Read zande Abasapungbanga 11 Bible Online

Abasapungbanga 11 - zande bible

Abasapungbanga 11

¹Yepeta nangia ngbatunga Girada naadu ni nyanyaki boro ni ngangarã ko, ono ko adu ni wiri tii nvuo. Girada nangia ba Yepeta.

²Dia Girada abatika akumbagude fu ko a; ho awiri diako asono ni, i ado Yepeta ki ya fu ko, “Mo adía nga ga barani ũkumbo te; bambiko mo nga wiri kura de.”

³Yepeta ki oro be awiribako, ki niraki ringara Tobo yo. Azanga rugatinapai ki dungura tiyo koyo du Yepeta ni, i ki nikuru ka ndu na ko ka zuba aboro.

⁴Fuo bete rago aAmono ki ye ka so vura kuti aYisaraere.

⁵Ho aAmono aye ni na vura kuti aYisaraere, abaakumba Girada ki ndu ka dia Yepeta ringara Tobo yo.

⁶I ki ya fu Yepeta, “Mo yé ka du ni gaani gbia, ani só vura kuti aAmono.”

⁷Ono Yepeta ki ya fu agu abaakumba naadu Girada yo, “Ati oni asogo re ki do re ku buba yo? Tipagine ye oni ti ni kono du mi ni awere, wa du oni nifudifuaironi?”

⁸Abaakumba Girada ki ya fu Yepeta, “Ani nakaraga tirani kono du mo ni awere mbiko gi pai re, ya mo ndú na ani, ki so vura kuti aAmono, mo adú ku ri rani, na ku ri agu yo dunduko nanaraka Girada yo.”

⁹Yepeta ki ya fu abaakumba Girada. “Ka oni akáraga re tigaoni berewe ku kpure yo ka so vura kuti aAmono, ka Yekova fu yo ku be re, mi adú ku ri roni.”

¹⁰Abaakumba Girada ki ya fu Yepeta, “Yekova dú ni dezire he dagba rani na mo; ani amánga ha kuti sangbaro ni rengo.”

¹¹Yepeta ki ndu na abaakumba Girada, aboro ki moi ko ni gbia ku ri yo; Yepeta ki gumba gako apai dunduko ku bara bangiri Yekova Misipa yo.

¹²Yepeta ki kedi asunge koyo du bakindo aAmono ni, ki ya. “Gini pai dũ dagba re na mo, ye mo ti ni ka so vura kuti gi ringara?”

¹³Bakindo aAmono ki karaga pai fu ga Yepeta asunge ki ya. “Bambiko aYisaraere adi gi ringara, ho i akuru ni Ezipeta yo, tona Arunona yo ki da ku Yaboka yo, ki da ku Yaradene yo a. Awere tie, mo gási agi aringara re ni zereda.”

¹⁴Yepeta ki kedi asunge berewe koyo du bakindo aAmono ni,

¹⁵ki ya fu ko. “Ya Yepeta wẽ; aYisaraere adia nga ringara Moaba te, na ga aAmono ringara a te,

¹⁶ono ho i akuru ni Ezipeta yo, aYisaraere ki ta ngbakungba yo ki da ti Zamba Baime, ki ye ku Kadesa yo.

¹⁷A Yisaraere ki kedi asunge koyo du bakindo Edome ni, ki ya, ‘Ani zúngadi ro, mo idi he fu rani ani súsi rogo ga ringara;’ ono bakindo Edome agia nga pa rani te. I ki Kedi pai fu bakindo aMoabo a wo, ono ko aida nga pa ha a te. AYisaraere Ki nye Kadesa yo.

¹⁸I ki nita ngbakungba yo, ki ke pati ringara Edome, na pati ringara Moaba, ki ye uroyo pati ringara Moaba, ki zi bataya pati Arunona ku bani; wuo i arima nga ku rogo ga aMoabo ringara yo te, bambiko Arunona adu ni bangbanda Moaba.

¹⁹AYisaraere ki kedi asunge koyo du Siona ni nangia bakindo aAmoro, nangia bakindo Esebona a. AYisaraere ki ya fu ko, ‘Ani zúngadi ro, mo ídi he fu rani ani súsi rogo ga ringara ku rogo gaani ringara.’

²⁰Ono Siona aida nga ha fu aYisaraere i susi rogo gako ringara te; ono Siona adungura gako aboro dunduko, ki zi bataya Yasa yo, ki so vura kuti aYisaraere.

²¹Yekova nangia ga aYisaraere Mbori ki fu Siona ku be aYisaraere na gako aboro du, i ki di be yo; si du aYisaraere adi ringara aAmoro ti ni ni gayo, nangia agu aboro nanaraka rogo gu ringara re.

²²I ki di ringara aAmoro ni gayo dunduko, tona Arunona yo ki da ku Yaboka yo, ki tona ngbakungba yo a ki da ku Yaradene yo.

²³Si du Yekova ga aYisaraere Mbori adi ringara ti ni be aAmoro ku barangba gako aboro nga aYisaraere; mo nikadia ha ni gamo awere?

²⁴Gu he Kemose afu foro nga gamo mbori, mo adía nga kina ha te? A wa agu ahe Yekova gaani Mbori adi be agu yo ku barangba rani, kina ha ani nikadia ha ni gaani.

²⁵Mo tigamo, mo ngba susi Baraka wiri Sipora nangia bakindo Moaba? Ko azuna aYisaraere ni gu rago re? Ko aso vura kuti yo ni gu rago re?

²⁶Ho aYisaraere araka ni Esebona yo na rogo gaha akporo, tipa garã 300, ku Aroere yo a na gaha akporo, ku rogo agu abaakporo naadu pangba Arunona yo a. Tipagine mo adia nga ha ti ni ni gu rago re ya?

²⁷Si du mi tigimi ainga nga pai kuti ro te, ono mo namanga re gbigbita ni so mo vura kuti re. Yekova nga Basapungbanga, ko du ni basapungbanga areme dagba awiri aYisaraere na awiri aAmono.”

²⁸Ono bakindo aAmono agia nga gu pai Yepeta akedi fu ko te.

²⁹Ga Yekova Toro ki ye ku ri Yepeta, ko ki susi rogo Girada na Manase, ki susi Misipa naadu Girada yo. Ko ki guari Misipa yo naadu Girada yo ki susi koyo du aAmono ni.

³⁰Yepeta akido he fu Yekova, ki ya, “Ka mo fú aAmono ku be re ni rengo,

³¹si adú wa gere, gu ni ka kuru ngbadimo gi bambu yo ka gbia re, ho mi ka yega ni ni zereda be aAmono, ni adú ni ga Yekova he, mi afú ni ni zozo motumo.”

³²Yepeta ki susi tie koyo du aAmono ni ka so vura kuti yo. Yekova ki fu yo ku be ko.

³³Ko ki di be yo tona Aroere yo ki da ti rago pati Miniti yo, nga abaakporo 20, na ku Aberekeramina yo, ni bakere imo aboro gbe. Si du aAmono adu ti ni ni zogozogo yo fu awiri aYisaraere.

³⁴Yepeta ki ye ku Misipa yo ku kpuko yo; mo ngére, wiriko nangia de ki kuru ka gbia ko, na gaza ki nido gbere. Ri adu ni gako bangisa vungu; wiriko adu nga ho fuo ri nga kumba na de a te.

³⁵Ho ko abi ri ni, ko ki sipi gako aremu, ki ya, “Ako wire! mo payasi pa re gbe, mi ni fudifudi re be ro, bambiko mi ape pai fu Yekova, ka mi sá nga sangbare te.”

³⁶Ri ki ya fu ko. “Buba, mo ape pai fu Yekova; mo mángi he fere a wa kina gu pai nakuru ngbaro yo; bambiko wa Yekova airi bape ro kuti avuraro, nga aAmono.”

³⁷Ri ki ya fu bari, “Mo mángi gi pai fere re; mo mbú re ni sa re diwi ue, mi gúari ka ndu ku abaagangara yo, ka kpara tipa pa du mi ni ngasu de yo, mi na akuare a.”

³⁸Ko ki ya, “Mo ndú.” Ko ki fu gene fu ri, tipa diwi ue; ri ki guari, ri na akuari, ki kpari tipa pa du ri ni ngasu de ri abaagangara yo.

³⁹Ho diwi anyasi ni ue, ri akaraga tiri koyo du bari ni, ko ki mangi na ri a wa kina gu gako zungahe ko azunga ha. Ri aina nga pa kumba te. Si adu ni sino dagba aYisaraere,

⁴⁰ya, awiri aYisaraere nangia ade anandu na garã ka tingida pa wiri Yepeta nangia de tipa uru biama rogo garã sa.