Read zande Yugoti 1 Bible Online

Yugoti 1 - zande bible

Yugoti 1

¹Gu yugoti nga ga Yesu Kristo, nga gu Mbori afu he fu ko ko yugu he fu gako amoyambu, nga agu apai nikamanga mbembedi. Ko ki kedi he ku be gako maraika ki niyugu he fu gako moyambu nga Yoane;

²nga gu ko naadu ni dezire ga Mbori pai, na gu dezire nga ga Yesu Kristo, tipa agu apai dunduko ko abi.

³Boro maku nga gu ni nageda gi gumbapai re, na agu yo nagia ha, ki nika kuti agu apai du ni keke he rogo ho; bambiko ragoho nikada.

⁴Yoane fu agu akanisa saba du Asia yo: Undahe dú na oni, na zereda, be gu ko du ho, nga gu ko nadu ho mbata, nga gu ko nikaye; na be agu atoro du saba barangba gako mbatabakindo;

⁵na be Yesu Kristo, nga ndikidi dezire, bambata vungu be kpio, nga bazogo abakindo zegino. Gu ko nakpi nyemu rani, nizundu rani be gaani ingaapai ni kureko;

⁶ani du ni aboro ngbi ki du ni aboromotumo fu gako Mbori nga Bako; taarimo dú fu ko na tandu nye anye kindi. Amina.

⁷Oni ngére, ko naye rogo mai; bangiri aboro abí ko du nduko, na agu yo naarũ ko; ngbatunga aboro arúngo mbiko ko zegino dunduko. Wo du he, Amina.

⁸Mi nga Arufa na Omega nga tonatona he na digida ha wo poi Gbia Mbori, nga gu ko du ho, nga gu ko naadu ho mbata, nga gu ko nikaye, du na tandu apai dũ.

⁹Mi, Yoane, nga wirinaroni nga badi gu rungo na oni, na gu ngbi na gu hipai du rogo Yesu yo, mi adu rogo gu kisanga i niya ti ni Patemo, mbiko gu pai nga ga Mbori na gu dezire pai nga ga Yesu.

¹⁰Mi adu rogo Toro yo ti rago Gbia, mi ki gi bakere fugo ku giire yo, wa woro kpangi, naya,

¹¹“Gu pai bi mo, mo ké paha waraga yo, ki kedi he fu agu akanisa du saba; ku Efesa yo, na Semuruna yo, na Perugamona yo, na Tuatira yo, na Sarudi yo, na Firaderufia yo, na Raodikiya yo.”

¹²Mi ki birĩ tire ka bi gu boro napaa kono du mi ni. Ho mi abirĩ tire ni mi ki bi abaduawe saba ni dahabu;

¹³dagba abaduawe yo gu ko ki du sa wa kina wiri boro, ni ukadiukadi ko na gbanga remu dati kpenduko, na giri dahabu ti ngbaduko.

¹⁴Mangeriko ki du ni vuvuru he wa pusi mange kandoro, ki du adu kpou wa moroumba; bangiriko adu wa mirãwe;

¹⁵nduko ki du wa taataa sirigi, i ambakadi he gbigiwi yo; fugoko adu wa paa dungu aime.

¹⁶Ko ki du na akerekuru saba rogo kumbabeko, tĩtĩ basape akuru ngbako yo na rindihe ue, ngbanyako ki du wa uru nahasa rago bebere uru.

¹⁷Ho mi abi ko ni, mi ki ti pati nduko wa gu boro nikpi akpi. Ko ki ta maa kumbabeko auru re, niya, “Ka mo gúnde nga ya; mi nga bambata ko na yangara ko, nga gu ko du ni ungako;

¹⁸mi akpi, mo ngére, mi ni ungare nye anye kindi, mi ki du na awiri arifungura be re nga ga kpio na ga Adisi.

¹⁹Mo ké pa agu apai mo abi, na agu apai du ho, na pa agu apai nikamanga ku mbata yo;

²⁰gu gbugbu pai nga ga agu akerekuru du saba mo abi rogo kumbabere, na agu abaduawe ni dahabu du saba. Agu akerekuru du saba nga agu amaraika nga ga agu akanisa du saba; agu abaduawe ni dahabu du saba nga akanisa saba.