Read zande 1 Yoane 3 Bible Online

1 Yoane 3 - zande bible

1 Yoane 3

¹Oni bi nga ngbatunga gu nyemuse fu Mbori nga Ba fu rani, ya i ya ti rani awiri Mbori; wo du ani a. Gu pai zegino aina nga rani ti ni ya, si nga bambiko si aina nga ko te.

²Abadiangba, ani nga awiri Mbori awere, i ata yugo nga wãi ani ka du te. Ani ini aina ya, ho i ka yugo Yesu ni, ani adú wa kina ko; bambiko ani abí ko kina a wa du ko.

³Gu ni moi bangirini koyo du ko ni tipa gi pai re, ni nabanda tini rogo wenesino, a wa du Yesu gigiri.

⁴Gu ni ka inga pai, ni nati ndika a, ingapai nga tindika.

⁵Oni ini aina ya, i ayugu ko ko di ingaapai ku sa yo, ingapai ti ko te.

⁶Gu ni ka anye rogo ko yo ni nainga nga pai te. Gu ni ka ainga pai ni abi nga ko te, ni aina nga ko a te.

⁷Gi rukutu agude, ka boro ingisi nga roni ya. Gu ni ka amanga rurupai ni nga ruru boro, wa kina ko du ni ruru ko.

⁸Gu ni ka ainga pai ni nga ga bakitingbanga ni; bambiko bakitingbanga aima diga niingi pai, kina ho rago aenge ni. I ayugu Wiri Mbori tipa gi pai re, nga ko gbarasi ga bakitingbanga mangaapai.

⁹Gu ni nga ga Mbori vungu ni nainga nga pai te, mbiko ngbatungako nye rogo ni yo; ka ni ingi nga pai te, bambiko ni nga ga Mbori vungu.

¹⁰Si nayugo awiri Mbori, na awiri bakitingbanga. Gu ni ka amanga nga rurupai ya ga Mbori ni nga ni te, na gu ni adu nga nyemu wirinani ti ni ya.

¹¹Bambiko gi nga gu pangbanga oni agi ho pai aenge ni re, ya nyemu akuarani du ti rani;

¹²wa Kaina adu ni ga gbegberẽ ko ko ki imi wirinako te. Tipagine ko aimi ko ti ni? Bambiko gako mangaapai nangia gbegberẽapai, ga wirinako ki ngia rurupai.

¹³Awirinami, ka zegino asoga roni, ka si íriwo nga ti roni ya.

¹⁴Ani ini aina ya ani kuru kpio yo ku unga yo, mbiko du nyemu awirinarani ti rani. Gu ni adu nga na nyemuse ya ni nye anye rogo kpio.

¹⁵Gu ni ka asoga wirinani ni nga imiboro. Oni ki ini ya a nga imiboro sa ka nyenye unga nye rogo ni yo te.

¹⁶Ani ini gu he nga nyemuse mbiko ko azogo ungako tipa rani, ani ka azoga ungarani tipa awirina.

¹⁷Gu ni ka ũzegino du be ni, ni nibi wirinani na zingo, ki nikisi gani nunga be ko, ga Mbori nyemuse wiri panyekpotoniyowãi?

¹⁸Gi rukutu agude, ka ani du nga na nyemuse kina rogo fugo yo, ni mirãse a ya; kina rogo mangapai yo na rogo rengo yo.

¹⁹Si ani ka ina ti ni ya ani nga ga rengo rani, ki zeresi kpotorani yo barangba ko,

²⁰ti gu pai kpotorani yo akuadi ngbanga rani kuti ni; bambiko Mbori nga bahe ti kpotorani yo, ini apai du.

²¹Abadiangba, ka kpotorani yo akuadi nga ngbanga rani ya, ani du adu zukazuka koyo du Mbori ni.

²²Gu he ka ani ho, ani di he adia be ko, bambiko ani ka kuti gako rugute, ki nimangi agu apai ngba angba bangiriko.

²³Gi nga gako rugute re, ya ani idi pa rimo Wiriko aida Yesu Kristo, nyemu akuarani ki du ti rani, a wa ko afu rugute fu rani.

²⁴Gu ni ka ka kuti gako rugute ni nye anye rogo ko yo, ko ki nye rogo ni yo. Ani ini ya ko nye rogo rani yo, mbiko gu Toro ko afu ko fu rani.