Read zande Abasapungbanga 18 Bible Online

Abasapungbanga 18 - zande bible

Abasapungbanga 18

¹Ni gu rago re bakindo adu nga Yisaraere yo te. Ni gu rago re ngbatunga Dana agbata gayo ringara ka raka rogo; bambiko dati gu rago re i abi nga ngbi ni gayo dagba angbatunga aYisaraere yo te.

²ADano akedi akumba bisue dagba ngbatungayo, nangia nyanyaki akumba, Sora yo na Esetaora yo, ka maa ringara, ka makia pa ha; i ki ya fu yo, “Oni ndú, ki makia pa ringara.” I ki ye ku ringara abaagangara Efuraima yo, ku Mika yo, ki ra yo.

³Ho i adu ni pati ga Mika bambu, i aini fugo gu paranga kumba re nangia boro Revi; i ki kpara koyo, ki ya fu ko, “Da naye na mo ku erẽ? Mo namanga waĩ rogo gi rago re? Ga pai nga gine erẽ?”

⁴Ko ki ya fu yo, “Were Mika namanga na mi, na were: ko angbe re, mi ki du ni gako boromotumo.”

⁵I ki ya fu ko, “Ani zungadi ro, mo sána he tipa sangba Mbori, ani íni pa gaani gene ani andu ngba ha tigaani, si ngia si angbá angba.”

⁶Boromotumo ki ya fu yo, “Oni ndú zezeredi. Gaoni gene oni nandu ngba ha si ku bara bangiri Yekova.”

⁷Agu akumba re bisue, i ki guari, ki ye ku Raisa yo. I ki bi agu aboro naadu yo, ya i naraka zezeredi, a wa sino aSidono nidu, na zera zanga fudifudi apai. A nga boro sa adu ringara yo i aasia pa zoga yo fu ni te, ni ka manga yo rogo agu apai. I aturũ na aSidono gbe, i adu nga na aboro rogo kura apai yo wa sa te.

⁸Agi yo bisue re ki yega koyo du awirinayo ni ku Sora yo na ku Esetaora yo. Awirinayo ki ya fu yo, “Oni naya waĩ?”

⁹I ki ya, “Ani gúari ku ari, ka ndu sa yo; bambiko ani bi ringara, oni ngére, si ni wene he gbe. Sungu ani asunga zaa? Ka oni nyómoro nga tipa ndu koyo ka rima koyo ka dia ringara ni gaoni ya.

¹⁰Ho oni ka ndu ni, oni ayé koyo du agu aboro ni naadu zezeredi. Ringara ni bakikii he gbe; bambiko Mbori afu he ku be roni, nga gu rago adu nga na gu zingohe rogo ho nga ga zegino wa sa ya.”

¹¹Were akumba 600 ki guari yo navodi ũvura dagba ngbatunga Dana, Sora yo na Esetaora yo.

¹²I ki ndu ki zi bataya Kiriyata-yarima Yuda yo. Si du i ayambu gu rago ti ni re Mane-dana ki da ku areme; si du gii Kiriyata-yarima yo.

¹³I ki susi yo ku ringara abaagangara Efuraima yo, ki da ku Mika yo.

¹⁴Agu akumba re bisue naandu ka maa rago Raisa yo, i ki karaga pai, ki ya fu awirinayo, “Oni aina nga ya rogo agi abambu re efoda du na terafima, na sese kpiahe, na gu kpiahe i amangi na zaragasizaragasi marã, te? Awere oni mákia pa gu pai oni ka manga ha.”

¹⁵I ki kpara koyo, ki ye ku gu paranga kumba re nangia boro Revi, kina ku Mika yo, ki sana he tipa ko.

¹⁶Agu akumba 600 naavodi gayo ũvura, nangia aDano, i ki ru ba rima ngbadimo yo.

¹⁷Agu akumba re bisue naandu ka maa rago, i ki rimi koyo, ki di gu sese kpiahe re, na efoda, na terafima, na gu kpiahe i amangi na zaragasizaragasi marã a. Boromotumo ki ru pati ba rima ku ngbadimo yo na agu akumba re 600 naavodi ũvura.

¹⁸Ho agi yo re arimi ni ku rogo ga Mika bambu yo, ki ye na sese kpiahe, na efoda, na terafima, na gu kpiahe i amangi na zaragasizaragasi marã, boromotumo ki ya fu yo, “Oni namanga waĩ?”

¹⁹I ki ya fu ko, “Mo óngo kii, mo mói bero ti ngbaro, ki ndu na ani, ki du ni ba fu rani ni boromotumo a. Si angba nga tipa ro ka du ni boromotumo fu kumba sa na gako aborokporo, watadu ka du ni boromotumo fu gu ngbatunga aboro na gu rika sa Yisaraere yo te?”

²⁰Kpoto boromotumo yo ki wasa, ko ki di efoda, na terafima, na sese kpiahe, ki ndu ku dagba aboro yo.

²¹I ki aria tiyo ki guari, ki moi rukutu yo ku mbata yo na abagara na ahe.

²²Ho i aturũ ni na ga Mika bambu, agu akumba naadu rogo abambu mbembedi na ga Mika, i ki dungura tiyo, ki do fuo aDano.

²³I ki yambu aDano, aDano ki aria tiyo, ki ya fu Mika, “Gini pai namanga ro, wa ye mo na rikaaboro were?”

²⁴Ko ki ya, “Oni di gimi ambori ku sa yo, nga gu mi ambakadi, na boromotumo, ki guari, gini he du be re berewe? Tipagine ya oni ti ni fere, ‘Gini pai namanga ro?’ ”

²⁵ADano ki ya fu ko, “Ka i gí nga fugoro dagba rani ya, aboro imisiringbaduse ka ti ku auru ro, ki imi ro, na gamo aborokporo.”

²⁶ADano ki ndu gayo nduge. Ho Mika abi yo ni ya i nyanyaki ki susi ko, ko ki aria tiko ki ga ku kpuko yo.

²⁷ADano adi gu he Mika ambakadi, na gu boromotumo naadu fuo ko, ki ye ku Raisa yo, koyo du agu aboro ni naadu zezeredi zanga fudifudipai. I ki imi yo na basape, ki zo bakporo ni we.

²⁸Batasi adu nga ho te, bambiko i aturũ na Sidona, i adu nga na aboro rogo kura apai yo wa sa te. Si adu rogo ngboongboorago pati Bete-roba yo. I ki dua bakporo, ki niraki yo.

²⁹I ki yambu rimo gu bakporo re nga Dana, wa rimo bayo adu, nangia gu ko i abatika ko fu Y isaraere. Ono rimo gu bakporo re nangia Raisa mbata.

³⁰ADano ki dua gu sese kpiahe re tipa yo; Yonatana nangia wiri Gerusoma na awiriko adu ni aboromotumo fu ngbatunga Dana dati rago zia yo yo ni zizi vo rogo ringara; Gerusoma nangia wiri Mose.

³¹Si du i adua ga Mika sese kpiahe ka irisa ha, nangia gu ko ambakadi, ni agu arago dunduko bambu Mbori adu Siro yo.