Read zande Yugoti 11 Bible Online

Yugoti 11 - zande bible

Yugoti 11

¹I ki fu gbaka fere wa kina ngbondo tipa ringbisa ahe na ni. I ki ya fere, “Mo gúari ki ringbisi gu yekaru nga ga Mbori, na bamotumo, na agu yo nafu irisa rogo ho.

²Gu vurukporo du ku zegi yekaru yo mo he he, ka mo ringbisi nga ha ya; bambiko i fu he fu azangasinombori. I asímba ziazia bakporo diwi ki du 42.

³Mi aásia pa gumba pai wa nebi fu gimi adezire ue, du ni ukadiukadi yo ni mbuzaroko, rame ki du 1,260.”

⁴Agi yo re nga agu angua eraya ue na agu abaduawe ue ru barangba Gbia kpotosende.

⁵Ka boro akpi nyemu ka manga yo gbegberẽ, we ki kuru ngbayo yo ki gbarasi avurayo. Were ka boro akpi nyemu ka manga yo gbegberẽ, i ki imi ni kina wo.

⁶Agi yo re adu na tandu rengbe na kisa ngbangbaturũ yo, ka mai ana nga ni gu rago i nagumba pai ya. Tandu adu ti yo ku ri aime a, ka sa ha ni kure na ka gbarasa kpotosende ni agberãngbi dunduko wa i akpi nyemu he.

⁷Ho i ka digisa gayo dezirepai ni, gu nyarinde nakura rogo gu due zanga mburuhe, u asó vura na yo, ki di be yo, ki imi yo.

⁸Kangbayo ki piki ngba gene bakere bakporo, nga gu i niya ti ni rogo pa sanza yo, Sodoma na Ezipeta, yo i awagi gayo Gbia ni a.

⁹Agu yo dagba aboro, na ngbatunga aboro, na ngbatunga afugo, na arikaaboro ki ningana kangbayo uru ki du biata na bebere he, ka i aida nga i kpisidi kangbayo ku murã yo ya.

¹⁰Agu yo naraka auru kpotosende, i ki sambua tiyo pati yo, ki ningi angi; i ki nikedi atisa dagba yo, mbiko agi anebi re ue i arungosi agu yo naraka auru kpotosende.

¹¹Fuo uru biata na bebere he onga unga ki ye be Mbori ki rimi ku rogo yo yo berewe, i ki ru ku ari; bakere gunde ki zi agu yo nabi yo.

¹²I ki gi bakere fugo ngbangbaturũ yo, si niya fu yo, “Oni yé ku ari no!” I ki ndu ku ari ngbangbaturũ yo rogo dubo, avurayo ki bi yo.

¹³Ni kina gu rago re bakere bazigizo ki du, gu bawe papara bakporo ki ti; agu yo nakpi be bazigizo, i adu wa aboro 7,000. Yangara yo ki gunde agunde gbe, i ki fu taarimo fu Mbori du ngbangbaturũ yo.

¹⁴Gu ue rungo susi; oni ngére, gu biata rungo naye ni ipo.

¹⁵Gu saba maraika ki vu mbanya, bakere afugo ki du ngbangbaturũ yo, si ki niya, “Gu ngbi nga ga kpotosende nga gu ngbi nga ga gaani Gbia, na ga gako Kristo, ko azóga ha nye anye kindi.”

¹⁶Agu abaakumba 24 nasungu auru gayo mbatabakindo barangba Mbori, i ki vagadi ku sende ni kpakpuyo, ki irisi Mbori,

¹⁷niya, “Ako Gbia Mbori, du na tandu apai dũ, ani nafu tambuahe foro nga gu ko du ho, nga gu ko nadu ho mbata, bambiko mo di ga bakere tandu ki du ni bazogo.

¹⁸Arikaaboro azingi, ga zinga ki ye, na rago sapangbanga kangba aboro, na rago fu mosoro fu gamo amoyambu nga anebi, na fu gamo aboro, na fu agu yo nagunde ti rimoro, watadu umba pa yo na kikindigi pa yo, na rago gbarasa agu yo nagbarasa kpotosende.”

¹⁹Were i ki za ga Mbori yekaru, nga gu du ngbangbaturũ yo; i ki bi gu sanduki nga ga gako ndika rogo gako yekaru; fuo gere aikpira gumba ki du, na afugo, na agumba, na bazigizo, na morogumba ni bakere he a.