.

¹⁰Oni adu nga ni rika aboro mbata te, ono awere oni nga gu rika aboro nga ga Mbori yo, oni adia nga inapai mbata te, ono awere oni aima dia inapai.

¹¹Abadiangba, mi nazungadi roni wa du nungunungu aboro nga oni, nga tata aboro, oni né gu nyemuahe nga ga borose, nga gu naso vura na mbisimo.

¹²Gaoni mangapai ki du ni wene he ku bangiri aGendiria; wa i nagumba rimoroni ki ya aboro gbegberẽ apai nga oni, i ki taasi rimo Mbori rago ye ko mbiko bi yo wene mangaapai ti roni.

¹³Oni gí agu arugute nga ga aboro dunduko mbiko Gbia, ki nigi pa bakindo wa du ko ni bahe,

¹⁴na pa abazogo, nga agu yo ko nasia yo tipa mbusa aboro gbegberẽpai na tipa tambua agu yo namanga wenepai.

¹⁵Bambiko wo du sangba Mbori ya rogo manga wene pai oni za fugo mumungo aboro.

¹⁶Wa du aboro raniri nga oni ka oni sá nga gaoni raniri ni údada gbegberẽpai ya, ono oni dú ni ga Mbori azogo.

¹⁷Oni írisi aboro dunduko. Oni kpi nyemu awirina. Oni gúnde ti Mbori. Oni írisi bakindo.

¹⁸Amoyambu, oni rá fu abairaroni ni gunde; fu kina agu yo du ni weneringi aboro, na fu agu yo du ni bayee yo sa te, ono fu agu yo angba nga ringiyo a ya.

¹⁹Bambiko gere nga wenepai nga ka boro hi arungosi, ki nihi he gbua, mbiko wa du pa Mbori bangirini.

²⁰Ono ka oni ingi, i ki ta roni mbiko ho, oni ki idi pa ha ni zera, gini tambuahe du ti ni? ono ka oni mangi wenepai, ki nihi apai mbiko ho, oni ki idi pa ha ni zera, si du ni wenepai ku bangiri Mbori.

²¹Were, gi nga gu pai i ayambu roni kuti ni re: mbiko Kristo ahi pai a tigako tipa roni, ki he kpia pai fu roni, oni peke fuo ko.

²²Ko nga gu ko namanga nga gbegberẽpai ya, i abi nga biriki ngbako yo te.

²³Ho i agberã ngbayo yo ni fu ko, ko agberã nga ngbako yo fu yo te; ho ko aima ni, ko aserã nga yo a te, ono ko afu tiko ku be gu ko nasapa ngbanga nzunzu.

²⁴Kina ko tigako aaka gaani ingaapai ni boroko ti ngua, ya ani kpi ti ingaapai, ki nye ni ungarani tipa rurupai; ani au mbiko gako amandoro.

²⁵Bambiko oni angbuo angbuo wa akandoro, ono awere oni yega koyo du gu ko ni nga Babanda mbisimoroni, nga gaoni Barumbatayo.