Read zande Yugoti 12 Bible Online

Yugoti 12 - zande bible

Yugoti 12

¹Bakere yuguyugupai ki du ngbangbaturũ yo; de ki du ni ukadiukadi ri na uru, diwi ki du tii nduri yo, gari kpakpari nangia akerekuru bawe na ue.

²Ri agbe na gude, ri ki ta kpara niimi aima be pa batika.

³Kura yuguyugu he ki du ngbangbaturũ yo; oni ngére, bakere zamba daragona ki du, na ariru saba na agbangaru bawe, akpakpari ki du auru ariru yo saba.

⁴Saru ki gbe gu biata papara akerekuru ngbangbaturũ yo, ki ba ra ku sende yo. Daragona ki ru barangba gu de nikabatika, ya ho ri ka batika ni, u ki riti wiriri.

⁵Ri ki batika wiriri, nga kumbagude, nga gu ko nikazoga arikaaboro dunduko ni ngbondo marã. I ki di wiriri adia ku ari yo du Mbori ni, koyo du gako mbatabakindo ni.

⁶De ki oro ku ngbakungba yo, yo Mbori ambakadi ba ni tipa ri, i ka mbu ti ri yo rame ki du 1,260.

⁷Vura ki du ngbangbaturũ yo, Mikaere na gako amaraika ki so vura na daragona; daragona ki niso vura na gako amaraika a;

⁸ka daragona adia nga be he ya. Ka i aida nga fu daragona na gako amaraika i bi ba berewe ngbangbaturũ yo ya.

⁹Were i ki ba bakere daragona ku sende yo, nga gu bakuru wo, nga gu ko i aniya ti ko, Bakitingbanga nga Satana, nga banangi aboro kpotosende yo dunduko; i ki niba ko ku sende yo na gako amaraika a.

¹⁰Mi ki gi bakere fugo ngbangbaturũ yo niya, “Awere bata da na tandu, na gu ngbi nga ga gaani Mbori, pa zoga ahe ki du ni ga gako Kristo; bambiko i aba bakitingbanga awirinarani ku sende yo, nga gu ko nakiti ngbanga awirinarani barangba gaani Mbori na uru na yuru.

¹¹I adi be ko mbiko gu kure nga ga Wiri Kandoro, na mbiko gu pai i agumba ni dezirehe, pa ungayo adu nga bangiriyo te, ka i vura kpi vurũ.

¹²Ako angbangbaturũ, si du ka oni ngi angi ti ni, na agu roni naraka rogo ho. Rungo du fu kpotosende na baime, bambiko bakitingbanga azorõ koyo du oni ni na bakere zinga, bambiko ko ini he ya kina bete rago nye fu ko.”

¹³Ho daragona abi he ni ya, aba ru ku sende yo, ko ki do fuo gu de nabatika gu kumbagude re.

¹⁴I ki fu pupo bakere dingimo ue fu gu de re, ri gu ku ngbakungba yo, yo du gari ba ni, i ki mbu ti ri yo tipa rago, na arago, na bebere rago, gii bangiri daragona.

¹⁵Ko ki uka ime ngbako yo fuo gu de re wa kina di, si fu na ri ku sa yo.

¹⁶Were kpotosende ki unda gu de re, kpotosende ki za ngbaha ki mbiri gu ime daragona auka ngbako yo.

¹⁷Daragona ki zingi gbe fu gu de re, ki ndu ka so vura na yangara awiriri, nga agu yo naka kuti ga Mbori rugute, na agu yo naka kuti gu dezire pai nga ga Yesu.

¹⁸Daragona ki ru auru ngume, ti ngba baime.