Read zande Abasapungbanga 2 Bible Online

Abasapungbanga 2 - zande bible

Abasapungbanga 2

¹Ga Yekova maraika ki ye Girigara yo ku Bokima yo. Ko ki ya, “Mi akusi roni ringara Ezipeta yo, ki ye na oni ku rogo gu ringara nga gu mi azunga he tipa ha fu abaroni. Mi aya, ‘Mi asá nga gi zungahe nga gu du dagba rani na oni wa sa te.

²Ka oni mángi nga mozunga na aboro gi ringara re ya. Oni akúadi gayo abamotumo ku sande.’ Ono oni agia nga sangbare te, Gini pai mangi oni were?

³Si du mi agumba ha ti ni ya, mi adó nga yo barangba roni ku sa yo te; ono i nikadu wa avuraroni, gayo ambori ki du ni nzingiripai fu roni.”

⁴Ho ga Yekova maraika agumba agi apai ni re fu awiri aYisaraere dunduko, aboro ki poi ku ari, ki nikpari ni aume.

⁵I ki yambu rimo gu ba re nga Bokima; i ki tumo ni motumo yo fu Yekova.

⁶Ho Yosua aasia aboro ni dunduko, awiri aYisaraere andu dunduko ni ba sa sa, gu ni sa kina gani rago ka dia gani ngbi.

⁷Aboro anamanga pa Yekova ti rago Yosua dunduko, na ti agu arago dunduko nangia ga agu abaakumba nanye ni ungayo fuo kpio Yosua, nangia agu yo nabi gu iiriwo apai dunduko Yekova amangi he fu aYisaraere.

⁸Yosua wiri Nuna ki kpi, nangia ga Yekova moyambu, garãko adu 110.

⁹I ki kpisidi ko kina rogo gako ringara nangia Timenata-erese, du rogo ringara abaagangara Efuraima yo, du ku nodiyo pati bagangara Gasa.

¹⁰Toro agu arika ngbatunga aboro re dunduko ki ga koyo du atitayo ni, fuo kpioyo. Gu kura rika ngbatungayo ki kuru ku ba yo, nga agu yo naina nga Yekova ya, na gu pai ko anamanga fu aYisaraere a ya.

¹¹Awiri aYisaraere ki nimángi gu pai nadu ni gbigbita ha bangiri Yekova, ki nimángi pa aBara.

¹²I ki mbu Yekova, nga ga abayo Mbori, nga gu ko nakusi yo ringara Ezipeta yo. I ki nipeke fuo kura ambori, nga agu ambori nga ga agu aboro naadu pati yo kirikiri. I ki ninugadi ku barangba ha, ki gara ga Yekova zinga ku ri yo.

¹³I ki mbu Yekova, ki nimángi pa aBara na pa Asetorete.

¹⁴Ga Yekova zinga ki rungudi kuti aYisaraere, ko ki fu yo ku be abagbarasiyo nga agu yo nanamanga yo. Ko ki bagi yo ku be avurayo ku pati yo kirikiri. Si du i arengba nga ka ru ti ni barangba avurayo berewe ya.

¹⁵Ho i anindu ku ho ni, be Yekova anidu kuti yo na kina gbigbitapai, a wa Yekova agumba ha, wa Yekova azunga he fu yo a; i ki du na bakere rungo gbe.

¹⁶Yekova ki nimoi abasapungbanga nga agu yo nabatasi aYisaraere be agu yo nanamanga yo.

¹⁷Ono i agia nga sangba gayo abasapungbanga te; bambiko i andu fuo kura ambori nimángi pai ni sino pa bari, ki ninugadi ku barangba ha. I ki sa tiyo ni ipo ti gu pai abayo anamanga ha, naagi ga Yekova rugute, ono i amanga nga wo te.

¹⁸Ho Yekova animoi abasapungbanga ni fu yo, Yekova ki du na gu basapungbanga re, ki nibatasi yo be avurayo ti gu rago dunduko naningia ga gu basapungbanga re; bambiko nungayo anamanga Yekova be ukayo ku be agu yo nanamanga yo nirungosi yo.

¹⁹Ono ho gu basapungbanga anikpi ni re, i ki nisa tiyo, ki niwasi tiyo ki susi abayo, nipeke fuo kura ambori ki nimángi pa ha, ki ninugadi ku barangba ha. I apiriga nga ti gu gayo mangaapai re, na gayo keretu a te.

²⁰Si du ga Yekova zinga arungudi ti ni kuti aYisaraere; ko ki ya, “Bambiko gi rikaaboro re aingi pai kuti gu gi zungahe nga gu mi arugu abayo kuti ni, ka i agia nga fugore ya;

²¹mi ni tire adó nga gu rikaaboro sa berewe ku sa yo barangba yo, dagba agu yo Yosua ambu yo ho ko akpi ni te.

²²Mi aásada aYisaraere ku be yo, si ngia i aká kuti gu pai nga ga Yekova ka amanga ha, a wa abayo anaka kuti ni. Watadu i aká nga kuti ni te.”

²³Si du Yekova ambu agu arikaaboro ti ni re, ka ko ado nga yo ni ipo ku sa yo ya, ko afu nga yo ku be Yosua a te.