Read zande Abasapungbanga 6 Bible Online

Abasapungbanga 6 - zande bible

Abasapungbanga 6

¹Awiri aYisaraere ki nimángi gu pai nadu ni gbigbita ha bangiri Yekova. Yekova ki fu yo ku be aMidiano garã ki du saba.

²AMidiano ki nidi be aYisaraere. Awiri aYisaraere ki nimbakadi abandi tipa yo nga gu naadu rogo abaagangara yo be aMidiano, na asimbia, na nyanyaki aba.

³Ho aYisaraere animi tunga ni, aMidiano ki niye, na aAmareko, na aboro ku Uroyo, ki nizuba yo.

⁴I ki nizi bataya pati yo, ki nigbarasi agu ahe nanazuga ti sende, ki da ti ringara pati Gaza. Ka i ambu nga ũngba ringara aYisaraere yo ya, na akandoro, na abaabagara, na adongi wa sa a ya.

⁵Bambiko i aniye na gayo zogozogo anya na gayo abamburoko, ki niye wa kina ayere tipa nge yo. I na gayo akameri ange ki susi ba geda yo. I ki nigbarasi ringara wa i nirimi koyo.

⁶AYisaraere ki du ni onyaonya yo be aMidiano; awiri aYisaraere ki nikpari fu Yekova tipa undahe.

⁷Ho awiri aYisaraere akpari ni fu Yekova be aMidiano,

⁸Yekova akedi nebi koyo du awiri aYisaraere ni; ko ki ya fu yo, “Ya Yekova nga ga aYisaraere Mbori wẽ, Mi aye na oni Ezipeta yo, ki kusi roni kporo akanga yo.

⁹Mi abatasi roni be aEzipeto, na be agu yo dunduko nanambusa roni, mi ki nido yo barangba roni, ki nifu gayo ringara fu roni.

¹⁰Mi aya fu roni, ‘Mi nga Yekova nga gaoni Mbori; ka oni gúnde nga be ga aAmoro ambori ya, nga agu aboro oni araka rogo gayo ringara.’ Ono oni agia nga sangbare te.”

¹¹Ga Yekova maraika ki ye, ki sungu tii gu gero naadu Ofura yo, nangia ga Yoasa nangia boro Abiezere. Wiriko nangia Gidona ki nitaki zende ahe rogo gu ba i anapira bakakue rogo ho, ka oka ha be aMidiano.

¹²Ga Yekova maraika ki yugu tiko fu ko, ki ya fu ko, “Yekova du na mo, mo nga nyanyaki boro ni ngangarã ro.”

¹³Gidona ki ya fu ko, “Ako, bairare, ka Yekova nidu na ani, tipagine ka agi apai namanga rani ti ni re tie? Wari du gu gako iiriwo mangaapai ni dunduko tie, nga gu abarani anagumba pa ha fu rani, niya, ‘A nga Yekova nakusi rani Ezipeta yo, te?’ Ono awere Yekova ba rani aba ku sa yo, ki fu rani ku be aMidiano.”

¹⁴Yekova ki ta ngana ko, niya, “Mo ndú na gi ga tandu re, ka batasa aYisaraere be aMidiano; a nga mi nakeda ro, te?”

¹⁵Ko ki ya fu ko, “Ako Gbia, mi awíra pa batasa aYisaraere waĩ? Mo ngére, gi rika ni rungorungo ho ki susi dagba ngbatunga Manase, mi tigimi nga umba boro dagba ga buba aborokporo ki susi.”

¹⁶Yekova ki ya fu ko, “Ono mi adú na mo ni rengo, mo amánga aMidiano wa boro sa.”

¹⁷Ko ki ya fu ko, “Si ngia ngba mi angba bangiro awere, mo yúgu ngbaanga fere ya mo du nafu na mi.

¹⁸Mi nakpara foro, ka mo gúari nga erẽ ya, da kina ho mi ka ye ni fuo ro, ki kusi gi gamahe, ki moi he bara bangiro.” Ko ki ya, “Mi asúnga da kina ho mo ka ye ni berewe.”

¹⁹Gidona ki ndu ku kpuko yo, ki mbakadi wiri meme, na bete rukutu kpokuta naadu nga na agbooro ti ni ya, rengbe na ngungo wa aritere 37. Ko ki moi pasio ku baga yo, ki uka ime pasio ku akoro yo, ki ye na ni fuo ko ku tii gero yo, ki fu he fu ko.

²⁰Ga Mbori maraika ki ya fu ko, “Mo dí pasio na gu rukutu kpokuta adu nga na agbooro ti ni ya, ki moi he ku ri gi mbia re, ki uka ime pasio ku ri he.” Ko ki mangi he wo.

²¹Ga Yekova maraika ki taĩ gu ngbondo naadu be ko, ki rũ pasio na gu rukutu kpokuta adu nga na agbooro ti ni ya. We ki kuru ti gu mbia re, ki riti gu pasio re na gu rukutu kpokuta adu nga na agbooro ti ni ya. Ga Yekova maraika ki guari pati ko.

²²Gidona ki ini he ya ga Yekova maraika nidu. Gidona ki ya, “Ako, so, Gbia Mbori! Ani ngere bangirani na ga Yekova maraika.”

²³Ono Yekova ki ya fu ko, “Zereda dú foro; ka mo gúnde nga ya, mo akpi nga te.”

²⁴Gidona ki dua bamotumo ho fu Yekova, ki yambu rimoho nga, Yekova nga zereda. Si du Ofura yo rogo ga aAbiezere sende daku awere.

²⁵Ni kina gu uru re, Yekova ki ya fu ko, “Mo dí ga bamo babagara, kina gu ru nga ue babagara du garãru saba, mo ki ba gu bamotumo nga ga Bara du be bamo, ki dewe gu Asera nga ngbama du pati he.

²⁶Mo ki dua bamotumo fu Yekova nga gamo Mbori ku ri gi ngungungu gbata re ki tangara ambia nzunzu. Mo ki di gu ue babagara ki tumo na u ni zozo motumo na agu angua Asera nga ngbama mo ka dewa ha.”

²⁷Gidona ki rogo akumba bawe dagba avuruko, ki mangi a wa Yekova agumba pa ha fu ko. Ono bambiko ko agunde be ga bako aborokporo na be agu akumba naadu bakporo yo, ka si adu nga wa ka ko mangi he uru ya, ko ki mangi he yuru.

²⁸Ho agu akumba aguari ni ngba wiso, naadu bakporo yo, oni ngére, gu bamotumo nangia ga Bara si ki kuadi dú, gu Asera nga ngbama naadu pati he si ki du ni dewedewe he, gu ue babagara ki du ni ũmotumo auru gu bamotumo nga gu ko adua ha.

²⁹I ki ya dagba yo, “Da nimángi gi pai re?” Ho i asaka pa ha ni ni sana he, i ki ya, “Gidona du, wiri Yoasa, nimángi gi pai re.”

³⁰Agu akumba naadu bakporo yo i ki ya fu Yoasa, “Mo kúsi wiro, ko kpi, bambiko ko kuadi gu bamotumo nga ga Bara, ki dewe gu ngbama nidu pati he.”

³¹Yoasa ki ya fu agu yo naru pati ko dunduko, “Oni nadarã kango tipa Bara? Watadu oni abátasa ko? Gu ni nadarã kango tipa ko, i ími ni kina awere wiso. Ka ko du ni mbori kina ko dárĩ kango he ni tiko, bambiko i kuadi gako bamotumo.”

³²Si du ni kina gu uru re i ki yambu rimoko nga Yerubara, si wa ka i ya, “Kina Bara ka darĩ kango he ni tiko kuti ko,” bambiko ko nikuadi gako bamotumo.

³³AMidiano ki dungura tiyo na aAmareko na awiri ku Uroyo dunduko, i ki si Yaradene, ki zi bataya rogo Ngboongboorago Yizerere yo.

³⁴Ono ga Yekova Toro ki ye ku ri Gidona; ko ki vu nambongo, aAbiezero ki dungura tiyo fuo ko.

³⁵Ko ki kedi asunge ku rogo ga Manase ngbi dunduko; i ki dungura tiyo fuo ko a. Ko ki kedi asunge koyo du aAsera ni, na koyo du Zeburuna ni, na koyo du Nafatari ni; i ki ye ki gbia yo.

³⁶Gidona ki ya fu Mbori, “Ka si du wa mo abátasa aYisaraere ku be re, a wa mo agumba ha,

³⁷mo ngére, mi nikamaa mange kandoro sande bataka ahe yo. Ka ndomo ti kina ku auru mange kandoro sa, sende ki du ni ugu he pati he, mi ki ini he tie ya mo abátasa aYisaraere ku be re, a wa mo agumba ha.”

³⁸Si ki mangi wo, ho ko aguari ni ngba wiso, ki pirĩ mange kandoro, ki kama ndomo ti gu mange kandoro re, kurungbu ki hi be ime.

³⁹Gidona ki ya fu Mbori, “Ka ga zinga rúngudi nga kuti re ya, mi nagumba kina gi pai sa re; mi nakpara foro, mo ídi he ya mi ásadi pai na mange kandoro berewe kina bara sa gbua. Mo ídi he mange kandoro dú ni ugu he, ono ndomo ki du kina ti sende.”

⁴⁰Mbori ki mangi he wo ni kina gu yuru re; bambiko kina mange kandoro nadu ni ugu he, ndomo ki du ti sende.