Read zande Abasapungbanga 14 Bible Online

Abasapungbanga 14 - zande bible

Abasapungbanga 14

¹Samusona ki zorõ ku Timena yo, ki bi de Timena yo nangia wiri aFereseto.

²Ko ki yega, ki gumba ha fu bako na nako, ki ya, “Mi bi de nga wiri aFereseto Timena yo; oni dí ri fere tie ni diare.”

³Abako ki ya fu ko na nako, “A nga de dagba awirinamo, watadu dagba angbatungarani wa sa te? mo nandu ka dia de kina dagba aFereseto nga azangayeratise?” Ono Samusona ki ya fu bako, “Mo dí ri fere ke; bambiko ngba ri ti re gbe.”

⁴Ono bako na nako i aina nga ya sangba Yekova naadu te; mbiko ko agbata pai kuti aFereseto. Were ti gu rago re aFereseto nazoga aYisaraere azoga.

⁵Samusona ki nimo ka guari, na bako na nako a, ki ndu ku Timena yo, i ki da pati aati bakakue Timena yo. Oni ngére, paranga bahu ki gbungu kuti ko.

⁶Ga Yekova Toro ki ye na bakere tandu ku ri ko, ko ki siri ru wa ka ko siri kina wiri meme; he adu nga be ko te. Ono ko agumba nga pa gu pai fu bako na nako ko amangi te.

⁷Ko ki nimo ka ndu ki fura na gu de re; ri ki ngba ti Samusona gbe.

⁸Fuo bete rago ngbutuko ko ki karaga tiko berewe ka dia ri; ko ki kpara ka bi kangba bahu, oni ngere, ndurumo anyege ki du vuru kurugbo bahu yo, na nzemera a.

⁹Ko ki nu ra ku beko, ki ta ndu niri ra. Ko ki kuru koyo du bako na nako ni, ko ki fu ra fu yo, i ki ri ra. Ono ko agumba nga ha fu yo ya ko ninu ra vuru kurugbo bahu yo te.

¹⁰Bako ki nimo ka ndu koyo du gu de ni re, Samusona ki mangi pumbo yo; wa sino aparanga nidu.

¹¹Ho aboro abi ko ni, i ki ye na aparanga 30 i sungu na ko.

¹²Samusona ki ya fu yo, “Oni ídi he mi gumba sanza fu roni awere; ka oni réngbe na kusa paha fere ti gi uru du saba re nga ga pumbo, ki rugu tironi na paha, mi afú tutu roko ni giri nzibi fu roni 30 tie, na mounda roko 30 a.

¹³Ono ka oni aréngba nga na kusa paha fere ya, oni afú tutu roko ni giri nzibi fere 30 na mounda roko 30 fere a.” I ki ya fu ko, “Mo kúsi ga sanza fu rani, ani gí he.”

¹⁴Ko ki ya fu yo, “Vuru barihe yo riahe akuru ni. Vuru iraome yo nzinziri he akuru ni.” Ka i arengba nga ka kusa pa gi sanza re fu ko tipa uru biata ya.

¹⁵Si adu wa gere ti saba rame, i ki ya fu dia Samusona, “Mo zómia kumbamo, ya ko kusi pa gi sanza re fu rani, ani ka zokoda ro ni we na ku bamo a. Oni ayambu rani kono ku runasi rani?”

¹⁶Dia Samusona ki nikpari ni aume barangba ko, niya, “Mo nasoga re asoga, mo akpi nga nyemu re te. Mo agumba sanza fu awiri ngbatungare, ka mo akusa nga paha fere ha.” Ko ki ya fu ri, “Mo ngére, mi akusa nga paha fu buba na nina a te, waĩ tie ka mi kusi paha fu kina ro?”

¹⁷Ri ki nikpari ni aume barangba ko kindi tipa rame saba, wa rame gayo pumbo adu; ti saba rame ko ki kusi paha fu ri, wa ri azadi pai kuti ko kindi. Ri ki gumba pa gi sanza re fu ngbatungari.

¹⁸Akumba bakporo ki ya fu ko mbata uru nikati nga ga saba rame, “Gini he du ni nzinziri he susi anyege? Gini he du ni nyanyaki he susi bahu?” Ko ki ya fu yo, “Ka oni asopa nga bino na gi nabagara ya, ka oni rugu nga tironi na gi sanza te.”

¹⁹Ga Yekova Toro ki ye na bakere tandu k u ri ko, ko ki ndu ku Asekerona yo, ki imi akumba gu bakporo re 30, ki gbu gayo ahe, ki fu roko na mounda a fu agu yo nakusi pa gu sanza re fu ko. Gako zinga ki rungudi arunguda gbe, ko ki ga ku bako yo.

²⁰Ono i afu dia Samusona fu gu kura ko, nga gu ko nangia badiako.