Read zande Yugoti 13 Bible Online

Yugoti 13 - zande bible

Yugoti 13

¹Mi ki bi nyarinde, u nikuru baime yo, gbangaru adu bawe na ariru saba, akpakpari bawe ki du auru agbangaru, i ake arimo gberãngba yo auru ariru.

²Gu nyarinde mi abi ru, u ki wiri mama, anduru ki du wa ndu gu nya nga urisi, ngbaru ki du wa ngba bahu. Daragona ki fu gako tandu fu ru, na gako mbatabakindo, ko ki asia pa bakere bazogo fu ru a.

³Mi ki bi gu riru sa wa ka i ata ha si ndu sa kpio; oro kpioru ki wi; pa nyarinde ki iriwo ti aboro kpotosende dunduko;

⁴i ki irisi daragona bambiko ko aasia pa gako zogarago fu nyarinde. I ki irisi gu nyarinde, niya, “Da du wa nyarinde? Da rengbe na so vura na u?”

⁵I ki fu ngba fu ru ka gumba bakere apai na agberãngba yo, i ki asia pai fu ru u mangi gau sunge diwi ki du 42.

⁶U ki za ngbaru ni agberãngba yo kuti Mbori, na ka gberã ngbaru yo kuti rimoko, na kuti gako banye, na agu yo naraka ngbangbaturũ yo.

⁷I aasia paha fu ru u so vura na ga Mbori aboro, ki di be yo. I ki asia pa zoga ngbatunga aboro fu ru, na aboro, na ngbatunga afugoyo, na rika aboro.

⁸Agu yo dunduko naraka auru kpotosende i aírisa ru, nga agu yo dunduko rimoyo adu nga ni keke he ho rago aenge ni rogo gu kitabu unga yo ya, nga ga gu Wiri Kandoro i aimi ru.

⁹Gu ni du na tu gia ha ti ni, ni gí he:

¹⁰Gu boro i aringbisi ni sa kisa ni, i akísa kina ni, na gu boro i aringbisi ni sa kpio, i aimo kina ni a. Mbiko gere ga Mbori aboro ka du na hipai na idapase ti ni.

¹¹Mi ki bi kura nyarinde u nikuru sende yo; gbangaru adu ue wa ga wiri kandoro, u ki nigumba pai wa daragona.

¹²U ki mangi agu apai i aasia pa ha fu gu bambata nyarinde ku bangiriru. U ki sa kpotosende na agu yo naraka auru he, i irisi bambata nyarinde, nga gu ru i ahusi oro kpioru.

¹³U ki mangi bakere yuguyugu apai, wa ka u mangi we si zorõ ngbangbaturũ yo ku sende no ku bangiri aboro.

¹⁴U ki biriki agi yo naraka auru kpotosende ni agu apai i aina apai ti ni i aasia pa ha fu ru ku bangiri nyarinde; niya fu agu yo naraka auru kpotosende, i mbakadi kpia nyarinde fu aboro i irisi ru, nga gu ru i adewe ru ni basape, u ki nye ni ungaru.

¹⁵I ki asia pai fu ru u fu onga fu kpiahe, fu kina gu kpiahe nga ga nyarinde, kpia nyarinde ki rengbe na fura, na ka tina kpio fu agu yo dunduko aida nga ka irisa kpia nvarinde ya.

¹⁶U ki tina ha fu aboro dunduko, watadu umba pa yo na kikindigi pa yo, watadu kumukokumuko yo na rungorungo yo, watadu adukpuru na akanga, i nogodi he ti yo, watadu ti kumbabeyo na ngbanda kpakpuyo;

¹⁷ya ka boro rengbe nga na ngbe ahe na ka baga ahe wa sa ya, kina agu yo i anogodi he ti yo, watadu rimo nyarinde na gu nimira nga ga rimoru.

¹⁸Tatamana du erẽ. Gu ni du na rugatinapai ti ni, ni gedi gu nimira nga ga gu nyarinde re; bambiko si nga gu nimira nga ga boro: gau nimira nga 666.