Read zande 1 Yoane 5 Bible Online

1 Yoane 5 - zande bible

1 Yoane 5

¹Gu ni ka idi pa Yesu ya Kristo nga ko ni nga ga Mbori vungu. Gu ni ka nyemu gu ko du ti ni navungu ni ka nyemu gu ko du ti ni ko avungu ko a.

²Gi ani ini ti ni re ya nyemu awiri Mbori ti rani nga ho nyemu Mbori nidu ni ti rani, ani ki nimangi gako rugute.

³Bambiko gi nga du na nyemu Mbori re, nga ka ani kuti gako rugute. Gako rugute asusa nga omerani te,

⁴bambiko gu ni nga ga Mbori vungu ni di be zegino. Gi nga gu diabepai di be zegino re nga kina gaani idapase.

⁵Da nga gu ni nadia be zegino, fuo kina gu ni idi pa Yesu ya Wiri Mbori nga ko?

⁶Ko du naye na ime na kure, nga kina Yesu Kristo: kina ime sa te, na ime na kure.

⁷Toro nga dezire, mbiko Toro nga rengo.

⁸Bambiko adezire biata, Toro, ime, na kure, biata mongo du kina ku bani sa.

⁹Ka ani idi he ya ga aboro dezire nga rengo, ga Mbori dezire du adu ni bahe; bambiko ga Mbori dezire nga gere, nga ko adu ni dezire tipa Wiriko.

¹⁰Gu ni ka idi pa Wiri Mbori, dezire kpotoni yo; gu ni aida nga pa Mbori ya, ni sa ko ni irazire; bambiko ni aida nga pa gu dezire Mbori adu ni dezirehe tipa Wirikote.

¹¹Dezire nga gere, nga Mbori afu nyenye unga fu rani, gi unga re si du rogo Wiriko yo.

¹²Gu ni du na Wiri be ni, unga be ni; gu ni adu nga Wiri Mbori be ni ya, unga be ni te.

¹³Ke mi agi apai fu roni re oni ini ya nyenye unga be roni, fu kina agu roni idi pa rimo Wiri Mbori.

¹⁴Mbiko gere ani rengbe ka du zukazuka fu ko, nga, ani ini ka ani ho gu he ku sangba gako nyemuhe yo, ko gi pa rani agia.

¹⁵Ka ani ini ya ko nagia pa rani, gu he ka ani ho, ani ini aina ya agu ahe ani ho be ko si be rani.

¹⁶Ka boro bi wirinani ni niingi gu ingapai adu nga sa kpio ya, ni ho he aho, Mbori ki fu unga fu ni tipa agu yo ainga nga pai sa kpio ya. Ingapai kina ho sa kpio; mi aya nga ni kpari tipa gi te re.

¹⁷Irairapai dunduko nga ingapai, ingapai kina ho adu nga sa kpio ya.

¹⁸Ani ini aina ya gu ni nga ga Mbori vungu, ni nainga nga pai te; ono gu ni nga ga Mbori vungu, ko nabanda ni abanda ka gbegberẽ ko azada nga ni ya.

¹⁹Ani ini ya ani nga ga Mbori rani, zegino dunduko du ni zogozogo ho be gbegberẽ ko.

²⁰Ani ini aina ya Wiri Mbori ye, ki fu rugatinapai fu rani, ani ini gu ko nga irarengo, ani rogo gu ko yo nga irarengo, nga kina Wiriko Yesu Kristo. Ko nga ndikidi Mbori nga nyenye unga.

²¹Gi rukutu agude, oni bánda tironi ti kpiaahe.