Read zande 2 Petero 3 Bible Online

2 Petero 3 - zande bible

2 Petero 3

¹Abadiangba, awere gi keke waraga re nga ue he ke mi he fu roni; na rogo ho ue mi ki zingisi gaoni ziazia aberã rogo tingida apai fu roni;

²ya oni tingidi agu apai ziazia anebi agumba ha mbata, na gu rugute nga ga Gbia, nga Batasi, ngba gaoni amokedi;

³ki ini gere mbata, ya ti yangara arame airasawia nikaye ki nipeke agu apai boroyo akpi nyemu he,

⁴niya, “Wari du gu kidohe ni tipa ye ko berewe? Bambiko tona ti rago ti abarani ni rame, ahe dunduko nanye wa si adu rago tonatona manga ahe.”

⁵Bambiko i tigayo nakpi nyemu gi pai re du ni okooko ho be yo nga, angbangbaturũ adu kina ho bakuru yo, na kpotosende ni mangimangi he be ime na rogo ime, mbiko gu pai nga ga Mbori;

⁶na be agi apai re gu zegino nadu ho mbata, ime afu afu ku auru he si ki gberẽ.

⁷Ono agu angbangbaturũ du ho awere na kpotosende si du ni igiigi he be kina gu pai re tipa we, ni bandabanda ha tipa rago sapangbanga na rago gbarasa azangasinombori.

⁸Ono abadiangba, ka gi pai sa re go nga bangironi ya, nga, uru sa du bangiri Gbia wa agarã 1,000, agarã 1,000 ki du wa kina uru sa.

⁹Gbia narungbura nga pati gako kidohe, wa agu yo naberã pa rungbura, te; ono ko du na gbanga hipai fu roni, ko akpi nga nyemu aboro kpi wa sa te, ono ko nakpi nyemu aboro da ti zungadi tiyo dunduko.

¹⁰Ono gu uru nga ga Gbia si ayé wa batuka. Rogo ho angbangbaturũ asúsa ku sa yo na bakere woro ho, agu ahe du ngbangbaturũ yo si azaraga be bakere faarago, kpotosende ki gbi, na gu mangimangi ahe du rogo.

¹¹Wa du agi ahe re nikadu ni gbandakagbandaka ha oni ka du ni gini ngbatunga aboro tipa manga ziazia apai na sinombori?

¹²Oni ki ngere tipa ye gu uru nga ga Mbori ki niipisi he, nga gu angbangbaturũ agbandaka mbiko ho wa si nagbi be we, na agu ahe nga ga ngbangbaturũ si azáraga be faarago.

¹³Ono mbiko gako kidohe, ani nangera tipa vovo angbangbaturũ na vovo kpotosende, nga gu ruru apai nikanye rogo ho.

¹⁴Were abadiangba, wa oni nangera tipa agi apai re, oni nifú tironi nyanyaki ya i bi roni zezeredi, ka wiri biriko he adú nga ti roni barangba ko na sirõ a ya.

¹⁵Oni ki ini he ya gu hipai nga ga gaani Gbia si nga gene bata; kina wo gaani weneringi wirina nga Pauro ake he fu roni, be gu inahe i afu fu ko;

¹⁶kina wo ko agumba pai tipa agi apai re rogo gako keke awaraga dunduko; nga gu du bete apai rogo ho yo ni kpakarakpakara ha tipa rugati na paha, agu yo aina nga pai ya i ki irasi he na agu yo nawo a, wa i namanga na kura Ziazia Kekeapai a, ki gbarasi tiyo.

¹⁷Were abadiangba, wa ini oni pa agi apai re mbata, oni bánda tironi gu ingapai nga ga gbegberẽ aboro, si ka ndu ka ngbe fu roni ku mbata yo, oni ki ti pati gaoni ru nyanyaki.

¹⁸Ono oni sóno rogo gu undahe nga ga gaani Gbia nga Batasirani Yesu Kristo, na rogo ina pako. Taarimo dú fu ko awere, nye anye kindi. Amina.