Read zande Yugoti 15 Bible Online

Yugoti 15 - zande bible

Yugoti 15

¹Mi ki bi kura yuguyugupai ngbangbaturũ yo, ni bakere he ni iiriwo ho, amaraika saba ki du na agberãngbi saba be yo, nga yangara ha, bambiko si du du digida gu zinga rogo ho nga ga Mbori.

²Mi ki bi he wa kina nzere baime, ni kodikodi he na we; agu yo naadi be nyarinde, na be kpiaru, na be gu nimira nga ga rimoru, i ki ru auru nzere baime, ga Mbori akundi ki du be yo.

³I ki nibi gu bia nga ga Mose, nga ga Mbori moyambu, na gu bia nga ga Wiri Kandoro, naya, “Na kii ga mangaapai du ni iiriwo apai, Ako Gbia Mbori du na tandu apai dũ! Gamo agene du ni ruru he na rengo a, mo nga Bakindo arikaaboro!

⁴Ako Gbia, da agúnde nga ti ro ya, ka ni atáasa nga rimoro a ya? Kina ro du ni ziazia ro. Bambiko arikaaboro ayé ka fu irisa barangba ro, mbiko ga ruru mangaapai du ni yuguyugu he.”

⁵Fuo agi apai re mi ki bi he, i ki za gu yekaru du ngbangbaturũ yo nga ga gu banye nga ga dezirepai;

⁶agu amaraika saba naadu na agberãngbi saba, i ki kuru yekaru yo, ni ukadiukadi yo ni nzaranzara pusi remu, i ki vo ngbaduyo ni giri dahabu.

⁷Gu ru sa dagba gu unga anya naadu biama ki fu kurungbu dahabu saba fu agu amaraika naadu saba hi ani be gu zinga nga ga Mbori, nga gu ko du ni ungako nye anye kindi.

⁸Gu ngime nakura be ga Mbori taarimo, na gako tandu, si ki hisi yekaru; a nga boro sa narengbe na rima ku rogo yekaru yo te, daho gu gberãngbi ka nyasa ni saba nga ga agu amaraika naadu saba.