Read zande 1 Petero 4 Bible Online

1 Petero 4 - zande bible

1 Petero 4

¹Wa Kristo ahi apai tie rogo boroko, oni úkadi ũvura niberẽ pai a wo; mbiko gu ni nahi apai rogo boroni ni mbu ingapai;

²ya rogo gu yangara arame nanye fu bororoni oni anyé nga ni ungaroni tipa manga gu nyemuahe nga ga aboro te, ono tipa manga sangba Mbori.

³Bambiko agu arago nasusi si rengbe tipa manga gu nyemuahe nga ga aGendiria, na tipa ta rogo wasiro, na agu apai borose akpi nyemu he, na kpibuda, na gbarakagbaraka pai, na apumbo buda, na gbegberẽ irisa kpiahe.

⁴Si nairiwo ti yo ya oni aora nga na yo rogo agi apai re sa gi bakere bau re ya, i ki gberẽ ngbayo yo fu roni;

⁵nga agu yo nikagumba gu pai i amangi fu gu ko rengbe na sapa ngbanga agu yo du ni ungayo gbia kuti agu yo naakpi.

⁶Bambiko mbiko gere i atungusi wene pangbanga fu agu yo naakpi a, ya i sapu ngbanga yo wa du pa aboro rogo boroboro, ono i du ni ungayo tipa Mbori rogo toro.

⁷Ono digida apai dunduko nambeda. Wa du he were tie oni rúgu gaoni aberã ki niso gima kpe.

⁸Ono ti ri apai dunduko oni du na bakere nyemuse dagba roni; mbiko nyemuse nadada badungu ingaapai.

⁹Oni dí akuaroni ku gume ku rogo gaoni akporo ki he kpakanahe.

¹⁰Wa i agama he fu boro kina wo a ni mangi pa akurani na ni, wa wene babanda gu dungu agamahe nga ga Mbori.

¹¹Ka boro agumba pai ni gumba ha wa sangba Mbori; ka boro amanga pa aboro ni mangi he wa ni namanga ha ni gu ome Mbori nafu, ya Mbori ki du ni taasitaasi ko rogo apai dunduko mbiko Yesu Kristo, nga gu ko du taarimo fu ko na zoga arago, nye anye kindi, Amina.

¹²Abadiangba, ka si iriwo nga ti roni ya asada naye fuo roni wa we, nga gu naye ka asada gaoni apai, ya vovo pai dũ mangi roni, ya.

¹³Ono ngbarago du ti roni mbiko oni nahi apai na Kristo rogo gako hiapai; ya ni gu rago gako taarimo ka du ni kusikusi he oni ki ngi angi na bakere ngbarago.

¹⁴Ka i agbarasa rimoroni mbiko rimo Kristo, airamaku nga oni; mbiko gu toro nga ga taarimo nasunga ku ri roni, nga ga Mbori Ziazia Toro.

¹⁵Ono ka i rungosi nga gu ni dagba roni mbiko pa imoboro na pa dĩ, na manga gbegberẽpai, na fuda aboro rogo gayo apai, ya.

¹⁶Ono ka boro hi apai wa Kristano ka zee mangi nga ni ya, ono ni taasi rimo Mbori rogo gi rimo re.

¹⁷Bambiko ragoho da, sapangbanga tona ti ga Mbori bambu, ono ka si tona ti rani mbata gini pai adu ni digida ha fu agu yo agia nga sangba gu wene pangbanga nga ga Mbori ya?

¹⁸Na “Ka si du wa pa bata akpakara fu ruru aboro, wari azanga Mbori ka du ni na aboro ingapai?”

¹⁹Wa du he wo agu yo nahi apai mbiko sangba Mbori, i ta manga wene pai ki nifu mbisimoyo ku be wene ruru Bafuahe dunduko.