Read zande Abasapungbanga 9 Bible Online

Abasapungbanga 9 - zande bible

Abasapungbanga 9

¹Were, Abimereke nangia wiri Yerubara ki ndu ku Sekeme yo, koyo du akawiri nako ni, ki fura na yo, na ga ba nako rika ngbatunga, ki ya,

²“Mi nazungadi roni, oni gúmba pai ku tu aboro Sekeme yo dunduko, ‘Gini pai ngba tipa roni, watadu awiri Yerubara dunduko nga aboro 70 zogo roni, na boro sa zogo roni?’ Oni tingidi pa re a ya mi nga meme sa na oni, na pasio a sa.”

³Akawiri nako ki gumba pa ko ku tu aboro Sekeme yo dunduko, na pa agi apai dunduko a re. Kpotoyo yo ki nikpi nyemu ka peka Abimereke, bambiko i aya, “Ko nga wirinarani.”

⁴I ki kusi feda fu ko 70 rogo bambu Bara-berita yo. Abimereke ki ngbe kungba aboro na ami nangia azanga rugatinapai, nangia agu yo nanapeka ko.

⁵Ko ki ndu ku bako yo Ofura yo, ki imi awiribako nangia awiri Yerubara naadu wa aboro 70, ku ri mbia sa. Ono Yotama nangia ga Yerubara kiaro ki bati; bambiko ko agbu agbu.

⁶Aboro Sekeme ki dungura tiyo dunduko, na aboro Bete-miro dunduko, i ki ndu ki moi Abimereke ni bakindo, pati gu gero naadu pati gbata Sekeme yo.

⁷Ho i agumba pa ha ni fu Yotama, ko ki ndu ki ru ri bagangara Gerizima yo, ki tuka ngbako ki ya fu yo ku ari, “Oni nga akumba Sekeme, oni gí sangbare, Mbori ki gi fugoroni.

⁸Ni gu rago angua andu ka sia bakindo si zogo ho; si ki ya fu eraya, ‘Mo zógo rani.’

⁹Ono eraya ki ya fu he. ‘Mi mbú gi nzeme, nga gu i nairisa Mbori na ni na aboro a mbiko re, ka ndu ka wo awo ku bani ku ri angua?’

¹⁰Angua ki ya fu vurumo, ‘Mo yé, ki zogo rani.’

¹¹Ono vurumo ki ya fu he, ‘Mi mbú gi nzira, na gi wene zuzuhe, ka ndu ka wo awo ku bani ku ri angua?’

¹²Angua ki ya fu bakakue. ‘Mo yé ki zogo rani.’

¹³Bakakue ki ya fu he, ‘Mi mbú gi imekakue, nga gu nafu wasa fu Mbori na aboro a, ka ndu ka wo awo ku bani ku ri angua?’

¹⁴Angua dunduko ki ya fu kiwe, ‘Mo yé ki zogo rani.’

¹⁵Kiwe ki ya fu angua, ‘Ka si du ni rengo ya oni namaa re ni bakindo ka zoga roni, oni yé tie, ka gbu ku tii nzeremere. Ono ka si adu nga wo ya, we kúru kiwe yo, ki riti ngua kupuresa Rebanona yo.’

¹⁶“Were, ka si adu wa oni amangi pai ni rengo ni ruruhe, wa oni amoi Abimereke ni bakindo, ka si adu wa oni amangi pa Yerubara wenengaĩ na gako aborokporo, ki nimangi fu ko rengbe na fuo ga beko sunge―

¹⁷bambiko buba aso vura tipa roni, ki bagi ungako, ki batasi roni be aMidiano;

¹⁸oni mo ku ari areme kuti ga buba aborokporo, ki imi awiriko wa aboro 70, ku ri mbia sa, ki moi Abimereke nangia wiri kanga, ni bakindo ku ri aboro Sekeme, bambiko ko nga wirinaroni―

¹⁹ka si nidu wa oni nimangi pai ni rengo ni ruruhe fu Yerubara na gako aborokporo areme, oni ngí mbiko Abimereke, ko ki ngi mbiko roni a;

²⁰ono ka si adu nga wo ya, we kúru ti Abimereke, ki riti aboro Sekeme, na aboro Bete-miro a, we kúru ti aboro Sekeme, na ti aboro Bete-miro a, ki riti Abimereke.”

²¹Yotama ki oro ku sa yo, ki ndu ku Bera yo, ki nye yo, bambiko gunde Abimereke nangia wiribako.

²²Abimereke ki du ni bazogo aYisaraere tipa garã biata.

²³Mbori ki kedi gbigbita toro ka kpara dagba Abimereke na aboro Sekeme; aboro Sekeme ki nimangi pai ni biriki fu Abimereke.

²⁴Si du gu zuu i amangi awiri Yerubara na ni, nangia aboro 70, si ki ye ku ri Abimereke nangia wiribayo, na pa kureyo a, nangia gu ko naimi yo, na ku ri aboro Sekeme a, nanyakasi beko ko imi awiribako.

²⁵Aboro Sekeme ki moi abamoirago ri abaagangara tipa ko, i ki tuka ahe be agu aboro dunduko nanasusa pati yo; i ki gumba ha tu Abimereke.

²⁶Gara ki ye na awirinako nangia wiri Ebede, ki susi ku Sekeme yo, aboro Sekeme ki nikida kuti ko.

²⁷I ki kuru ku ati yo ki dungura rindi bakakue, ki simbi he, ki fu tambuahe, ki nindu ku rogo bambu gayo mbori yo, ki niri he ki nimbiri he, ki nisenge Abimereke.

²⁸Gara nangia wiri Ebede ki ya. “Da nga gi Abimereke re, da nga Sekeme, ka ani ra fu ko? A nga wiri Yerubara na Zebura nga gako barutirivura ra fu aboro Amora nangia ba Sekeme te? Ono tipagine tie ka ani ra ti ni fu ko tigaani?

²⁹Ako, ka i ídi he ya agi aboro re du tii be re! si ka mi di Abimereke ti ni ku sa yo.” Ko ki ya fu Abimereke, “Mo ngéesi gamo rimbasa aborosovura, ki kuru.”

³⁰Ho Zebura nangia bazogo bakporo agi ga Gara apai ni nangia wiri Ebede, gako zinga ki rungudi.

³¹Ko ki kedi asunge koyo du Abimereke ni ku Aruma yo, ki ya, “Mo ngére, Gara nga wiri Ebeue aye ku Sekeme yo na awirinako, i nawo ti aboro bakporo i mo kuti ro.

³²Awere tie, mo mó ku ari yuru, mo na agu aboro du na mo, ki sungu aati yo.

³³Si du wiso ho uru ka kura ni, mo ki guari ngbatutu, ki gba ku bakporo yo. Ho ko na agu aboro du na ko ka kura ni kuti ro, mo ki rengbe na manga fu yo a wa mo ka bi yo.”

³⁴Abimereke na agu aboro dunduko naadu na ko ki guari yuru, i ki moi rago pati Sekeme wa rika aboro biama.

³⁵Gara nga wiri Ebede ki kuru ki ru ba rima ku bakporo yo; Abimereke na agu aboro naadu na ko ki guari ku ari bamaarago yo.

³⁶Ho Gara aoi aboro ni, ko ki ya fu Zebura, “Mo ngére, aboro naye ri abaagangara yo!” Zebura ki ya fu ko, “Mo nabi kirima abaagangara wa kina aboro du.”

³⁷Gara ki gumba pai berewe, ki ya, “Mo bi nga, aboro naye bebere ringara yo re, rikayo sa naye gene gu gero du Monenima yo.”

³⁸Zebura ki ya fu ko, “Pai ngbaro awere! mo gu naaya, ‘Da nga Abimereke, ani ka ra fu ko?’ A nga agi aboro re nga agu yo mo agindiga yo te? Mo kúru awere, ki so vura na yo.”

³⁹Gara ki kuru ki ndu ku mbata yo fu aboro Sekeme, ki so vura na Abimereke.

⁴⁰Abimereke ki do ko, ko ki oro be ko; agu yo naahokõ i atiwi ni dungu yo, dati kina ba rima ku bakporo yo.

⁴¹Abimereke ki nye kina Aruma yo; Zebura ki do Gara ku sa yo na awirinako, ka i arengba nga na nye Sekeme yo ya.

⁴²Si ki du wiso, wa aboro akuru ku aati yo; i ki gumba pa ha fu Abimereke.

⁴³Ko ki rogo gako aboro, ki kparaka yo wa rika biata, ki nimoi rago aati yo. Ko ki ya ngere, aboro nikuru bakporo yo, ko ki mo kuti yo, ki imi yo.

⁴⁴Abimereke na gu rika naadu na ko, ki oro ku mbata yo, ki ru ba rima ku bakporo yo, agu arika ue ki oro sa agu yo naadu ati yo dunduko, ki imi yo.

⁴⁵Abimereke ki so vura kuti bakporo ni gu uru re dunduko; ko ki di bakporo ki imi agu aboro naadu yo. Ko ki futuka bakporo ku sande, ki gbaragi tikpo ku ba ha.

⁴⁶Ho aboro gu kirikiri gbata nga Sekeme agi he ni dunduko, i arimi ku sima yo naadu tii gu oambu nga ga gu mbori nga Berita.

⁴⁷I ki gumba pai fu Aoimereke ya aboro gu kirikiri gbata nga Sekeme re adungura tivo dunduko wa sa.

⁴⁸Abimereke ki ndu ku Gangara Saremona yo, ko na agu aboro dunduko naadu na ko. Abimereke ki di mangua ku be ko, ki de bengua na ni, ki tumba ha, ki moi he ku pagorõko. Ko ki va fu agu aboro naadu na ko. “Gu pai oni abi re mi nimangi he, oni ípisi tironi, ki mangi he kina a wo.”

⁴⁹Aboro dunduko ki dewe gayo bengua a wo, ki nipeke fuo Abimereke, ki moi he ku sima yo, ki ginda we kuti ni. Si du aboro gu kirikiri gbata nga Sekeme akpi ti ni a, i adu wa aboro 1,000 akumba na ade.

⁵⁰Abimereke ki ndu ku Tebese yo, ki zi bataya kuti Tebese, ki di he.

⁵¹Ono nyanyaki kirikiri gbata adu bebere bakporo yo, aboro bakporo dunduko nga akumba aoro koyo na ade, i ki kisi tiyo koyo; ki dakpa ku ri kirikiri gbata yo.

⁵²Abimereke ki da pati kirikiri gbata ki so vura kuti ni, ki ndu sa ngbadimo nyanyaki ka zo ho ni we.

⁵³Ono de sa aba wiri mbia saahe ku ri Abimereke, si ki kiti meme riko.

⁵⁴Ko ki yambu gu paranga ni ngarã natindi gako ũvura, ki ya fu ko, “Mo mó ga basape ki imi re, ka boro yá nga ‘De imi re’, ya.” Gako paranga ki rũ ko puu, ko ki kpi.

⁵⁵Ho aboro aYisaraere abi he ni ya Abimereke kpi, i ki ga ku kpuyo yo a dunduko.

⁵⁶Si du Mbori airi bape gu gbigbitapai ti ni nga ga Abimereke, nga gu ko amangi bako na ni, ni imo awiribako 70;

⁵⁷ga aboro Sekeme gbigbitapai dunduko Mbori airi bape he kina ku ri yo. Gu motiwa nga ga Yotama wiri Yerubara ki ye ku ri yo a.