Read zande 2 Petero 1 Bible Online

2 Petero 1 - zande bible

2 Petero 1

¹Simona Petero, ga Yesu Kristo moyambu nga gako mokedi, Fu agu yo nadi kikipa idapase wa gaani wa sa na ani, du rogo gu rurupai nga ga gaani Mbori nga Batasi, Yesu Kristo;

²Undahe moi pai fu roni na zereda rogo ina pa Mbori na pa Yesu gaani Gbia.

³Wa du gako tandu nga ga Mbori tandu si aima fu agu ahe dunduko rengbe na unga fu rani, na gu rengbe na sinombori a, be ina pa gu ko nayambu rani rogo gako taarimo na gako weneringise.

⁴Ko ima gama gako kikipa akidohe fu rani rogo ho, du ni bakere he susi ya i ka vunga roni ku rogo sino Mbori mbiko ho oni ki bati be gu zirã du rogo zegino, nga gu naye be gu nyemuahe nga ga borose.

⁵Ii, na mbiko gi pai re oni tigaoni, oni kúsi gu pai nga manga apai nyanyaki, rogo gaoni idapase oni kúsi wenesino, rogo gaoni wenesino oni kúsi inahe;

⁶rogo gaoni inahe oni kúsi rugatise; rogo gaoni rugatise oni kúsi hipai; rogo gaoni hipai oni kúsi sinombori;

⁷rogo gaoni sinombori oni kúsi nyemu awirina; rogo gaoni nyemu awirina oni kúsi nyemuse.

⁸Bambiko ka agi apai re du ni gaoni ki moi pai, si namanga gu pai fu roni nga oni adu nga ni aboro nyomoro, na ni aboro zanga zu rogo ina pa gaani Gbia Yesu Kristo yo te.

⁹Bambiko gu ni nazanga agi apai re ni nga iravurari, ni nabi kina agu ahe du mbembedi, nihe tingida pa gu gira i agirisi ni na ni be gani kuru ingaapai.

¹⁰Wa du he were awirina, oni fú tironi nyanyaki pa yamba roni si da ti rengo na pa sia roni a, bambiko ka oni amanga agi apai re, oni ati nga wa sa te;

¹¹bambiko kina a wo i ka fu rima wenengaĩ gbe fu roni ku rogo gu nyenye ngbi nga ga gaani Gbia, nga Batasirani Yesu Kristo.

¹²Si du mi arengba ti ni na tingida agi apai re fu roni dedede, wa vura ina oni paha, ki du ni nyakasinyakasi roni rogo gu rengo du be roni.

¹³Wa du mi rogo borore mi berẽ he tigimi ya zingisa mi roni ngba nitingida agi apai fu roni re;

¹⁴wa ini mi he ya rago maa borore ku sa yo aye ni kina ipo, wa gaani Gbia Yesu Kristo ayugu he fere.

¹⁵Ii, mi amánga pai ngangarã ya fuo guari mi oni arengba na tingida agi apai re na arago dunduko.

¹⁶Bambiko ho ani ayugu gu tandu nga ga gaani Gbia Yesu Kristo ni fu roni na gako ye, ani apeka nga pa aboro, nga gu i agumba ni tatamana biriki te, ono ani adu ni adezirehe ki bi gako bakere taarimo ni bangirani.

¹⁷Bambiko ko adi irisa be Mbori nga Ba, na taarimo a, ni gu rago ngbatunga fugo aye wa gere fu ko rogo wene betedi taarimo, nga, “Wire du re, nyemuko namanga re, ngba ko ti re gbe,”

¹⁸ani ki gi gi fugo re tigaani si niye ngbangbaturũ yo ho ani adu ni na ko ri ziazia bagangara.

¹⁹Tungusitungusi pai dũ be rani ni nyanyaki he susi gere; wa du he wo ka oni kuti ni ngba, wa kuti gu we nahasa rago rogo bitimo, daho rago ka gira ni, na daho gu kerekuru nga ga wiso ka kura ni kpotoroni yo.

²⁰Oni ini gere mbata, ya a nga gu tungusitungusi pai sa nga ga Ziazia Kekeapai naye be boro ni gani berã te.

²¹Bambiko a nga tungusitungusi pai sa naye mbiko sangba boro te, ono aboro agumba pai be Mbori, wa Ziazia Toro arugu yo.