Read zande Abasapungbanga 3 Bible Online

Abasapungbanga 3 - zande bible

Abasapungbanga 3

¹Were gere nga agu arikaaboro re Yekova ambu yo, ka asada aYisaraere ku be yo. I nga agu aYisaraere dunduko naaina nga pa gu sovura naadu Kanana yo ya.

²Si du arika ngbatunga aYisaraere ka ina pa sovura ti ni, Yekova yugu pa sovura fu agu yo aina nga pa ha mbata ya.

³Agu arikaaboro re du re: agbia bisue nangia ga aFereseto yo, na aKanano dunduko, na aSidono, na agu aIvo nanaraka Bagangara Rebanona yo, tona ti Bagangara Bara-erumona ki da ti ba rima ku Amata yo.

⁴I ki du tipa asada aYisaraere ku be yo, ka ina ha si ngia aYisaraere agia ga Yekova arugute, nga gu ko arugu abayo kuti ni ku ngba Mose.

⁵Si du awiri aYisaraere ki niraki dagba aKanano, na afifo, na aAmoro, na aPereso, na aIvo, na aYebuso a;

⁶i ki nirogo awiriyo i du ni adiayo, ki nifuku awiriyo nangia ade fu agu awiriyo nangia akumba. I ki nimangi pa gayo ambori.

⁷Awiri aYisaraere ki nimangi gu pai nadu ni gbigbita ha bangiri Yekova, bangiriyo ki go ti Yekova gayo Mbori. I ki nimangi pa a Bara na pa a Asera nga ngbama.

⁸Si du ga Yekova zinga arungudi ti ni kuti aYisaraere, ko ki fu yo ku be Kusanarisataima nangia bakindo Mesopotamia. Awiri aYisaraere ki ra fu Kusana-risataima garã ki du muambi.

⁹Ho awiri aYisaraere akpari ni fu Yekova, Yekova ki fu batasi fu yo, nangia Oteniere wiri Kenaza nabatasi yo. Kenaza ki ngia tame Kareba.

¹⁰Ga Yekova Toro ki ye ku ri ko, ko ki nisápu ngbanga dagba aYisaraere. Ko ki ndu ka so vura, Yekova ki fu Kusanarisataima bakindo Mesopotamia ku be ko; ko ki di be Kusana-risataima.

¹¹Si du ringara ki zeredi tipa garã 40. Oteniere ki kpi nangia wiri Kenaza.

¹²Awiri aYisaraere ki nimangi gu pai berewe nadu ni gbigbita ha bangiri Yekova. Yekova ki nyakasi Egerone bakindo Moaba kuti aYisaraere, bambiko i amangi gu pai nadu ni gbigbita ha bangiri Yekova.

¹³Ko ki dungura awiri aAmono fuo ko na aAmareko; ki ndu ki di be aYisaraere. I ki di bakporo ambiro.

¹⁴Awiri aYisaraere ki ra fu Egerone bakindo Moaba garã ki du 18.

¹⁵Ono ho awiri aYisaraere akpari ni fu Yekova, Yekova ki fu batasi fu yo nangia Euda wiri Gera, ni ngbatunga Benyamina, ni iragare. Awiri aYisaraere ki kedi rũhe fu Egerone bakindo Moaba ku be ko.

¹⁶Euda ki mbakadi basape na rindi he ue, bagizaha ki du wa bagiza mbiribe sa. Ko ki vo ho ku pa dimoko ku tii gako roko yo ku kumbabeko yo.

¹⁷Ko ki fu gu rũhe re fu Egerone bakindo Moaba. Egerone adu ni bakikii ko.

¹⁸Ho Euda anyasi pa fu rũhe ni, ko ki kedi agu yo natindi he ku sa yo.

¹⁹Ko ki karaga tiko pati gu sese kpiahe naadu Girigara yo, ki ya, “Ako bakindo, mi ye na wiri pa rondo foro.” Ko ki ya, “Mo óngo mbata.” Agu aboro naru pati ko i ki guari bara bangiriko dunduko.

²⁰Euda ki ndu koyo du ko ni wa ko asungu ni sa ko vuru umba bambuzere yo. Euda ki ya, “Sangba Mbori ngbare foro.” Ko ki guari auru gako basunga.

²¹Euda ki taĩ garebeko, ki mo gako basape dimoko ku kumbabeko yo, ki rũ vuko na ni.

²²Basape ki ga aga na penehe dũ, pasioko ki fu auru rindihe, mbiko ko amo nga basape vuko yo te; si ki kuru ku giiko yo.

²³Euda ki kuru ku ngbadimo yo, ki kisi angbadimo gu bambu re fuo ko, ki tapa ha.

²⁴Ho ko akuru ni ku zegi yo, ga bakindo amoyambu ki da. I ki bi angbadimo ni kisikisi he ni tapatapa ha. I ki berẽ he, “Si wa ko nabatasa tiko ku vuru bambuzere yo.”

²⁵I ki sungu daho zee azi yo ni; ka ko aza nga angbadimo bambuzere ya, si du i adi rifungura ti ni, ki za ha. I ki bi kina kangba gayo gbia si pi sande.

²⁶Wa i aima na sunga, Euda ki merẽ ki susi sese kpiahe, ki da ku Sira yo ki bati.

²⁷Ho ko ada ni, ko ki vu nambongo rogo ringara abaagangara Efuraima. Awiri aYisaraere ki zorõ na ko ringara abaagangara yo, ko ki ngbe ku mbata yo fu yo.

²⁸Ko ki ya fu yo, “Oni péke fuo re, bambiko Yekova fu aMoabo ku be roni nga avuraroni.” I ki zorõ fuo ko, ki di ga aMoabo basigo be yo ti Yaradene, ka si adu nga wa ka boro si sa ku mbiti no ya.

²⁹Ti gu rago re i ki imi aMoabo wa aboro 10,000, aboro nguru dunduko na nyanyaki aooro ni ngangarã yo a, a nga boro sa namerẽ te.

³⁰Si du ni gu uru re aMoabo ki ra fu aYisaraere. Ringara ki du zezeredi tipa garã 80.

³¹Fuo Euda Samagara ki du nangia wiri Anata. Ko aimi aFereseto wa aboro 600 na ngbondo marã ruga abagara; Samagara ki batasi aYisaraere a.