Read zande 1 Petero 3 Bible Online

1 Petero 3 - zande bible

1 Petero 3

¹Kina a wo dere akumba, oni rá fu kina akumbaroni; ya ka ngia agu yo aida nga sangba Mbori ya, i aye ka ida pa ko mbiko gaoni mangaapai. Si arengba nga oni gumba fugo te;

²wa i nabi gaoni rurupai du na gunde ti ni.

³Gaoni fongo ka si du nga ni gu fongo du bangirise nga tu mangeri, na kendegekendege marã, na ukadi remu ya;

⁴ono si du ni gu okooko boro du kpoto yo, nga gu ka azirã nga ya, kina gu fongo nga bayee toro du zezeredi, si bangiri Mbori ni bakere genoho.

⁵Bambiko bakuru yo ziazia ade afongo tiyo wa gere, nga agu yo nafu tiyo ku be Mbori, nira fu kina akumbayo,

⁶a wa Sara agi sangba Abarayama, niya ti ko, gbia. Oni nga awiriri, ho oni amanga ni wenengaĩ, ka oni agunde nga be pai wa sa ya.

⁷Kina a wo akumba, oni rá kporo na yo na rugatinapai, nifu irisa fu de wa arengba nga ome de na ga kumba ya, na wa du oni ni adi gu undahe nga ga unga wa sa na yo; ka pai dingisa nga gaoni kpe ya.

⁸Digida pai nga gere nga, oni du kina ku bani sa, nunga akuaroni ki nimangi roni, oni ki kpi nyemu akuaroni wa awirinaroni, ki du na weneringise, ki niumbasi tironi.

⁹Ka oni káraga nga gbegberẽpai fu gbegberẽpai ya, na gberãngba yo fu gberãngba yo a ya; ono ku ba gure oni káraga kina maku; mbiko gi nga gu pai i ayambu roni kutinire, nga oni ka dia maku.

¹⁰Bambiko, “Gu boro ka kpi nyemu unga, na ka bi wene arago, ka mirãni gúmba nga gbegberẽpai ya, na ka ngbani gúmba nga biriki a ya;

¹¹ni né gbegberẽpai ki nimangi wenepai; ni gbata zereda, ki nipeke fuo ho.

¹²Bambiko bangiri Gbia du fuo ruru aboro, na tuko ni haha ha tipa gayo akpe. Kpakpu Gbia du kuti amangi gbegberẽpai.”

¹³Da nga gu ni nikarungosi roni ka oni du ni apeke wenepai?

¹⁴Ono ka oni vura hi apai ahi mbiko rurupai, airamaku nga oni. Ka oni gúnde nga be aboro ya, ka oni dú nga ni fudifudi roni a ya.

¹⁵Ono oni kpára Kristo kpotoroni yo ni gaoni Gbia. Oni ki mbakadi tironi dedede tipa karaga pai fu agu yo dunduko ka sana roni tipa gu pai dũ maabangirise ti roni mbiko ho, ono ni zera na irisa.

¹⁶Oni ki du na wene sangba kpoto yo, ya ni gu rago i nagumba pai ti rimoroni, zee ki zi agu yo nagberã ngbayo yo fu roni mbiko gaoni wene mangaapai rogo Kristo yo.

¹⁷Bambiko ka ngia sangba Mbori nga oni ka hi apai, hi apai mbiko manga wenepai ngba ti hi apai mbiko manga gbegberẽpai.

¹⁸Bambiko Kristo ahi apai a tipa ingaapai bara sa, ruru boro ku ba aboro ingapai, ya ko gasi rani koyo du Mbori ni. I aimi ko rogo boroboro ono i azingisi ko rogo toro;

¹⁹rogo toro ko andu ki tungusi pai fu atoro bambukisa yo,

²⁰nga agu yo naadu mbata ni abasapai ho ga Mbori hipai aima ni rago Noa, ho i ambakadi bakurungba ni, nga gu bete aboro abati rogo ho mbiko ime, nga aboro muambi.

²¹Rogo ndikidi kpiahe yo ime nga gu he nabatasa roni, nga bapatiza, mbiko gu zingabekpio nga ga Yesu Kristo; nga dia gu biriko du ti boroboro ku sa yo te, ono si nga ka sana Mbori tipa wene sangba kpotoyo.

²²Yesu Kristo tigako du pati kumbabe Mbori wa ko andu ku ngbangbaturũ yo; amaraika ki du ni zogozogo yo fu ko na abazogo na atandu.