Read zande Yugoti 14 Bible Online

Yugoti 14 - zande bible

Yugoti 14

¹Oni ngére, mi ki bi Wiri Kandoro, ko ru ri gu bagangara nga Siona, agu yo ki du na ko 144,000, nga agu yo du na rimoko ni keke he ti ngbanda kpakpuyo, na rimo Bako a.

²Mi ki gi fugo ngbangbaturũ yo, wa woro dungu aime, na wa woro bakere gumba. Gu fugo mi agi he si adu wa woro atakikundi nataka gayo akundi.

³I ki nibi bia wa Ka si du ni vovo bia barangba mbatabakindo, na barangba gu unga anya du biama, na abaakumba a. A nga boro sa rengbe na wirika gu bia te re, kina agu yo nga 144,000 yo, nga agu yo i atumo yo rogo kpotosende.

⁴Agi yo re nga agu yo azapa nga tiyo na ade ya, bambiko i nga ngasu yo. Agi yo re nga agu yo naapeka Wiri Kandoro ku ho ko andu ku ho ni dunduko. I atumo agi yo dagba aboro yo re, i du ni amakawa fu Mbori, na fu Wiri Kandoro a.

⁵I agia nga zire ngbayo yo wa sa te, i zanga serõ.

⁶Mi ki bi kura maraika, ko nigu bebere ngbangbaturũ yo, nyenye pangbanga ki du ngbako yo ka tungusa ha fu agu yo dunduko naraka auru kpotosende, na fu arikaaboro, na ngbatunga aboro, na ngbatunga afugoyo, na aboro;

⁷ko ki poi ni bakere fugo, niya, “Oni gúnde ti Mbori, ki taasi rimoko; bambiko rago gako sapangbanga da; oni írisi gu ko naamangi ngbangbaturũ na kpotosende, na baime, na agugaabi aime.”

⁸Kura maraika, nga gu ue ko, ki ta peka fuo ko, niya, “Si ti, gu bakere bakporo nga Babera, si ti, nga gu he natina arikaaboro i mbiri gu imekakue nga ga gu zinga nga ga gaha meteka.”

⁹Gu kura maraika, nga biata ko, ki ta peka fuo ko, niya ni bakere fugo, “Ka boro irisi nyarinde na kpiaru, ki du na gau nogodinogodi he ti ngbanda kpakpuni, watadu ti beni,

¹⁰ni ambíra gu imekakue nga ga gu zinga nga ga Mbori, nga gu i ambakadi he, adu nga ni kodikodi he ya, rogo gu inga nga ga gako zinga; i arungosi ni na we na baruti, bara bangiri ziazia amaraika na bara bangiri Wiri Kandoro.

¹¹Ngime gayo rungosi nagunda ku ari nye anye kindi, i aongoda nga uru na yuru te, nga agu yo nairisa nyarinde, na kpiaru, na agu yo i anogodi rimoru ti yo.”

¹²Mbiko gere ga Mbori aboro ka du na hipai ti ni, nga agu yo naka kuti ga Mbori arugute, ki nira fu Yesu kindi.

¹³Mi ki gi fugo ngbangbaturũ yo, si niya, “Mo ké he ya; Aboro maku nga agu yo nakpi rogo Gbia yo awere a kindi!” Toro naya, “Rengo du! ya i ongodi be gayo sunge; bambiko gayo mangaapai napeka fuo yo!”

¹⁴Oni ngére, mi ki bi dubo ni pusi he, auru gu dubo re mi ki bi gu ko nasungu wa kina wiri boro na kpakpari dahabu riko yo, tĩtĩ marã ke ahe ki du be ko.

¹⁵Kura maraika ki kuru yekaru yo, ki nipoi ni bakere fugo kovo du gu ko ni nasungu ri dubo, ki ya, “Mo kúsi ga marã ke ahe ki ke ahe kpotosende ba mbiko rago ke he da; mbiko gu zuzuhe nga ga kpotosende aima uga”

¹⁶Gu ko nasungu ri dubo, ko ki kusi gako marã ke ahe ku auru kpotosende ũ kpotosende ki du ni keke he.

¹⁷Kura maraika ki kuru rogo gu yekaru du ngbangbaturũ yo, ko ki du na tĩtĩ marã ke ahe be ko a.

¹⁸Kura maraika ki kuru bamotumo yo, nga gu ko du na tandu zoga we be ko; ko ki poi ni bakere fugo koyo du gu ko ni du na tĩtĩ marã ke ahe be ko, niya, “Mo kúsi ga tĩtĩ marã ke ahe ki dungura gu akpura bakakue nga ga kpotosende, bambiko zuzuhe nazama gbe.”

¹⁹Gu maraika ki ba gako marã ke ahe ku auru kpotosende, ki dungura gu bakakue nga ga kpotosende, ki bafu he ku rogo bapiraahe yo, nga gu bakere bapiraahe nga ga ga Mbori zinga.

²⁰I ki simbi he ku rogo gu bapiraahe du ku zegi yo ti bakporo, kure ki gbadi bapiraahe yo ki da ti kina marãrugangba afarasi, ni bagbanga rago wa akirometere 300.