Read zande Abasapungbanga 15 Bible Online

Abasapungbanga 15 - zande bible

Abasapungbanga 15

¹Fuo gure ngbutuko, ti rago ke zende nganu, Samusona ki ndu na wiri meme be ko ka bi diako. Ko ki ya, “Mi narima fuo diare ku dimo yo.” Ono ka bari aida nga ha fu ko ko rimi ya.

²Bari ki ya, “Mi aberẽ he ni rengo ya mo asogo ri asoga kindi; si du mi afu ri ti ni fu gu kuaro. A nga tameri ngba ki susi ri, te? Mi nazungadi ro, mo dí ri ku ba ri.”

³Samusona ki ya fu yo, “Awere si adú nga ni pai ku ri re tipa aFereseto te, ka mi vura manga yo amanga vuru.”

⁴Samusona ki ndu ki zi ahúa 300, ki rogo anzinga; ki kpikpira asara ni ba ue, ki vodi nzinga ti asara ue dunduko ni ba sa sa.

⁵Ho ko atigi agu anzinga ni re, ko ki mbu ra ami ndu ku ati zende ahe yo nga ga aFereseto, ki zokodi vodivodi zende ahe gbiakuti gu i ata ke nga ha ya, na aati eraya a.

⁶AFereseto ki ya, “Da mangi gi pai re?” I ki ya, “Samusona du, nga gbio boro Timena, bambiko ko adi diako, ki fu ri fu gu kura ko.” AFereseto ki ye, ki zo ri na bari ni we.

⁷Samusona ki ya fu yo, “Si ngia oni mangi pai wa gere, mi aíra bape ti roni ni rengo, fuo gure tie, mi ki mbu he.”

⁸Ko ki mangi yo amanga gbegberẽ ni bakere kpio; ko ki nimo ka ndu ka raka rogo gu sarisari mbia nga Etama.

⁹AFereseto ki ndu ku ngbi yo ki zi bataya Yuda yo, i ki zuba Rei.

¹⁰Aboro Yuda ki ya, “Tipagine ye oni ti ni sa rani?” I ki ya, “Tipa vo Samusona si du ye ani ti ni, ka manga fu ko a wa ko amangi fu rani.”

¹¹Aboro Yuda ki zorõ wa aboro 3,000 ku pati gu sarisari mbia nga Etama, ki ya fu Samusona, “Mo aina nga ha ya aFereseto nga azogorani te? Gini pai nga gi mo amangi he fu rani were?” Ko ki ya fu yo, “A wa i amangi fere, kina wo mangi mi fu yo a.”

¹²I ki ya fu ko, “Ani niye ka vo ro, ka fu ro ku be aFereseto.” Samusona ki ya fu yo, “Oni zúnga he fere, ya oni amánga nga re tigaoni te.”

¹³I ki karaga ha fu ko, niya, “Oó; oni ani avó ro avo nyanyaki, ki fu ro ku be yo; ono ni rengo ani aimo nga ro te.” I ki vo ko ni vovo gire ue, ki di ko pati mbia.

¹⁴Ho ko ada ni ku Rei yo, aFereseto ki ta gbia ko nita ngbayo. Ga Yekova Toro ki ye na bakere tandu ku ri ko, gu gire naadu ti beko si ki du wa kina gbitiri giri nzibi, gire ki zaki azaka ti beko.

¹⁵Ko ki bi vovo biringangba dongi, ko ki taĩ beko ki di he, ki imi aboro na ni wa 1,000.

¹⁶Samusona ki ya. “Na gu biringangba dongi, aguguda ku ri aguguda, Na gu biringangba dongi, mi niimi aboro na ni wa 1,000.”

¹⁷Ho ko adigisi gumba pai ni, ko ki ba gu biringangba dongi naadu beko ku sa yo; i ki yambu rimo gu ba re nga Ramata-rei.

¹⁸Gomoro ime ki nimángi ko amanga gbe, ko ki kpari fu Yekova, ki ya, “Mo nifu gi bakere bata re ku be ga moyambu; mi nikakpi awere be gomoro ime, ka ti ku be azangayeratise?”

¹⁹Ono Mbori ki sari gu due naadu Rei yo, ime ki gbadi ti ni; ho Samusona ambiri ime ni, mbisimoko ki unga, ko ki bati. Si du i aya ti ni ti gu ba re, Ena-akore, nga gu du ku Rei yo, du ho awere kindi.

²⁰Ko ki zogo aYisaraere ni gu rago aFereseto anazoga yo tipa garã 20.