Read zande Abasapungbanga 8 Bible Online

Abasapungbanga 8 - zande bible

Abasapungbanga 8

¹Aboro Efuraima ki ya fu Gidona, “Tipagine mangi mo rani ti ni were, ka mo ayamba nga rani ya, ho mo andu ni ka so vura na aMidiano?” I ki poi na ko gbe.

²Ko ki ya fu yo, “Gini pai mangi mi ringbisi he na gaoni? A nga ga Efuraima futu rindi kakue ngba susi ga Abiezere boro rindi kakue te?

³Mbori afu abazogo aMidiano ku be roni, nangia Orebe na Zeeba. Gine mi arengbe ka manga ha tigimi ringbisi he na gaoni?” Ho ko agumba gi pai ni re, gayo zinga kuti ko ki zeredi.

⁴Gidona ki ye ku Yaradene yo, ki si ku mbiti yo, ko na agu aboro 300 naadu na ko, wa i avura du rurungbura ono i ado fuo yo kindi.

⁵Ko ki ya fu aboro Sukota. “Mi nazungadi roni, oni fú udiudi kpokuta fu agu aboro napeka re; bambiko he namaka yo, mi nado fuo Zeba na Saremuna, na abakindo aMidiano.”

⁶Abazogo Sukota ki ya. “Zeba na Saremuna du be ro awere, ka ani fu kpokuta fu gamo arimbasa aborosovura?”

⁷Gidona ki ya, “Ono ho Yekova ka fu Zeba ni ku be re na Saremuna, mi atá bororoni na agu akiwe du ngbakungba yo na sakokoso a.”

⁸Ko ki guari yo ki ndu ku Penuere yo, ki gumba pai fu yo a wo; aboro Penuere ki karaga pai a wa aboro Sukota akaraga ha.

⁹Ko ki gumba pai fu aboro Penuere a, ki ya, “Ho mi ka yega ni na zereda, mi akuadi gi kirikiri gbata re ku sande.”

¹⁰AZeba na Saremuna adu Karukora yo, na gayo rimbasa aborosovura na yo, wa aboro 15,000, nga agu yo nanye dagba gu rimbasa aborosovura nangia awiri aboro ku Uroyo; bambiko i akpiki wa aboro 120,000 nga agu yo nanamo basape.

¹¹Gidona ki ndu ngba gu gene du pati araki rogo abamburoko pati Noba na Yogeba ku uroyo, ki mangi rimbasa aborosovura; bambiko rimbasa aborosovura aberẽ he tigayo i oko tiyo wenengaĩ.

¹²AZeba ki oro na Saremuna; ko ki do fuo yo, ki zi agu abakindo aMidiano ue re, nga Zeba na Saremuna, ki mangi rimbasa aborosovura gbe dunduko.

¹³Gidona wiri Yoasa ki yega gene vura yo ti ba dakpa ku Erese yo.

¹⁴Ko ki zi paranga kumba nangia boro Sukota, ki sana ko; ko ki ke rimo abazogo Sukota fu ko, na abaakumba bakporo a, wa aboro 77.

¹⁵Ko ki ye koyo du aboro Sukota ni, ki ya, “Oni bí nga Zeba na Saremuna, nga agu yo oni auma re tipa yo, niya, ‘AZeba na Saremuna be ro awere, ka ani fu kpokuta fu gamo aboro nga agu yo nambu?’ ”

¹⁶Ko ki rogo abaakumba kporo, ki rogo akiwe du ngbakungba yo na sakokoso, ki ta aboro Sukota na ni.

¹⁷Ko ki kuadi gu kirikiri gbata naadu Penuere yo ku sande, ki imi aboro bakporo.

¹⁸Ko ki ya fu Zeba na fu Saremuna. “Agu aboro oni aimi yo Tabora yo i adu ni gini ngbatunga aboro?” I ki karaga ha, “Wa du mo, wo i adu a, i dunduko; i awiri kina awiri bakindo.”

¹⁹Ko ki ya, “I adu ni awirinami, nikinaawirinina. Wa du Yekova ni ungako, ka oni abatasi yo ni ungayo, ka mi imi nga roni te.”

²⁰Ko ki ya fu Yetere nangia bambata wiriko, “Mo mó ku ari, ki imi yo.” Ono paranga amo nga gako basape te, bambiko ko agunde, bambiko wa ko adu ni paranga.

²¹Zeba na Saremuna ki ya, “Mo mó ku ari tigamo, ki imi rani, bambiko wa du pa kumba, kina wo du pa gani ngarã.” Gidona ki mo ku ari, ki imi Zeba na Saremuna, ki rogo agu aũfongo re naadu gorõ gayo akameri naadu wa kpia fogo diwi.

²²Aboro aYisaraere ki ya fu Gidona tie. “Mo zógo rani tigamo awere, mo, na wiro, na titaro a; bambiko mo batasi rani be aMidiano.”

²³Gidona ki ya fu yo. “Mi azóga nga roni tigimi te, wire azóga nga roni a te; kina Yekova nikazoga roni.”

²⁴Gidona ki ya fu yo, “Mi nakpi nyemu ka sana roni tipa he; oni nga akumba dunduko ni ba sa sa, oni fúku gu gaoni atongo fere nangia ga ũgbuahe.” Bambiko atongo dahabu adu be yo, bambiko i adu ni aYisamaere.

²⁵I ki karaga ha, “Ani afú he afu foro na nyemuhe.” I ki gbaragi remu sande, akumba ni ba sa sa dunduko ki ba gayo gbugbu atongo.

²⁶Barõa atongo dahabu nga gu ko asana yo tipa ha, si adu wa asekere dahabu 1,700; gbiakuti aũfongo ni kpia fogo diwi, na aufongo gose, na gu ngungungu remu naadu ti abakindo aMidiano, na agu aufongo gose naadu ti gorõ gayo akameri.

²⁷Gidona ki mbakadi efoda na ni tipa irisa ha, ki moi he rogo gako bakporo nga Ofura. AYisaraere dunduko ki ndu koyo fuo ho ki mangi pai ni sino pa bari fu he, si ki du ni ũkota fu Gidona, na fu gako aborokporo.

²⁸Si du aMidiano adu ti ni ni zogozogo yo fu awiri aYisaraere, ka i atúmba nga riyo berewe ku ari ya. Ringara ki du zezeredi ti rago Gidona tipa garã 40.

²⁹Yerubara wiri Yoasa andu ki ga ku kpuko yo.

³⁰Awiri Gidona adu 70, nangia agu yo ko avungu yo; bambiko adiako adu ni dungu yo.

³¹Gu de badia naadu Sekeme yo, ri abatika kumbagude a fu ko, ko ki yambu rimoko nga Abimereke.

³²Gidona ki kpi nangia wiri Yoasa wa ko aima gbe garãko ki nge ange ki susi, i akpisidi ko ku rogo ga Yoasa murã nangia bako, naadu Ofura yo nangia ga aAbiezere bakporo.

³³Si ki ta du wa gere, ho Gidona akpi ni, awiri aYisaraere ki sa tiyo berewe ni ba sa, ki ndu fuo aBara ki mangi pai ni sino pa bari, i ki sa Bara-berita ni gayo mbori.

³⁴Were, ka awiri aYisaraere atingida nga pa Yekova gayo Mbori berewe ya, nga gu ko nanabatasa yo be avurayo dunduko nanidu nati yo kirikiri;

³⁵ka i ayugo nga weneringise fu ngbatunga Yerubara, nangia Gidona, wa gu weneringise ko anayugo fu aYisaraere a ya.