Read zande Abasapungbanga 16 Bible Online

Abasapungbanga 16 - zande bible

Abasapungbanga 16

¹Samusona ki ndu ku Gaza yo, ki bi debari yo, ki rimi fuo ri.

²I ki gumba ha fu aboro Gaza, ki ya, “Samusona ye kono.” I ki ru nguru pati ko kirikiri, ki sungu ngbadimo bakporo ki pidi ko sasasa ni gu yuru re. I ki ongo kii dati girarago, niya, “Kina boro wiso ho rago ka gira ni, ani ki imi ko.”

³Samusona ki pi api dati bebere yuru, ko ki guari bebere yuru, ki zi agu akpuguru naadu ti ngbadimo bakporo na ngua pa ngbadimo ue, ki mofo ho, na gu marã i naakisa ha na ni na baha dunduko. Ko ki moi he pagoko, ki tindi he ku ri gu bagangara naadu barangba Eburone.

⁴Si adu wa gere fuo ho, ko ki nikpi nyemu gu de naadu rogo ngboongboorago Soreke yo, rimori angia Derira.

⁵Agbia aFereseto ki ye koyo du ri ni, ki ya fu ri, “Mo zómia ko, ki rugu tiro na pa ho du gako bakere ome ni, gini pai ani ka manga ha ka dia be ko, ka vo ko ki payasi ko. Ani afú feda foro wa 11,000, wa du ani dunduko kpere kese.”

⁶Derira ki ya fu Samusona, “Mi nazungadi ro, mo gúmba nga ha fere, wari du gi ga bakere ome ni re? I amánga waĩ ka vo ro ki pavasi ro?”

⁷Samusona ki ya fu ri, “Ka i vó re na iwa vundio saba nga gu auga nga ya, mi arúngbura arungbura be he ki du wa kina kura aboro.”

⁸Agbia aFereseto ki ye na iwa vundio saba fu ri nga gu nauga nga ya, ri ki vo ko na ni.

⁹Were agu abapidirago naadu na ri, i ki sungu dimo kpuri yo. Ri ki ya fu ko, “AFereseto naye sa ro, Samusona!” Ko ki kafu iwa avundio, a wa umu gire nikati ho we nazi he ni. Ka i aina nga pa gako ome ya.

¹⁰Derira ki ya fu Samusona, “Mo ngére, mo nisawia re, ki gumba kinaku zire fere; awere mi nazungadi ro, mo gúmba nga ha fere, i amánga waĩ ka vo ro.”

¹¹Ko ki ya fu ri, “Ka i vó re na gu vovo kamakama gire nga gu i amánga nga sunge na ni mbata ya, mi arúngbura arungbura be he, ki du wa kina kura aboro.”

¹²Were Derira ki di vovo kamakama gire, ki vo ko na ni, ri ki ya fu ko, “AFereseto naye sa ro, Samusona!” Were abapidirago asungu dimo kpuri yo kindi. Ko ki kafu he akafa ti beko wa kina umu gire.

¹³Derira ki ya fu Samusona. “Mo sawia re daku awere, ki gumba kinaku zire fere. Mo gúmba nga ha fere i amánga waĩ ka vo ro.” Ko ki ya fu ri, “Ka mo vó baso mangerire saba na peku, ki nyakasi he na samanza, mi arúngbura arungbura be he, ki du wa kina kura aboro.”

¹⁴Ho ko ara ni Derira ki vo baso mangeriko ni peku, ki nyakasi he na samanza, ki ya fu ko, “AFereseto naye sa ro, Samusona!” Ko ki zingi rame yo, ki mo samanza ti baso mangeriko, na peku a.

¹⁵Ri ki ya fu ko, “Mo niwiri pa ya waĩ ‘Nyemure ii ro,’ wa adu nga mbisimore kpotoro yo ya? Mo sawia re bara biata, ka mo agumba nga pa ga bakere ome fere ho du he ni ya.”

¹⁶Si adu wa gere, wa ri azadi pai kuti ko kindi na uru, ki nizungia ko, si ki nifuai mbisimoko sa kina kpio.

¹⁷Ko ki nyasi agu apai fu ri dunduko naadu kpotoko yo, ki ya fu ri, “I nakpe nga mangerire ni kperi te; bambiko mi adu ni boro Nazara fu Mbori tona ti gu rago mi akuru rukumbu nina yo. Ka i kpé mangerire, gi ome ago ago ti re ni ba sa, mi ki rungbura arungbura ki du wa kina kura aboro.”

¹⁸Ho Derira abi he ni ya ko nyasi agu apai du kpotoko yo fu ri dunduko, ri ki kedi sunge i yambu agbia aFereseto, ki ya, “Oni yé berewe ti kina gi bara sa re, bambiko ko nyasi agu apai fere du kpotoko yo dunduko.” Agbia aFereseto ki nimo ka ye tie fuo ri, i ki ye na marã be yo.

¹⁹Ri ki pigi ko ko nira auru rukusuri; ri ki yambu kumba, ko kpé baso mangeriko saba. Ri ki tona rungosi ko, omeko ki go ti ko.

²⁰Ri ki ya. “AFereseto naye sa ro, Samusona!” Ko ki zingi rame yo, ki ya, “Mi nandu ku zegi yo a wa mbata, ki zigizo tire.” Ono ka ko aina nga ha ya Yekova guari ti ko ya.

²¹APereseto ki zi ko, ki mofo bangiriko, ki ye na ko ku Gaza yo, ki vodi ko ni azogbo sirigi. Ko ki nisa ahe bambukisa yo.

²²Were fuo kpe yo mangeriko si ki tona ka kura berewe.

²³Agbia aFereseto ki dungura tiyo dunduko ka tumo ni bakere motumo fu Dagona nangia gayo mbori, na ka ngi mbaro a; bambiko i aya, “Gaani mbori fu Samusona ku be rani nangia vurarani.”

²⁴Ho aboro abi ko ni, i ki nitambua gayo mbori; bambiko i aya, “Gaani mbori fu vurarani ku be rani, nga bagbarasi gaani ringara, nga gu ko naimi dungu rani.”

²⁵Si adu wa gere, ho kpotoyo yo adu ni na ngbarago pusiapusia, i ki ya, “I yámbu Samusona ko mángi úmongo fu rani.” I ki yambu Samusona bambukisa yo, ko ki nimangi ũmongo fu yo. I ki moi ko dagba adangba bambu;

²⁶Samusona ki ya fu gu gude nazi ko ti beko, “Mo mbú re mi zádi agu adangba bambu, bambu naru kuti ni, mi mégedi kuti ni.”

²⁷Were bambu ahi ahi be akumba na ade; agbia aFereseto adu kina yo dunduko. Aboro ki du ri bambu yo wa 3,000 nga akumba na ade, nabi Samusona wa ko namanga ũmongo.

²⁸Samusona ki kpari fu Yekova, ki ya, “Ako Gbia MBORI, mi nazungadi ro, mo tíngidi pa re, mi nazungadi ro, mo nyákasi re ti kina gere bara sa, Ako Mbori, mi iri bape bangire du ue ti aFereseto.”

²⁹Samusona ki zadi adangba bambu naadu ue bebere bambu, nga gu bambu naru kuti ni, ki megedi kuti ni, ki zadi gu ni kumbabeko, ki zadi gu ni garebeko.

³⁰Samusona ki ya, “Mo ídi he ani kpí na aFereseto.” Ko ki nuga tiko na omeko dunduko; bambu ki ti ku ri agbia na agu aboro dunduko naadu dimo yo. Si du kangba agu aboro ko aimi yo ho ko akpi ni, si nasusi agu yo ko anaimo yo ko du ni ungako.

³¹Awirinako ki ye tie na agume bako dunduko, ki di kangbako, ki ga na ni, ki kpisidi he dagba Sora na Esetaora rogo gu bakpisida kangba aboro nga ga Manoa nangia bako. Ko azogo aYisaraere tipa garã 20.