Read zande Abasapungbanga 13 Bible Online

Abasapungbanga 13 - zande bible

Abasapungbanga 13

¹Awiri aYisaraere ki nimángi gu pai berewe nadu ni gbigbita ha bangiri Yekova; Yekova ki fu yo ku be aFereseto tipa garã 40.

²Kumba adu yo ni boro Sora, nangia ngbatunga Dana, rimoko angia Manoa. Diako adu ni irazangada, ka ri avunga nga ya.

³Ga Yekova maraika ki yugu tiko fu gi de re, ki ya fu ri, “Mo ngére, awere, irazangada nga mo, mo ata vunga nga te; ono mo adú na mobara, ki batika kumbagude.

⁴Awere tie, mi nazungadi ro, mo bánda tiro, ka mo mbíri nga imekakue watadu baripiro ki kpi he ya. Ka mo ri nga agu ahe i nagina ha wa nyakorokpa a ya,

⁵bambiko mo adú na mobara, ki oatika kumbagude. I akpé nga mangeriko ni kperi te, bambiko gi gude re adú ni boro Nazara fu Mbori tona kina rukumbu yo; ko atóna batasa aYisaraere be aFereseto.”

⁶Gu de re ki ye ki gumba pa ha fu kumbari, ki ya, “Ga Mbori kumba niye kono du mi ni, kpakpuko nidu wa kpakpu ga Mbori maraika ni iiriwo ho gbe; mi nasana nga ko wari ko aye ni te, ko nayamba nga rimoko fere a te.

⁷Ono ko niya fere, ‘Mo ngére, mo adú na mobara, ki batika kumbagude. Ka mo mbíri nga imekakue watadu baripiro ki kpi he ya, ka mo ri nga agu ahe i nagina ha wa nyakorokpa a ya, bambiko gu gude re adú ni boro Nazara fu Mbori tona kina rukumbu yo dati gu rago ko ka kpi.’ ”

⁸Manoa ki zungadi Yekova, ki ya, “Ako Yekova, mi zungadi ro, mo ídi he gu ga Mbori kumba mo akedi ko mbata, ko yé kono du ani ni berewe, ko yugu gu pai fu rani ani ka manga tipa gu gude i ka batika ko.”

⁹Mbori ki gi fugo Manoa, ga Mbori maraika ki ye berewe koyo du gu de ni re wa ri asungu ati yo; ono Manoa nangia kumbari, ko adu nga na ri yo te.

¹⁰De ki ipisi tiri, ki oro, ki gumba ha fu kumbari, ki ya fu ko, “Mo ngére, kumba ye kono du mini, nga gu ko naye ni gu rago.”

¹¹Manoa ki guari, ki ndu fuo diako, ki ye koyo du gu kumba ni re, ki ya fu ko, “Mo nga gu kumba nafura na gi de re?” Ko ki ya, “Mi nga ko.”

¹²Manoa ki ya, “Ho sangbaro ka da ni ti rengo, gu kumbagude re ko adú ni gini ngbatunga gude, ani amánga waĩ tipa ko?”

¹³Ga Yekova maraika ki ya fu Manoa, “Kina agu apai mi agumba ha fu de, ri bánda kina pa ha.

¹⁴Ka ri rí nga gu he nakura ti bakakue ya, ka ri mbíri nga imekakue na baripiro ki kpi he ya, ki ri agu ahe i nagina ha wa nyakorokpa a ya. Agu apai mi arugu ri kuti ni, ri mángi kina ha.”

¹⁵Manoa ki ya fu ga Yekova maraika, “Mi zungadi ro, ani káraga ro mbata, ani mbákadi wiri meme tipa ro.”

¹⁶Ga Yekova maraika ki ya fu Manoa, “Ka oni vura karaga re, mi arí nga gaoni riahe te, ono ka oni mbákadi zozo motumo, oni ki fu he fu kina Yekova.” Manoa aina nga ha ya ko nga ga Yekova maraika te.

¹⁷Manoa ki ya fu ga Yekova maraika, “Rimoro nga da, ho i ka digisa gamo apai ni, ani ki rengbe na irisa ro?”

¹⁸Ga Yekova maraika ki ya fu ko, “Tipagine mo asana he ti ni tipa rimore, wa du he ni iiriwo ho?”

¹⁹Manoa ki di wiri meme na motumo riahe, ki tumo na ni ri mbia fu Yekova, maraika ki mangi pai ni iiriwo ho, aManoa ki bi he na diako.

²⁰Bambiko ho mirãwe andu ni ku ngbangbaturũ yo ri bamotumo yo, ga Yekova maraika ki ga rogo mirãwe bamotumo yo, aManoa ki bi he na diako. I ki tiwi ki vagadi ku sande ni kpakpuyo.

²¹Ono ga Yekova maraika ayugo nga tiko fu Manoa berewe te, fu diako a te. Si du Manoa aini he ti ni ya, ga Yekova maraika nangia ko.

²²Manoa ki ya fu diako, “Ani akpí ni rengo, bambiko ani bi Mbori.”

²³Ono diako aya fu ko, “Ka si angba ti Yekova ka imo rani, ka ko adi nga zozo motumo be rani te, na motumo riahe a te, ka ko ayugu nga agi apai re dunduko fu rani a te, ka ko agumba nga agi apai fu rani re ni gi rago re a ya.”

²⁴Gu de re ki batika kumbagude, ki yambu rimoko nga Samusona; gude ki nisono, Yekova ki nifu maku fu ko.

²⁵Ga Yekova Toro ki tona wo ti ko Mane-dana yo, du dagba Sora na Esetaora.