Read zande Yugoti 17 Bible Online

Yugoti 17 - zande bible

Yugoti 17

¹Gu ni sa dagba amaraika saba, nga agu yo naadu na akurungbu saba, ki ye kono du mi ni, ki fura na mi, niya, “Mo yé kono, mi ayúgo gu sapangbanga foro du tipa gu debari sungu auru dungu aime,

²nga gu ri abakindo zegino amangi bari na ri, agu yo naaraka auru kpotosende ki nikpiki gu imekakue nga ga gari pa bari.”

³Ko ki tuka re ku ngbakungba yo rogo Toro yo; mi ki bi de sungu auru zamba nyarinde, riru adu saba na gbangaru bawe, rimoru ki du ni kinaku gberãngba yo dunduko.

⁴De ki du ni ukadiukadi ri na ngungungu remu na zamba ha a, ri ki fongo tiri na dahabu, na gu mbia kii genoho gbe, na ambia fongo, inga dahabu ki du be ri ni hisi hisi he ni gbegberẽapai, nga gu biriko ahe nga ga gari pa bari.

⁵Rimo ki du ni keke he ti ngbanda kpakpuri, pa ha ki du ni gbugbu he: “Babera du ni bakere he, na agu adebari na gu gbegberẽpai nga ga kpotosende.”

⁶Mi ki bi gu de re, ri nakpi kure ga Mbori aboro, na agu adezire nga ga Yesu yo. Ho mi abi ri ni, si ki iriwo ti re ni bakere iiriwo pai.

⁷Maraika ki ya fere, “Tipagine si airiwo ti ro ti ni? Mi agumba gu gbugbu pai foro nga ga gu de re, na gu nga ga gu nyarinde naatinda ri a, nga gu ru du na riru saba na gbangaru bawe.

⁸Gu nyarinde mo abi ru, u adu ho mbata, ono u ho awetere; u nikakura rogo gu due zanga mburuhe; u ki ndu sa kpio. Ho i ka bi gu nyarinde ni, si airiwo ti agu vo naraka auru kpotosende, nga agu yo i ake nga rimoyo rogo kitabu unga yo ho rago aenge ni ya, mbiko wa u adu ho mbata, ono u ho awetere, u nikaye.

⁹Gu berãpai du na tatamana si du re. Agu ariru du saba si nga abaagangara saba, nga gu sungu de auru he.

¹⁰Si ki ngia abakindo saba; bisue yo aima kpi, gu ko sa du awere, gu kura ko ata da nga te; ho ko ka ye ni ko aima ngbutuko.

¹¹Gu nyarinde naadu, adu nga ho ya, u nga gu muambi ru tigau, u du dagba gu saba ra, u nandu sa kpio.

¹²Gu gbangaru mo nibi he bawe nga abakindo bawe, nga agu yo ata dia nga ngbi ya; ono i nikaasia pai fu yo i du ni abakindo tipa saa sa pati nyarinde.

¹³Agi yo re du na berã sa, i nafu gayo tandu na gu i aasia pa ha fu yo fu nyarinde.

¹⁴Agi yo re nikaso vura kuti Wiri Kandoro, Wiri Kandoro nikadia be yo, bambiko ko nga Gbia ri agbia, nga Bakindo ri abakindo a. Agu yo du na ko, i nikadia be yo a, nga agu yo i ayambu yo, du ni siasia yo, ni kangarã yo.”

¹⁵Maraika ki ya fere, “Agu aime mo nibi he, yo sungu debari ni, si nga aboro, na rimbasa aboro, na arikaaboro, na ngbatunga afugoyo.

¹⁶Gu gbangaru mo nibi he bawe, na nyarinde a, si nikasoga debari, ki gbarasi ri ni kundiriri, ki riti pasiori, ki zokodi ri ni we dunduko.

¹⁷Bambiko Mbori amai sangbako ku kpotoyo yo i mangi he, gayo berã ki du sa, i ki fu gayo angbi fu nyarinde daho ga Mbori pai ka diga ni.

¹⁸Gu de mo nibi ri nga bakere bakporo, nga gu nazoga abakindo zegino.”