Read zande Abasapungbanga 17 Bible Online

Abasapungbanga 17 - zande bible

Abasapungbanga 17

¹Kumba adu yo naadu ni boro ringara abaagangara Efuraima, rimoko nangia Mika.

²Ko ki ya fu nako, “Gu feda 1,100 i adi ra be ro re, nga agu ra mo asenge he tipa ra, ki nigumba ha ku ture yo a, mo ngére, gu feda re, ami oe re; mi nadĩ ra.” Nako ki ya fu ko, “Yekova fú maku fu wire.”

³Ko ki gasigu feda re 1,100 fu nako; nako ki ya, “Mi nakpara gu feda re fu Yekova tipa wire, ka mbakada sese kpiahe na ami na gu kpiahe i amangi na zaragasizaragasi marã a. Si du tie, mi akáraga ra foro.”

⁴Ho ko agasi feda ni fu nako, nako arogo feda 200, ki fu ra fu pongu, ko ki mbakadi sese kpiahe na ami na gu kpiahe i amangi na zaragasizaragasi marã a. Si ki du ku Mika yo.

⁵Gu kumba nangia Mika re, bambu ambori adu be ko. Ko ki mbakadi efoda, na terafima ki dika gu ni dagba awiriko sa ni ki du ni gako boromotumo.

⁶Ni gu rago re bakindo adu nga Yisaraere yo te; aboro anamanga kina gu pai naaru bangiriyo ni ba sa sa.

⁷Paranga kumba adu Betereme du Yuda yo, ni ngbatunga Yuda, naadu ni boro Revi; ko ki sungu yo.

⁸Gu kumba re ki guari bakporo yo, Betereme du Yuda yo, ka gbata bara wari ka ko ndu ka sunga ku ho ni. Wa ko anunga, ko ki ye ku ringara abaagangara Efuraima ku Mika yo.

⁹Mika ki ya fu ko. “Mo naye wari?” Ko Ki ya fu ko, “Boro Revi nga mi du Betereme du Yuda yo, mi nandu ka sunga bara ho mi ka bi rago ni.”

¹⁰Mika ki ya fu ko, “Mo súngu fuo re, ki du ni ba fere ni boromotumo a, mi afú marã feda bawe foro na garã, na remu sa, na ga riahe a.”

¹¹Si angba ti gu boro Revi re ka nye na gu kumba re; gu paranga kumba re ki du wa wiriko fu ko.

¹²Mika ki dika gu boro Revi re, paranga kumba ki ye ka du ni gako boromotumo, ki du kina ku Mika yo.

¹³Mika ki ya, “Awere mi ini he ya Yekova nikausa re, bambiko wa du gu boro Revi re ni gi boromotumo.”